اربعین
..
..
مرحوم تائب تبریزی
..
..
شامده دؤزوب دایاندیم ظلم مشرکینه قارداش
قانلی کوینگون الیمده گلدیم اربعینه قارداش
..
..
کوینگون منه اولوبدور مایه ی نوا و شیون
عطروی بیر عمر آلّام پاره پاره کوینگوندن
دلدن اودلانوب حسینیم شیونیله اوخشارام من
همدم آه و ناله دور بو زار و دلغمینه قارداش
..
..
زینبه قالوبدی سندن قانلو پیرهن نشانه
باغریما باسوب همیشه گلّم آه و الامانه
کوینگون اورک باشیندان قویمارام بیر اوزگه یانه
ورد اولوبدی قارداشیم وای زینب حزینه قارداش
..
..
قوم کین گئدنده فرصت وئرمدی بو باغریقانه
باشون اوسته ایلییدیم بیر نوای عاشقانه
آغلیاندا ظلم الیله شمر ویردی تازیانه
حسرتیم اورکده قالدی یاندی اودلی سینه قارداش
..
..
خودسری بیر اربعینی ترک قیلمادیم سنی من
سرّی وار بیر ایل یوباندیم مندن ایلمه گله سن
گلماقا بو قبره فرصت وئرمدی بیر ایلده دشمن
فرصت اولدی ایندی گلدیم کربلا یرینه قارداش
..
..
ایندی یوخدی قوم کینه الده یاخشی فرصتیم وار
عرض ائدوم سنه برادر دلده هر شکایتیم وار
سن اوزون حسین بیلورسن درد بی نهایتیم وار
دوزموشم بیر ایلده ظلم اشقیای دینه قارداش
..
..
ایندی کاش اولیدی قارداش قبروین کناری خلوت
قوللاریمی گوستریدیم ای شهنشه ولایت
نقدر دگوب گوریدون منه قمچی عداوت
قوللاریم اولوبدی نیلی ای شه مدینه قارداش
..
..
تا شهادت امرى یتدی بو دیارده تمامه
اولدی دستگیر عیالون اشقیای بدمرامه
چکنی قوم کینه عریان ناقه اوسته سوی شامه
یولدا گه دوشوب رقیّه گه قیزون سکینه قارداش
..
..
باخمادی اولوبدی زینب درد الینده خسته خولی
تازه دن بو دلغمینی ائتدی دلشکسته خولی
ظلمیله آپاردی قویدی باشووی کول اوسته خولی
پرده پرده کول اوتوردی گل کیمی جبینه قارداش
..
..
نیزه ده اوخور نه گوردوم باشون ای یارالی قرآن
ابر وش مهِ جمالون دوتموشیدی خون الوان
باشیمی او دمده ویردیم چوب محمله حسینجان
پارچالاندی باشیم اولدوم سنله هم قرینه قارداش
..
..
آل عصمتی حسینیم گتدی ظلم کوفه تنگه
کربلایه گلمین لر گلدی کوفه ایچره جنگه
بنزه دوردولر اسیر روم و دیلم و فرنگه
چوخ شماتت اولدی اوردا اهلبیت دینه قارداش
..
..
هر یره گئدوبدی باشون گون کیمی سر جداده
سایه تک اونون دالیجا دوشموشم من فتاده
گئتمیشم باشمیدا نچه قاره گونلی هر بلاده
دوزموشم جفا و ظلم فرقه ى لعینه قارداش
..
..
داد او وقتیدن حسینیم اهلبیت زار و خسته
وارد اولدی شامه عریان ناقه اوسته دست بسته
بعضی نین قوجاقدا طفلی اشگی یوزده دلشکسته
دمبدم آخاردی اشگی گل تک عارضینه قارداش
..
..
شامیده عزیز عیالون بیر خرابه یرده قالدى
آغلادی خانم بالالار شور و شین گوگه اوجالدی
بسکه قالدی آج رقیّه گل کیمی سولوب سارالدی
گوزلریندن اشک حسرت آخدی دامنینه قارداش
..
..
قوردی بزم غم بالالار گوزده اشگ دلده شیون
آه دلنشین چکردی بعضی سی یانقلی دلدن
بعضی سی دییردی عمّه دور علاج ائله آجام من
خون دل توکردی گوزدن اشک تر یرینه قارداش
..
..
یتدی عاقبت تمامه ظلم آل بو امیه
قورتولوب گلوب سلامت اهلبیت هاشمیه
گلمدی بو اربعینه حیف نازنین رقیه
ائتدی غربت اختیار اول ناتوان حزینه قارداش
..
..
سن رقیه قالماقیندان مندن ایلمه گلایه
نیلیوم اسیریدوم من امر و گردش قضایه
چوخ سُوردیم اول بلاکش قیز گلیدی کربلایه
عندلیب اولیدی بو غم غصّه گلشنینه قارداش
..
..
دور گئداخ دئدیم منیله ای بلالی گلعذاریم
سؤیلدی ایاقلاریمدا واردی عمّه جان قباریم
چوخ دُؤیوبله یورقونام من گئتماقا یوخ اختیاریم
غربت اولدی خوابگاه اول طفل نازنینه قارداش
..
..
ذكر وا وطن دلینده دوشدی دلدن اول وطن سیز
گوزلری باخوب یولا جان وئردی حسرتیله سنسیز
تاپمادیم کفن او طفله قالدی سن کیمین کفن سیز
کوینگیله اولدی مدفون آخر اول دفینه قارداش
..
..
چوخ سُویر قویا بو تائب اول مزاره روی زردی
اشكیله یووب او قبری پاک ائده غبار و گردی
زینبین دلینجه بیرده ذکر ائده بو غملی فردی
قانلو کوینگون الیمده گلدیم اربعینه قارداش
..
..
#اربعین #تائب_تبریزی #ترکی #زبدةالاشعار
نظر دهید