حالات کوچ کردن اهل بیت عصمت از شام
و رسیدن آنها به کربلا به زیارت اربعین
..
..
مرحوم صحاف تبریزی
..
..
یارب بو غم نه غمدی که دلدن توان گیدر
طاق سمایه صوت انین و فغان گیدر
..
معلوم اولان که آل علی شام شومدن
عزم حجاز ایدوب وطنه باغریقان گیدر
محمللرون تمامنون اؤرتوکلری قرا
ماتم لباسینه گینوب بانوان گیدر
..
بیربیر خانماری اوزی زینب سوار ایدوب
بو امردن تفکره کرّوبیان گیدر
..
گوردی عروس فاطمه دن یوخدی بیر خبر
آه نهانی عرش خدایه عیان گیدر
..
ویرانه دن ایشیتدی که بیر سس گلور او سس
الدن آلور قرار و دل ناتوان گیدر
..
قبر رقیّه أؤسته آچوب باشینی عروس
گویا دیر حجازه باجون باجی جان گیدر
..
یاتما خرابه ده قوری یرلرده دور گیداق
اکبر مزاری اؤسته هامی زائران گیدر
..
آسوده لقدى دور گیدیروخ بیز مدینیه
نه شمر وار بیزیله باجی نه سنان گیدر
..
نه وار یانوندا باشیوه قمچی ووران باجی
فکر ایلمه همان او شقی ساربان گیدر
..
چوخ نسگل ایلورم سنه اکبر زیارتین
شش گوشه قبری اؤسته هامی آغلیان گیدر
..
هم محملم باجی سَنیله شام یولّارین
ایندی منیله بس کیم اولور همعنان گیدر
..
زینب رقیّه قبرینی بیر باسدی باغرینا
فرمایش ایتدی دور بالا بو بیکسان گیدر
..
لنگ ایتمه کاروانی دایاندورما دور گیداخ
عزم وطن ایدوب باجون عمّون آنان گیدر
..
عمّم دیمه خرابه ده قویدی منی گیدور
سن سیز نجه بو زینب بی خانمان گیدر
..
شام اهلینون بو شامیده ظلمی تمام اولوب
ویرانه دن ایدوب هامی نقل مکان گیدر
..
ناچار آیریلوب هامى قبر رقیّه دن
بیربیر اولوب سوار او یردن چخان گیدر
..
القصّه دوشدیلر یولا اول کاروان غم
الده گوتورموش هر بیریسی بیر نشان گیدر
..
زینب الینده قارداشنون قانلو کوینگین
زهرا مزارینه آپارور ارمغان گیدر
..
دورت مین یارالی کوینگه باخدوقجه دمبدم
ایلر عذاره سیل سرشگین روان گیدر
..
اکبر عمامه سین گوتوروب لیلی حزین
گوز یاشلی سینه داغلی چکر الامان گیدر
..
دلدن سریّه قاسمنون طوی لباسینه
باخدوقجا نوعروسیله ناله کنان گیدر
..
کلثوم الینده ماتم ایچون بیر قرا علم
یوزده سرشگ حسرتی ایلر فغان گیدر
..
بیر قانلی قونداقی باسوب آغوشینه رباب
اشگی آخار عذارینه مویه کنان گیدر
..
دار شفایه عابد بیمار و مضطرب
بیت الحرام اسیری امام زمان گیدر
..
دشت بلایه یتدی اسیران بند غم
دللرده ذکر ایدر هره بیر داستان گیدر
..
بی اختیار ناقه لر اؤستن توکولدیلر
بیر شور اولوب نه فکره گلور نه گمان گیدر
..
زینب دوشندی قبر حسین اؤسته عرض ایدوب
دور گور باجون قدی نجه غمدن کمان گیدر
نولدی حسین یارالارون اوّل بُیور گوروم
یاخشى اولوبدی یا که گینه تازه قان گیدر
..
گتدیم غریب عیالوی بو توزلی قبریوه
دور سال یولا مدینیه بو کاروان گیدر
..
سندن صورا چکوبدی نلر بینوا باجون
شرح غمه دل آچسام اگر چوخ بیان گیدر
..
خولی کول استه قویدی تنور ایچره باشوی
مطبخ سرایه هاردا حسین میهمان گیدر
..
ابن زیاد مجلسی یاددان نجه چخار
دلدن جریحۀ ستم کوفیان گیدر
..
ویردی اجازه کوفنون اؤباشینه تمام
هر یرده اذن عام اولا پیر و جوان گیدر
..
بیر ایله بزمه باشی آچوق ایستدی بیزی
نامحرم ایچره گور حرم عزّ و شان گیدر
..
شرح اولسا شام محنتی بیر صبح شام اولور
فکره مقام قدسده قدّوسیان گیدر
..
قول باغلى شامه وارد اولاندا مخدّرات
گوردوم جداده قانلو باشون مهرسان گیدر
..
گوردی عجوزه نیز ده گون تک کسوک باشون
دلده اوخور کلام حق مستعان گیدر
..
بیر داش وروب یارالی باشون سالدى نطقدن
گور حشر اولونجا دلدن او ظلم نهان گیدر
..
قارداش سنون گوزوندن ایران باش آچوق نجه
بزم شرابه آل شه مؤمنان گیدر
..
قویدی باشون یزید لعین پای تختنه
هاردا گمانه قانلو باشون خیزران گیدر
..
ووردی آقاج دوداقلاریوا افتخار ایدوب
باخموب فنایه طاقت لاهوتیان گیدر
..
صحّافه قیر پاکون اگر قسمت ایله سن
زوّاریون یاننجا دوشوب نوحه خوان گیدر
..
..
#کوچ_شام #صحاف_تبریزی #ترکی #زبدةالاشعار #اربعین #اربعین_صحاف_تبریزی
نظر دهید