زبدةالاشعار

سن عطشان قانیمه ائتدون کمانیندان فرار ای اوخ #حسینیه_مصیبی_تبریزی

#ای_اوخ
زبانحال حضرت اباعبدالله الحسین (ع) با تیر سه شعبه
.
.
مصیبی تبریزی
.
.
سن عطشان قانیمه ؛ ائتدون کمانیندان فرار ای اوخ
من عطشان جام وصله ؛ سینه آچدیم بی قرار ای اوخ
.
.
مکان لامکاندا یئر تاپوب غم حائلین دلدون
بو طورعشقه یول سالجاق ئوزوم گوردوم کی دینجلدون
بو یئر گنجینه اسرار حقدور گل کی خوش گلدون
گلوب نخجیره ائتدون طائر عشقی شکار ای اوخ
.
.
بلادِ نینواده سرخوشام من نالۀ نی دن
قدح نوش اولموشام بو نئچه گون جام پیاپی دن
اگرچه ساقیم اما خوشام سن گوندرن می دن
ئوزون سیراب سان اما منی ائتدون خمار ای اوخ
.
.
بوگون من صبح صادقدن یانوردوم با دل حسرت
گوزوم یولدیدی خالقدن گله بیر نامۀ دعوت
او دعوتنامه ده اولسون بو جانین بذلینه رخصت
ائوین آباد اولا ائتدون حسینی کامکار ای اوخ
.
.
یزید ایستوردی قرآنه خدنگ افترا آتسون
اونی شیرازه دن سالسون ئوزی کام دله چاتسون
قباقه سینه می وئردیم همان اوخ سینه مه باتسون
آخوبدور سینه مین قانی اولوب دین پایدار ای اوخ
.
.
او جولانی کی وار اوخدا اونی اوخ آتمیان بولمز
بلشماق قانه بیر عالمدی قانه باتمیان بولمز
باتوب قان لجّه سینده پیکرین ایسلاتمیان بولمز
باتاندا سینه مه ائتدون بو سرّی آشکار ای اوخ
.
.
بیلورسن ای خدنگ غم هایاندا سن مکان ائتدین؟
بیلورسن هانسی گلزارین گولون پوزدون خزان ائتدین
نه تنها سن حسینون سینه ده قلبین نشان ائتدین
کی ائتدون عرشین اهلین تا قیامت داغدار ای اوخ
.
.
او یئر کی سن اورا باتدون ازل سوز نهان واردی
اویئر بیر یئردی عشق حق تعالی دن نشان واردی
تحرّکدن دوشوب اعضا ولی سینمده جان واردی
آنام زهرا یانیندا بول کی اولدون شرمسار ای اوخ
.
.
مقام قربیده کوی وصال حقه یول سالدیم
وضو سالماقه گوردوم یوخدی سو چون چاره سیز قالدیم
آخان سینم قانیندان عشقیلن بیردستمازآلدیم
بیلوردوم عشق ائدر بو فعلیمه پروردگار ای اوخ
.
.
دگوبدور آنلیما بیر داش آخوبدور قان عذار اوسته
سیلنده قانیمی پیراهنیله اضطرار اوسته
پر آچدون یاره ووردون داغلی سینمدن شکار اوسته
داغیتدون سینمی قلبیمده کی سیندی حصار ای اوخ
.
.
کمان خصمیدن قورتولدون آخر مقصده چاتدون
باتوبسان سینه مه جناتیده زهرانی آغلاتدون
بوسینمده رقیّم خواب ائدردی ایندی سن یاتدون
یانار شمع فراقیمدان قیزیم پروانه وار ای اوخ
.
.
« مُصَیِّب » یاز بو اوخ آیات قرآنی نشان ائتدی
حسینه دگدی اما قلب عرش وفرشی قان ائتدی
اوخا یوز دوتدی آخیر دم حسین بیله بیان ائتدی؛
چکیل تا شمر گلسین باشه چاتسین انتظار ای اوخ
.
.
#حسینیه_شهادت #قتلگاه
#سن_عطشان_قانیمه_ائتدون_کمانیندان_فرار_ای_اوخ
#ترکی #حسینیه #ای_اوخ_مصیبی_تبریزی
#زبدةالاشعار

متن پیشنهادی:  در دل نشسته ، حسرت کرب و بلای تو – #حسینیه_ترانه_هموطن

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی