اربعین
زبانحال حضرت زینب (س)
.
✍️ #زبدةالاشعار ✍️
.
🆔: @nohe_torki
.
مرحوم نجمی تبریزی
.
شامدن گلدی حسینیم وطن آواره لری
آنام اوغلی نجه دی پیکریوین یاره لری
.
.
قبریوه گلماقا مدتدی که حسرت واریدی
قولاریمدا بولوسن قید اسارت واریدی
هامی بیر دلده ز بس شوق زیارت واریدی
چکدی بو قبره علاقه بو گونی قاره لری
.
.
من گیدنده سنی سویموشدولا اشرار شرور
گون ایوینده یارالی جسموی قوموشدولا عور
آغلارام بو غمه عمروم اولا تا نفخۀ صور
توکرم دامنه گوزدن در شهواره لری
.
.
تا شهید ایتدی سنی لشگر عدوان یارالی
سویدولار گول بدنون قویدولار عریان یارالی
ایتدیلر پیکریوه ظلم فراوان یارالی
یاپمال ایتدی وجودون قدم باره لری
.
.
بسکه طغیان ایلدی ظلمده اشرار پلید
لب دریاده سنی ایتدیله لب تشنه شهید
تابع خواهش نفس اولدولا اتباع یزید
وادی جهله چکوب انفس امّاره لری
.
.
آچدی سندن صورا ال عترتیوه اهل ستم
ووردیلار آتش ظلمیله الولاندی خیم
آشیانی اود آلان قوشلارا بنزردی حرم
یانار اود باغلادی بیچاره لره چاره لری
.
.
یانار اود ایچره خانم قیزلار ایتوردی اؤزونی
اودی سوندورماقا دولدوری سرشکه گوزونی
ایله تیترردی دینمزدی دلینده سوزونی
سودا اولدوزلارا بنزردیله رخساره لری
.
.
خم محنتده باجون هر غمه قارداش بویانوب
سن اوزون یاحچی بولورسن نجه اودلاره یانوب
پا پیاده منیله کوفه و شامی دولانوب
خوردا قیزلار انامیز فاطمه دلپاره لری
.
.
گوردولر نیزه ده باشون دیه سن گوندی گزر
او گون آردینجا ابوالفضل باشی قرص قمر
ایله بیر مهر و مه اولدوزلاری یتمیش ایکی سر
سیردن قویدی هامی ثابت و سیّاره لری
.
.
حبس اولوندی نفسی سینه ده هر ذی نفسین
دایانوب ناقه دایانمیشدی نواسی جرسین
اوجالوب اوندا سنون آیۀ کهفیله سسین
بلکه غفلتدن اویاندیرسون او بدکاره لری
.
.
هامی گوز دوندی نظر ایلدی نیزه باشینا
چوخلاری غرقدی حیرت زده اؤز گوز یاشینا
اوندا باشون هدف ایلوبله عداوت داشینا
شل گوریدیم او عجوزه کیمی مکّاره لری
.
.
یاندیم از بسکه بو سونمز شرر نسگله من
یا هِلالاً دئدیم اوندا سنه گلدیم دیله من
ایله دویدوم جانا ووردوم باشیمی محمله من
قان اتوب قیلدی خجل آتماقی فوّاره لری
.
.
گر سنون قانلو باشون قارداش حسین دیده گیدوب
زینبونده باش آچوخ انجمن غیره گیدوب
سالوب آردینجا هارا آی کیمی کیم سیره گیدوب
یوزدن آز بختی گونی قاره بو آواره لری
.
.
اوخشادار اهل سخن مطلعی «فاکر» سوزینه
قافیه ضیق نظرده گورونوب اؤز گوزینه
«نجمی» بو نحه نی یازدی سوز آخوب اؤز اؤزینه
رشتۀ نظمه دوزوب بو دُر شهواره لری
.
.
.
#اربعین_نجمی_تبریزی
#شامدن_گلدی_حسینیم_وطن_آواره_لری
#ترکی
.
✍️ #زبدةالاشعار ✍️
.
🆔: @nohe_torki
نظر دهید