زبانحال حضرت زینب به حضرت رقیّه در خرابه شام
.
✍️ #زبدةالاشعار ✍️
.
🆔: @nohe_torki
.
#سبک_ای_باد_صبا … 7 سبک
مشابه
.
حاج اصغر احمدیان خصروشاهی
.
سن قارداشیما سوگیلی سن نازلو رقیّه
گلزار حیانین گلی سن نازلو رقیّه
.
.
گلمه بو قدر شیونه چوخ ایلمه افغان
آغوشیمه گل اولما بئله حالی پریشان
قویما یوزوی توپراقا عمه ن سنه قربان
یاندورما بو خونین دلی سن نازلو رقیّه
.
.
سالما یوزوه زلفوی سن دسته به دسته
توكمه گوزوون یاشینی اولدون بالا خسته
ناراحت اگر اولسا یرون گل سینه م اوسته
یاد ائتمه سینیق محملی سن نازلو رقیّه
.
.
شهزاده قوری یرده بالا رسمیدی یاتماز
نازین چکر ائل طایفه گوزدن اونی آتماز
سینه مده اگر خواب ائله سن عمّه ن اویاتماز
شه سینه سینون سن گلی سن نازلو رقیّه
.
.
رنگون سارالوب گل کیمی سولموش گله بنزر
زلفون توكولوب صورتوه سنبله بنزر
کیم سن کیمی سینمیش پری بیر بلبله بنزر
سن گلشن دین بلبلی سن نازلو رقیّه
.
.
بلبل گلی دوزمز گوره پژمرده چمنده
پوزقون سنی گورسم نجه آرام اولی منده
دور خورداجا قیزلاریله وئر ال اله سنده
بیر سیر ائله بو منزلى سن نازلو رقیّه
.
.
هرکیم غمیله الفت ائده هئچ یوزی گولمز
مندن صورا بیر کیمسه سنون حالوی بولمز
آز آغلا بابام دی، بالا عمّه ن نیه ئولمز
کشف ایلمه بو نیسگیلی سن نازلو رقیّه
.
.
چرخ ادبین هم آیی هم اولدوزی سنسن
بو گلشن غمده هامی گل لر گوزی سنسن
قارداشیمون ایستکلی عزیزه قیزی سنسن
هم سویگولی شیرین دلی سن نازلو رقیّه
.
.
ای کرب و بلا شاهینه بیر نوگل زیبا
چوخدور گنهیم سؤزلریم ائتمور اثر اصلا
ایسته نه اولا عفو ائلسون خالق یکتا
حل ایله بو بیر مشکلی سن نازلو رقیّه
.
.
ای دخت حسین بن على منبع احسان
گوز یاشلی بو درگاهه دخیلم سنه قربان
لطف ایله الى بوش یولا گل سالما قاپوندان
بو «احمدیان» سائلی سن نازلو رقیّه
.
.
#حضرت_رقیه_احمدیان_خسروشاهی
#حضرت_رقیه_شهادت
#سن_قارداشیما_سوگیلی_سن_نازلو_رقیه
#ترکی
.
✍️ #زبدةالاشعار ✍️
.
🆔: @nohe_torki
نظر دهید