زبانحال حضرت صغری (س) به حضرت علی اکبر (ع)
..
..
مرحوم یحیوی اردبیلی
..
..
گل سفر ائتمه عراقه علی قربانون اولوم
منی یاندورما فراقه علی قربانون اولوم
..
..
نه اؤزون گئت علی نه مندن آیر سن ائلیمی
بو الیم بو اتگون کسسون اگر کس الیمی
بو مریضه باجوون گورسنور اوندا ئولومی
گئده سن گوزدن ایراقه علی قربانون اولوم
..
..
بئلیمه باغلادیم آخر کمر همّتیمی
طوی اطاقون بزه دیم سن بیلوسن نیّتیمی
خواهشیم ایله قبول ائتمه هدر زحمتیمی
قفل ویردورما اطاقه علی قربانون اولوم
..
..
سن وطنده هله وارسان باجوی غم بوریوب
رنگ و رخساریمی چون صورت دیوار ایلیوب
اوتوروم باخ بدنیم گور نجه قارداش اَریوب
طاقتیم یوخدی نفاقه علی قربانون اولوم
..
..
چوخ اوزاق چکمز علی دست اجل جانیم آلار
من بیچاره نی بو محنت الیندن قوتارار
بو سفردن سن اگر منصرف اولسون منِ زار
ساغالوب دورّام ایاقه علی قربانون اولوم
..
..
آناسیز ناخوشام ای ماه رخ و غنچه دهن
فخرگاهیم سنیدون سنده که الدن گئدوسن
دوزمرم فرقته امّا دوزرم دهرده من
هر بلا چیخسا قباقه علی قربانون اولوم
..
..
گلبن لعل لبونده گورونور تازه بهار
فوری افسرده اولور تشنه لیقا اولسا دچار
ایلیوم گل، گَه اوپوم، گَه ایلیوم اشک نثار
سو سپوم غنچه دوداقه علی قربانون اولوم
..
..
چکرم فکریمه عکسون یوخی گلمز گوزیمه
آیریلیق قصّه سینی شرح ایدرم اوز اوزیمه
کیم یانیمدا اوتورا ملتفت اولماز سوزیمه
یعنی سس گیتمز اوزاقه علی قربانون اولوم
..
..
صبر درسین منه یوخ طاقتیم اورگتمگیلن
دل بیگانه نی شاد ایلمه بو گیتمگیلن
بانوان عرب ایچره منی خوار ایتمگیلن
شأنیمی سالما اشاقه علی قربانون اولوم
..
..
کاکلوندن آیروب ویر منه بیر تار علی جان
نجه صغری اونی گور جان کیمی ساخلار علی جان
نه قدر ئولمه میشم جاندا رمق وار علی جان
اولماسون قطع علاقه علی قربانون اولوم
..
..
«یحیوی» نوحه یازار ای گل بستان وفا
آرزوسی بودو قبرونده قیلا نوحه سرا
محضر انورده عرض ایده با آه و نوا
یوز قویان وقته رواقه علی قربانون اولوم
..
..
#اکبریه #یحیوی_اردبیلی #اکبریه_شهادت #ترکی #زبدةالاشعاز
نظر دهید