حالات کوفه
زبانحال حضرت زینب کبری (س)
..
..
..
مرحوم انور اردبیلی
..
..
..
سیمای زهد قدسیدی سیماسی زینبون
بینای حقدی دیدۂ بیناسی زینبون
..
عفّتده بی نظیریدی منطقده بی بدیل
چوخ جالبیدی لهجه گیراسی زینبون
..
شیر خدا کیمی سخنی مغزداریدی
شمشیریدی ادلّۀ برّاسی زینبون
..
باتمشدی ظلمله شهدانون آخان قانی
گر اولماسیدی خطبۀ غراسی زینبون
..
تفسیر دین ائدردی زنان مدینیه
سرمشقیدی خانملارا تقواسی زینبون
..
خیاط کارگاه ازل باخدی قدینه
چوخ خوشدی گوردی قامت رعناسی زینبون
قاره لباس بیچدی همیشه بو نیّته
باشدا واریدی دائمی غوغاسی زینبون
..
قرمز لباسه بخت قرانون نه حاجتی
دوندی قرایه جامۀ زیباسی زینبون
..
هر بیر تعهّدی که حسین ایلدی قبول
ذیلینده وار مسلّماً امضاسی زینبون
..
نهج البلاغه تک سوزونون امتیازی وار
تاریخدن گیدن دگل انشاسی زینبون
..
نطق على مرام حسین حلم مر تضی
بو اوچ صفتدی واقعی معناسی زینبون
..
لایلای دینده درس غمی گاهواره ده
اورگتمشیدی زینبه زهراسی زینبون
..
باشین آغارتدی باشدان حسین عشقین آتمادی
چکدی نفس حسین دیدی انفاسی زینبون
..
عشق حسینه روز ازلدن مریدیدی
خونگرمیدی بو عشقیله اعضاسی زینبون
..
پروانه تز یانوب کول اولار نقص عشقی وار
یاندی نقدری آرتدی شکیباسی زینبون
..
مقتلده شمریله دایانوب ائتدی کشمکش
شمشیری دوتدی اولمادی پرواسی زینبون
..
کرب و بلا مصائبینه وردی پشت پا
قمچی اگرچه اولدی تسلّاسی زینبون
..
ایتام سیدالشهدایه کفیل اولوب
بسکه چوخیدی رحم و مداراسی زینبون
..
چکدی فلک قطارین اونون شهر کوفیه
باشلاندی کوفه ده غم عظماسی زینبون
..
محملده باخدی جشن ائلیوب ال چالانلارا
جسمینده ذرّه قالمادی یاراسی زینبون
..
ساکت اولون بویوردی ئوزوزدن نه چخموسوز
باخدوقجا شهره تتریور اعضاسی زینبون
..
بیز یاسلیوق ستم زدیوک گولمیون بیزه
خانه بدوش اولوب ئولوب عبّاسی زینبون
..
کرکس صفتلروز نجه گور بال و پر آچوب
پرسیز دوشوبدی توپراقا عنقاسی زینبون
..
حرمت ائدلّه رسمیدی گولمزله یاسلیا
زخم زبانه یوخدی تواناسی زینبون
..
یاندیرمیون منی قویون ئوز دردیمی چکوم
بیر کسله یوخ بو شهریده دعواسی زینبون
انصاف ائدون على قزیام باخمیون منه
قالمیش قرا گونه نه تماشاسی زینبون
..
تخت روانیده ایلیوردوم مسافرت
ایندی سنق کجاوه دی مأواسی زینبون
..
قارداشیما او نامه یازانلار هایاندادی
گورسونله تار اولوب نجه دنیاسی زینبون
..
عریان دوه مینلره باری داش آتمیون
نابود ائدر سیزی حق یکتاسی زینبون
..
بیز آل عصمتوک کولی ئوز باشوزه توکون
کول توکمیوبدی باشینه لیلاسی زینبون
..
درس حجابی قزلاروزا اورگدن منم
بوینوزدا واردی منّت کبراسی زینبون
..
مزدوم بودور دولاندوروسوز باش آچوق منی
عفت ایویدی منزل و سکناسی زینبون
..
خوشدور بو گون سیزه، منه ظلمتدی عیبی یوخ
ظلمت کچر ایشقلدی فرداسی زینبون
..
صحبت ائدوب گلنلری آغلاتدی کوفه ده
پوزدی او شهری منطق شیواسی زینبون
..
گوردی حسین خانم باجسین غم داریخدیرور
امداد ائدوب او موقع حساسی زینبون
..
ترک ایلیوبدی قصرینی مرجانه اوغلونون
پیشوازه گلدی نیزه ده یحیاسی زینبون
..
قربان اولوم دئدی سنه گل یاخشی گلموسن
دوندى صباحه لیلۀ یلداسی زینبون
..
دیندیرمسون منی سنه اوز وورمارام حسین
وار محضرونده آیری تمنّاسی زینبون
..
دیندیر بو سینمه سخلوب اگلشن قزی
دیلدن دوشوبدی بلبل شیداسی زینبون
..
کولدن نیه جمالوه سن پرده سالموسان
ای شب چراغ انجمن آراسی زینبون
وئر اذن آهمیله یخوم خولینون ایوین
امر ایلمک سنونکیدى اجراسی زینبون
قانلی یوزه باشوندان آخان قان ندور حسین
اولما وروبدی داش سنه اعداسی زینبون
..
عشقیمده نقص اولار باشیمی یارماسام اگر
وئرمز نتیجه ائتدیگی سوداسی زینبون
..
آق زلفه قان خضابی حنادنده یاخشیدور
نیلور حنانی محو اولوب اجلاسی زینبون
..
بیر یا حسین دئدی باشینی چالدى محمله
عشق عالمینده آرتدی مزایاسی زینبون
..
سسلندی ناقه اوسته گیدن قزلار عمه وأی
قانه بویاندی صورت و سیماسی زینبون
..
صاحب زمانون عمه سینه «انور» اول دخیل
باب عطادی درگه والاسی زینبون
..
..
#کوفه #انور_اردبیلی #ترکی #زبدةالاشعار
نظر دهید