خطبۀ زینبیه در مجلس یزید
..
..
مرحوم یحیوی اردبیلی
..
..
اوتوز اوچ سنّیده نااهل و زنازاده جوان
بی ادب دشمن سرسخت خداوند جهان
یوخ ردیف نجباده اونا بیر نام و نشان
سالدی اسلامده فرمان ریاست الینه
باغلادی شامده شمشیر خلافت بئلینه
..
..
او یزیدی که اسیر شهوات و همه کار
ائوده سگ باز و بیابانیده مشغول شکار
مست و سرگرم شراب و دف و طنبور و قمار
دختران عرب و رومی و یونانی ایلن
صبح ائدردی گئجه سین عشق و هوسرانی ایلن
..
..
قصر خضرا که اونا قالموشیدی ماویه دن
سقف و دیواری اونون کاشی الوان یمن
ساختمانینده مهندس یارادوب صنعت و فن
اوجا تالاریدی دارای ستون دور و بری
آچیلور سمت حرمخانه سینه غرفه لری
..
..
قطعه قطعه دوشنوب فرش بهادار یئره
شمع کافورى وئرور جلوه قیزیل لاله لره
آسیلوب پردۀ زنبوری گذرگاه دره
باش طرفده قویولوب کرسی بیداد و جفا
صاق صولوندا دوزولوب صندلی سیم و طلا
..
..
ائدوب اشراف قبایل صف اوّلده مکان
بیر طرفده سفرای دُوَل خارجیان
علمای کتب موسویان عیسویان
آخرین صفده نوازنده شیاطین خدمی
غرفه لردن باخور اوضاعه یزیدون حرمی
..
..
یاشیل عمامه باشیندا او جفاکار و کثیف
جبّۀ ترمه گیوب اگنینه قلّابه ردیف
آسمان رنگی عباسی نخ پشمینه ظریف
کمرینده گورونور خنجر الماس نگار
خیزران الده دو توب تخت مرصّعده قرار
..
..
ایکی بدشکل غلام حبشی چهره سیاه
راه راهی گینوب جامه قویوب سرخ کلاه
الده شمشیر عقب تختدن ایلله نگاه
بیر قیافه دوتوب اشخاصه تکبّر له یزید
بارگاهی بوریوب واهمه و رعب شدید
..
..
قاتلان شهدادن ایکی بدجنس بشر
قویدیلار تخت قباقینده یئره سینی زر
سینی اوستونده ایپک اورتوک ائدر جلب نظر
خیزرانیله یزید آتدی اونون پرده سینی
پرده دن ظاهر ائدوب فاطمه پرورده سینی
..
..
تیتره دوب طاق عنادی او باشون منظره سی
سینه لرده دایانوب مجلسیانون نفسی
دفعتاً قطع اولوب آواز و نوزانده سسی
اوز یئرینده هامونی بهت آپاروب حیرتیلن
خیره خیره یزید اول باشه باخور دقتیلن
..
..
باخدى باخدی اونا چکدی نفس طولانی
یادینه دوشدی ارینب خانمون جریانی
که اونون نقشه سینه ووردی حسین بطلانی
خیزرانیله هدف ائتدی لب و دندانین
سیندیروب مخزن عقدون صدف و مرجانین
..
..
او سر اعظمه اول ذاتی خبیث ائتدی خطاب
حقّیمیز وئردی سیزه گور نئجه دنیاده جواب
آرامیزدا ائلدى تصفیۀ حق و حساب
منی محروم ائلدون بیر زن خوش سیمادن
سنی محروم ائلدیم من همۀ دنیادن
..
..
منه دلخواهیدی بیلدون که ارینب خاتون
بو دوداقلاریله أوز آدیوه عقدین اوخودون
حفظ ائدوب پردۀ عصمتده امانت قویدون
شامدن که الى بوش گلدی اری اوز یئرینه
تئز طلاقینی دیوب رد ائلدون شوهرینه
..
..
بی لیاقت او قدر طعن و شماتت ائلدی
سید اهل بهشته چوخ اهانت ائلدى
مستبدّانه شه دینه جسارت ائلدی
ناگهان آخر تالارده بانوی نجیب
آمرانه سسیله ووردی او بی دینه نهیب
..
..
ای یزید ای ائوی برباد و رئیس ظَلَمه
بی حیا ساخلا الون طعنه دئمه فخر ائلمه
وورما ظالم او مبارک باشی قانه بَلَمه
او باشون قان آلانی حشرده قهّار اؤزی دور
او دوداقدان توکولن کلمه لر الله سوزی دور
..
..
دوتدی جبار شهون سن کیمی سودا باشینی
کسدیروب طشت زره حضرت یحیا باشینی
چکدی منشاره آغاجدا زکریا باشینی
سنده بیر نهی خلاف امرین آلوبسان نظره
قویموسان زادۀ طاها باشینی طشت زره
..
..
نظم مأمورلریندن توکولوب نچه نفر
او سسون صاحبینی ساکت ائدوب جلب ائده لر
دئدی خشمیله یزید: اول دانیشان کیمدو مگر؟
وسعت قلبی قوی دور متکبر دانیشور
منه جرأتله ائدور قهر و تغیّر دانیشور
..
..
دئدیلر زینب کبرادی کفیل اسرا
گنج تالاردن ایلر سنی تهدید خطا
دئدی منع ائتمیون عورتدی گرفتار عزا
قوی دانیشسون دانیشیقدور اونا شمشیر جدل
سؤزدن آرتوق اولارا قالمیوب امکان عمل
..
..
زینب اول سیّدۀ پردل ابنات على
دشمنی ایلدی محکوم به حول ازلی
باشلادی لهجۀ گیرائیله با صوت جلی
ابتدا حمد و ستایش بیر اولان اللهه
صونرا صلوات و سلام اولسون حبیب اللهه
..
..
ای عدالتدن اوزاق کاذب و ناپاک و شریر
بویوروبدور اوزی قرآندا خداوند کبیر
دوز دیور دوز دانیشار پاک زبان پاک ضمیر
بد ائدوب شخص که آیاته ائدوب استهزا
قویاجاق عاقبتین أوجینا حق روز جزا
..
..
ایلیوب جانلارین اول کسلری که حقّه فدا
بئله فکر ایلمه که ئولموش او مردان خدا
هاموسی زنده و جاویددی مشغول عطا
ربّ الارباب حضورینده دیلر غرق نعیم
سنون اما یئرون آتشدی چون ابلیس رجیم
..
..
من سنون پست ومحقّر بیلورم فطرتیوی
چیز ناچیزدن اسکوک بیلورم قیمتیوی
نئجه نادیده دوتوم سرزنش و تهمتیوی
ایتوروبسن گورورم رشتۀ نظم سخنی
من دانیشمازدیم او سؤزلردی دانیشدیردی منی
..
..
پست زاده نیه گردن چکوسن نخوتیلن
بورنووى یلله دیسن باد غروریّتیلن
چیگنووی اوینادوسان حال جنونیّتیلن
مکه فتحینده سنون جدّیوى یابن الطلقا
قلج آلتدان بوراخوب عفو ائلدى خیر ورا
..
..
شخصی که مکه ده بتخانه نی تسخیر ائلدی
وحشیان عربستانی جهانگیر ائلدى
اونون اجلالی سنی صاحب شمشیر ائلدى
عوض عرض تشکر او رسول اللهه
چکدیروبسن حرمین مجلس فرعون جاهه
..
..
ریزه داشلاری سایوب خوشدل اولان پول یئرینه
سوسماری پیشیرن جوجۀ مأکول یئرینه
شهرلرده ساتیلان وحشی لری غول یئرینه
کیمدور آیا اولاری دعوت قرآن ائلدی
بَدَوی غول بیابانلاری انسان ائلدی
..
..
ایده شق القمر اسرارینی ظاهر دئدیلر
سنون اجدادون او پیغمبره ساحر دئدیلر
غلبه ایلدی حق طیب و طاهر دئدیلر
چوخ ابوجهل لر ائتدى اونیلان جهل و عناد
سن کیمی اولدیلا رسوای جهان یابن فساد
..
..
آنلامازدی او عربلر که نظافت نه ایمیش
ال ایاقینی یوماق رفع کثافت نه ایمیش
رسم تطهیر بدن غسل و طهارت نه ایمیش
دُؤزدی خیر البشر اول طایفه نون زحمتینه
وئردی درس مدنی سالدى بشر صورتینه
..
..
ائتمه میشدی نه قدر صاحب اسلام ظهور
شیخ و اشراف عربده یوخیدی فهم و شعور
خوردا قیزلارین ائدردیلر اولار زنده به گور
بو حسینون باباسی تربیت ائتدی عربی
بت پرستان عرب تاپدی طریق ادبی
..
..
وئردی بو نعمتی اعرابه حسینون پدری
ضرب بازوئیله سیندیردی بویوک قلعه لری
اولدی همواره سیزه غصب خلافت گذری
مفت و مجّانی ریاست قلمین آلدین اله
اوّلین وهله حسین قتلینه ائتدون عجله
..
..
سن که تنگ ایلدون ارض عربستانی بیزه
کرۀ خاکده اقطار و زوایانی بیزه
سن که تلخ ایلدون آسایش دنیانی بیزه
شهردن شهره دَوَه اوسته ائدوب خوار و حقیر
گزدیروب کوچه و بازارلرى مثل اسیر
..
..
او گونی که آدی ساعتدی قیام و عرصات
جدّیمه وار نه جوابون سنون ای بدحرکات
اول مجازاتیوه حاضر سنه یوخ راه نجات
اتصالاً توکه جک قارنووا سقای جهیم
آتشین کاسۀ نیرانیده غسّاق و حمیم
..
..
آهنین حربه ایلن جسمیمیزی پاره لدون
بیزه روشن گوئی ظلمت گئجه تک قاره لدون
نور حقیله اولان قلبیمیزی پاره لدون
بو گمانیله که مقصودون اله گلدی سنون
بلکه اؤز حربه لرون پاره لدی اؤز بدنون
..
..
أئده بیلدون سالاسان بو گونه احوالیمیزی
الیمیزدن آلاسان دولت و اموالیمیزی
ظاهرا محو ائلدون شوکت و اجلالیمیزی
جرأتون یوخ آلاسان وحی نشان تاجیمیزی
قدرتون یوخ پوزاسان سورۀ معراجیمیزی
..
..
نئجه سنده گوروم أنصاف و مروت اثرین
که آنان هنده سوروب حمزه شهیدون جگرین
بسله یوب خون شهیدانیله فرزندلریلن
اودی که هنده جگرخواریه بنزر روشون
کسدیروب باش، توکه سن قان وئریلوب پرورشون
..
..
تشنه ئولدوردون حسینی بو مروتدی مگر
ووردون اود خیمه لرینه بو دیانتدی مگر
حرمین چوللره سالدون بو خلافتدی مگر
سن دیانت آدین اسلامده بدنام ائلدون
حکم اسلامی پوزوب دعوی اسلام أئلدون
..
..
عصر وقتدی حسین خیمه لری چکدی شرار
خوردا قیزلار یانار اوتدان قوتاروب قیلدی فرار
حجت الله مریضیدی آلو ائتدی حصار
دامن همّتی آچدیم اؤزیمه چتر نجات
وئردیم آتشده خلیل عطشه آب حیات
..
..
کومگیم قالمیوب الله دی منیم دادرسیم
نقدر ئولمه میشم واردی بدنده نفسیم
نقدر نای گلودن اوجالور ناله سسیم
هر مجالسده عزا مجلسی برپا ائدرم
کربلا واقعه سین زنده و احیا ائدرم
..
..
ایلیوبسن بیزه راحتلوقی مدتدور حرام
یا اوشاقلاریمیزه آز وئریلور آب و طعام
بیزه رزاق و نگهداردی خلّاق أنام
سفرۀ مائده میز واردور آنام فاطمه دن
استفاده ائدروک باطناً اول مائده دن
..
..
اندیرن وقته قشون باشیمیزه قمچی لری
بیزه حامی دی نگهبان ملک و جن و پری
رد ائدر ضربه نی بیزدن اولارون حربه لری
بیزه مأمور و محافظ دی گروه جبروت
بیزه تعظیم مقام ایلیور اهل ملکوت
..
..
خاک و خونه بله دون هاشمون اوغلانلارینی
آسمان شرفون کوکب رخشانلارینی
سن کچیرتدون آتامون شمع فروزانلارینی
قلبیمیز شمع کیمی شعله چکوب اودلاناجاق
سؤنمین اوددی بو اود محشر اولونجاق باتاجاق
..
..
خیزران که لب و دندان حسینه ووروسان
روزن بیت خدا شیشه سینی سیندیروسان
ووروسان اینجیدوسن قلبیمیزی یاندیروسان
بلکه تاپسون مرضون سینۀ نحسونده شفا
باور ائتمه گوره سن باقی عمرونده صفا
..
..
هند و چینون قره قیزلارینی با اسم کنیز
دورتموسان پرده دالیندا اؤز عیالون تک عزیز
فاطمه قیزلارینی چادره سیز مقنعه سیز
ساخلیوبسان باش آچوق بزم جماعتده یزید
کیم یازوبدور بونی قانون عدالتده یزید
..
..
یوخدو باشیمده اگر چادر و روبند و نقاب
بیزه بیگانه تماشا ائدر ای خانه خراب
ملکان غضب اول گوزلره چکمیشله نقاب
صورت اصلیمیز حاشا گورونه گوزلرینه
بیزی طاووس ملایک بوکوب اوز شهپرینه
..
..
هاتف غیبی قولاقلاردا ندا ایلیه جک
زنگ تاریخ جهان آتیه ده سسلنه جک
ایل به ایل صحنۀ ظلم و ستمون گورسنه جک
اهل ایام ائده جک بیزلری صلواتیله شاد
سنی اما ائده جک لعنت و نفرینیله یاد
..
..
من خانم فاطمه نون پاک و مطهّر قیزیام
صاحب فضل و ادب ختم پیمبر قیزیام
حیدرون عاقل و فرزانه سخنور قیزیام
تربیت کردۀ دست اسدالله منم
زینبم خواهر کبرای حسین و حسنم
..
..
دانش آموختۀ مکتب زهرای بتول
پرورش یافتۀ سینه و آغوش رسول
حکمت اندوختۀ محکمۀ وحی نزول
وحی حقّی بیزه گوگدن گتوروب روح الامین
منه تعلیم اولونوب معنی قرآن مبین
..
..
منم عباس جوانمرد و توانا باجیسی
صبری دریا حسنون صبرده دریا باجیسی
اکبرون عمّه سیم سرور بطحا باجیسی
من حسین ماتمیتون اشک فشان زینبیم
انبیا خاتمینون حق دانیشان زینبیم
..
..
دئمه گئتمیش آرادان عدۀ مردان شریف
یوخ سنون جنگیوه میدانیده بیر مرد حریف
بالا قیزلاریمی بیچاره گوروب سانما ضعیف
شامدن من گئدرم بوردا رقیّم قالاجاق
بالاجا پنجه لریلن سنی تختدن سالاجاق
..
..
بانوی باعظمت بیردن ائدوب قطع بیان
مجلس اهلینه گوز آلتی باخوب اول شیر زنان
گوردی حضّارده وار حالت شور و هیجان
هر دوداقدا گورونور نیمه صدا زمزمه لر
هر نفسدن گلی دزدانه خفی همهمه لر
..
..
او خانم خاتمه وئردی سؤزینه چکدی بیر آه
ایلدی سمت سماوات و حجاباته نگاه
حمدیمیز واردی سنه عرض ائلدی یا الله
آرتیروبسان بو صلاحیّتیله شأنیمیزی
بو جفاکار دنی دن اؤزون آل قانیمیزی
..
..
جاثلیق آدلی یهودی اؤزی داننده کشیش
قوش کیمی صندلی اوستن قباقا ائتدی پرش
اعتراضیله یزیده دئدی ای کینه روش
جانشین فرض ائدوسن نفسیوی پیغمبریوه
اوغلینون قانینی اما یاخوسان اللریوه
..
..
رأس جالوت یهودی قوجا دیندار کلیم
ناگهان قلبینه تابنده اولوب نور سلیم
خشمگین حالدا یزیده دئدی ای مرد لئیم
گورمیشم جدّی اؤپنده حسنینون دوداقین
ای مسلمان نیه اینجیتدون حسینون دوداقین
..
..
ائلچی روم ایتالیا اوجالوب صندلی دن
گوزین آچدی او کسوک باش دئدی گوردوم اونی من
باجیسی زینبه باخدی دئدی آهسته سخن
ای قویان آدینی مملوکۀ اسلامه امیر
سنه هر سؤز دئدی ذی حقدی بو خاتون اسیر
..
بیر ظُهیر آدلی نمایشگریدی عبد شکم
بزه میشدی اوزینی بارگهه قویدی قدم
اولدی بازیگر مجلس آلا دینار و درم
گلدی پیش اسراده دایانوب دوتدی قرار
بیر الین ائتدی اشاره اولارا مسخره وار
..
..
تئز کنیزان حرمدن بیری هی ووردی اونا
مرد دلقک ائله الله و پیمبردن حیا
دین اسلامیده سن گل ائلمه خبط و خطا
بو خانملار فلک عصمتون اولدوزلاریدور
عترت ختم رسول فاطمه نون قیزلاریدور
..
..
ائتدی تأثیر کنیزون سؤزی اول شیوه گره
آنلادی آل محمددی دوشوبلر خطره
گیدیگی جامۀ تفریحی سویوب توکدی یئره
بزمیدن قاچدی چوله چاره ایده مشکلینه
خنجریله صول الین کسدی وئروب صاق الینه
..
..
مجلسه گیردی یئرون فرشینی قانه بله دی
ساخلیوب الده کسیلمیش الینی اشگ اله دی
سید ساجد حضورینده دوروب عجز ائلدی
دئدی قربانیوم ای وارث اخلاق نبی
آند وئرّم آناوا عفو ائله بو بی ادبی
..
..
تانیمادیم سیزی اوّل ائلدیم بد حرکت
سؤزی ناپخته دانیشدیم من دیوانه صفت
کسمیشم اوز الیمى ائتدیگی تقصیره جهت
من طرفدار رسول الثقلینم کرم ائت
جان نثار قدم آل حسینم کرم ائت
..
..
اونی بو حالدا گورنده حرم ختم رسول
تسلیت وئرمگیله توبه سین ائتدیله قبول
حضرت سیّد سجاد او مولای ملول
او کسیلمیش الى بازوسینه پیوند ائلدى
نایل صحّت اونی امر خداوند ائلدی
..
..
بئله منقول دی حضرت ائدوب اول شخصی دعا
عاقبت خیره یتیشدی او گنهکار خدا
حقّی گوستردی اونا آئینۀ غیب نما
ائوینی ترک ائلدى ووردی اؤزون داغه داشا
واحسین وای دئدی چوللرده یتوب عمری باشا
..
..
قصردن ائتدیله قول باغلی اسیرانی کنار
آپاروب مسجد ویرانه ده وئرسونله قرار
در ویرانه ده قوللارین آچوب بوشلادیلار
نئجه توردان قوتاران قوش گلور عشق و هوسه
چیخدی توردان بالالار گلدیله تازه نفسه
..
..
بیر بولوک قیز اوشاقی سنّده أوچ یا بئشیدی
هاموسی شهرده یولّاردا مصیبت کشیدی
ایستی وورموش چوخی ناراحتیدی ناخوشیدی
قوللاریندان که آچیلدی گره بند و طناب
فوری گوزلر آخینوب اولدی اولار مایل خواب
..
..
او یئرون فرشی اَلَنمیش یوموشاق گرد و غبار
دولانوب کوچه و بازاری چکوب زجر و فشار
نه یئمک دوشدی نه ایچمک یادا نه شام و ناهار
خسته و کوفته یان یانه یخلدى بالالار
قوللارین باشلارینون آلتدا قویوب یوخلادیلار
..
..
هاموسی یاتدی ولی یاتمادی بانوی حجاز
قاپودا مثل نگهبان دوروب اول کوکب راز
قوللارین بالش أئدن قیزلارینا باخدی بیرآز
او خانم قیزلارون احوالینی آلدى نظره
اللرین گوزلری اوسته قویوب اگلشدی یئره
..
..
آغلادی آغلادی بیر قدری بوشالتدی اورگین
بیر قیزون آلدى اله اؤپدی گوگرمیش بیله گین
زلفینی سیلدی یواش اوستونه چکدی لچگین
آناسی فاطمه ده گلدی او غم مجلسینه
سسینی قؤشدی او ویرانه ده زینب سسینه
..
..
ای حسین گلشنینون بلبلی لای لای بالا یات
اصغرون خواهر شیرین دلی لای لای بالا یات
یاندیران زینبی بو نیسگلی لای لای بالا یات
راضیم آغلامیوب سن یاتاسان من اوتورام
توزلی زلفمیله باشون اوسته سنون خیمه قورام
..
..
بارالها به حق شاه شهید و شهدا
یحیوی دن ائلمه فضلوی هئچ وقته جدا
ملک الموتون الیندن قیلوب آسوده رها
رحمتونله اونی راحت ائله عقبا گئجه سی
وحشته قویما دوشه قبرده تنها گئجه سی
..
..
#مجلس_یزید #یحیوی_اردبیلی #ترکی #زبدةالاشعار
نظر دهید