سن او گون که جان ویروب یتدون بو چولده کامه قارداش #اربعین_شبیری

اربعین
زبانحال حضرت زینب (س)
..
..
..
..
مرحوم شبیری
..
..
..
..
سن اوگون که جان ویروب یتدون بو چولده کامه قارداش
منده گوتدوم قزلارون قول باغلو گتدیم شامه قارداش
..
..
..
..
سن حسین بودشتده عازم اولان گون کارزاره
محشراولدی بیزلره گلدی اوشاقلار آہ و زاره
نه اوگون بیرده گلر قارداش حسین بو روزگاره
نه اونون مثلین یازار تاریخه بیرده خامه قارداش
..
..
..
..
سن منی مأمور ایدن گوندن حسین تبلیغ دینه
گتمیشم دنیانی آگاه ایلیم دین مبینه
تک نه من کلثوم و لیلاهم ربابیله سکینه
دین حق اوستونده اجرا ایلیوب برنامه قارداش
..
..
..
..
کوفه شهرینده آتام حیدر کیمی لطف خدادن
باشلامیشدیم خطبه تا آلدیم سسون نوک جدادن
خسته جسمه تازه جان گلدی او روح افزا صدادن
هم منه بیر قوّت قلب اولدی هم ایتامه قارداش
..
..
..
..
عالمی گوزدن آتار بلبل چمنده گل گورنده
قان اولارقلبی خزان فصلین گلوب بلبل گورنده
من بیر اوزگه حاله قالدیم صورتونده کول گورنده
باشیمه کول اولدی دوشدی مرغ روحیم دامه قارداش
..
..
..
..
چکدیلر بزم یزیده اهل بیتون زار و خسته
ظاهراً گوردی بیزی اوز مجلسینده دلشکسته
آچدی دل توهینه اول نخل نفاق و کفره هسته
تا یتورسون جور و ظلمین کاملاً اتمامه قارداش
..
..
..
..
ایستدیم دشمن بوله وار قدرت ایمان الیمده
آیۀ تطهیری قارداش ایلدیم عنوان الیمده
یوز ویروب خفّت یزیده گوردی وار برهان الیمده
روشن اولدی اصل مطلب اوردا خاص و عامه قارداش
..
..
..
..
بیرغمیم واردورهامی درد و غمیمدن باشدی قارداش
نچّه یرده باعث اولدی جام صبریم داشدی قارداش
گر ئولم قبریمده ده اول غم منه یولداشدی قارداش
خارجی آد قویدی دشمن حامی اسلامه قارداش
..
..
..
..
ایستدیم بو نهضتون باقی قالا بو محتواده
بیر سفارت خانه قویدوم شامده ویرانسراده
بیر قزون اوردا سفیر اولدی که هر صبح و مساده
پی آپارسون هر باخان نهضتده استحکامه قارداش
..
..
..
..
هر قدر شکر ایلسم آزدور خداوند غفوره
حضرت موسی کیمی یول تاپدیم آخر کوه طوره
سالدی قبرون نوری قارداش باشیمی بیر آیری شوره
خط بطلان چکدی محنت گوردوقوم ایّامه قارداش
..
..
..
..
یر یوزینده هانسی بیر یر بیله قارداش دلربادی
روضۀ رضوان دن بالادی آدی کربلادی
قلبلر گر کاه فرض اولسا مزارون کهربادی
کربلانی گورمین دنیاده یتمز کامه قارداش
..
..
..
..
قبریوه چوخلار گلر امّا قسم ذات خدایه
بیله بیر زوّار قارداش بیرده گلمز کربلایه
خادمون من زایرون اوز قزلاروندور باخ صفایه
بوینی چگنینده اوخور اوغلون زیارتنامه قارداش
..
..
..
..
ای کرامتده سالان دنیایه سایه اشتهاری
نوکروندور بو «شبیری» واردی سندن انتظاری
آیری بیر زاد ایستمور دنیاده سندن سنده باری
لطف ایله گوندر هر ایل بی وقفه دعوتنامه قارداش
..
..
..
..
#اربعین #شبیری #ترکی #زبدةالاشعار