شامدن فقط گلمیشم حسین قبریوون نماسین گورم گیدم #اربعین_نادری

اربعین (سوال و جواب)
✔️ سوال ( زبانحال حضرت اباعبدالله الحسین علیه السلام )
#ای_بلا_چکن_راه_عشقیده
✔️ جواب ( زبانحال حضرت زینب سلام الله علیها )
#شامدن_فقط_گلمیشم_حسین
.
.
#سبک_ساخلا_ناقه_می_کاروانیدن (بیش از 8 سبک زنجیر و سینه زنی)
.
.
مرحوم نادری
.
.
✔️زبانحال حضرت زینب سلام الله علیها
.
.
شامدن فقط گلمیشم حسین
قبریوون نماسین گورم گیدم
ناقص اولمیا حجی زینبون
بیرده حق مناسین گورم گیدم
.
.
ممکن اولمادی من گیدن زمان
یاره‌وی گلوب بوردا باغلیام
یا که اولمادی باشدا معجریم
اوستوه چکوب سینه داغلیام
شمر قویمادی قتلگهده من
سس چکوب سنه قارداش آغلیام
فرصت ایلیوب ایندی گلمشم
فاطمه بالاسین گورم گیدم
.
.
بیلمرم بونون علتی ندور
قبریوی سنون آلتی گوشه‌دور
خرمن گلون اوسته غنچه‌تک
آچمیوب یقین تازه خوشه‌دور
خوشه‌چین گلوب خوشه آختارور
بو رباب اوچون یاخش توشه‌دور
گلمشم قوجاقونده اصغرین
حلقنین یاره‌سین گورم گیدم
.
.
کربلا آدی دوشدی دللره
تپراقندا چون حق فداسی وار
دلربا اولوب کربلا آدی
چون سنون کیمی دلرباسی وار
هر ایکی بو آددان گوزل اولان
اکبر آدلی بیرمه لقاسی‌وار
لیلی عرض ایدور گلمشم اونون
شبه مصطفاسین گورم گیدم
.
.
من ایشتمیشم نهر علقمی
ایلسون زیارت چوخ اجری وار
واضحین منه سویله یا حسین
قورخما زینبون تاب صبری وار
سرو تک اوجا قد و قامتین
علتی ندور خیردا قبری وار
ایسترم ابالفضل آناسنین
صاحب لواسین گورم گیدم
.
.
بوش‌ دگول الیم شامدن حسین
قرخادین سنه جان گتورمشم
یوخ طراوتی گللری سولان
دسته دسته ریحان گتورمشم
نوعروسدور باشدا قاره‌سی
دلده شور و افغان گتورمشم
گلمشم بلادشتینین اولان
تازه کدخداسین گورم گیدم
.
.
نیلیوم حسین عفو قیل منی
رشتۀ کلامی یتورمشم
واردی چوخ سوزوم هاردان عرض ایدوب
جانمی دوداقه ایتورمشم
اهلبیتوی شامدن بورا
گورنجه سلامت گتورمشم
عرض ایدم سنه تازه بیر خبر
قلبوون نواسین گورم گیدم
.
.
عشقوین فداسی اولوم حسین
چکمیشم یولوندا بلیه‌نی
سندن ایتدیلر چوخ خجل منی
کامه یتمسون هیچ امیه نی
قویمشام نماینده شامده
ئوز یریمده نالان رقیه‌نی
گلمشم اونون العطش سسین
ضبط ایدن فضاسین گورم گیدم
.
.
چکدیگوم مصیباتی شامده
عرض ایدوم نجه شاه بی‌وطن
دل یاراسی چوخ اینجیدور منی
قلبمی دوتوب محنت و محن
ئولدی شامده نازدانه قیز
تاپمادوم او بیچاریه کفن
زخم قلبمین سن طبیبی سن
دردیمین دواسین گورم گیدم
.
.
کربلایه من شامدن گلوب
قبریوه اخا خسته زایرم
چوخ قالانمارام عفو قیل منی
یثربه گیدن بیر مسافرم
هر سفارشون وار مدینیه
طاعت ایتمگه امره حاضرم
قووزا قبردن باش منه گوره
روحمین غذاسین گورم گیدم
.
.
وار مدینه‌ده بیر مریضه قیز
گوزلری قالوب یولدا انتظار
گورجگین منی ایستیر سنی
اکبرین اطاقین آچار باخار
گر سوروشسا طوی ایتدوز اکبره
یوخ جوابنه منده اختیار
گلمشم اونون کامه یتمین
نوجوان اخاسین گورم گیدم
.
.
زینب ستمدیده دور بوگون
دشت و کربلانین مسافری
السلام ایدن زین‌العابدین
ئوز باباسنین خسته زایری
چوخ زماندیکی باغلیدور یولی
حسرتین چگر گونده «نادری»
ایستیه گلوب توزلی قبرینین
جلوۀ جلاسین گورم گیدم
.
.
.
#اربعین
#نادری
#ترکی
#زبدةالاشعار