خروج از شام و اربعین
.
✍️ #زبدةالاشعار ✍️
.
🆔: @nohe_tork
.
.
مدهوش تبریزی
.
شام ایچره دوزدی آلعبا هر نه محنته
سالدی بنی امیه نی تشویش و وحشته
.
ظاهرده گرچی کامه یئتیمشدی اهل نار
حق اولدی لیک گون کیمی دنیایه آشکار
.
شامل اولوبدی زینبه حقین عنایتی
سیندیردی کاخ ظلمی اونون صبر و همتی
.
فتح ائیلییب اورکلری قولباغلی قهرمان
شام اهلینه حقیقت اولوب گون کیمی عیان
.
گر چی اولوبدی قدی کمان ظلم شامیدن
سیمرغ عشق آچدی قاناد چیخدی شامیدن
.
چوخدان گزیردی قلبیده کی دردینه دوا
آلمیشدی اختیارینی سودای کربلا
.
مژده گتیردی باد صبا وصل یاریدن
صبر و توان آپاردی دل بیقراریدن
.
ترک ائیلیوب دی شامی او عزتلی کاروان
بیر عده قاره پوش هاموسی مونس فغان
.
تعجیلیله گئدیردیله دیل داغلی گوزده اشک
سوغات اله جامه عشقی دی بیرده مشک
.
آلمیشدی شوق وصل هامیدان طاقت و توان
اوج ائلییوردی عرشه طرف ناله و فغان
.
موجه گلیردی آخدیقیجا چوللره فرات
اود تک توکوردی سوز و شرر دیللره فرات
.
آخدیقجا سو ائدیردی دل زینبی کباب
نهر فراته دوتدی یوزون ائیلدی خطاب
.
ای سو ندن بو نوعی گلیب سن تلاطمه
سندن اورک یارالیدی اولاد فاطمه
.
اولدی بیزه اولان آخاجاقسان نقدری آخ
یاندیر شرار هجریله بو داغلی قلبی یاخ
.
سو اولمادي آنا بالادان اولدي شرمسار
سو اوسته صودامر بالاسین ائتدیلر شکار
.
اوخ گر چي اصغری قوتاریب راحت ائیله دی
اما ربابین آرزيلارین غارت ائیله دی
.
علت ندور كي گوز داغي وئردین قوناقلارا
قسمت ندن دی اولمادین عطشان دوداقلارا
.
عباسیمی خجالت ائدوبسن رقیه دن
قان ائیلدین اورکلری قان اولمادون ندن
.
ائتدی فراته شکوه گوزی دولدی اشکیله
عباسینی خیاله سالوب پاره مشکیله
.
باخدوقجا نهر علقمه یه اتئدیلر نوا
یاندی شرار محنتیله آل مصطفا
.
باخدی فراته وای بالام ایوای دئیوب رباب
سالدی خیاله اصغری لایلای دئیوب رباب
.
آز قالدی بیرده محشر او چولده اولا عیان
باخدوقجا قتلگاهه خانیم اولدی باغریقان
.
قرخ گون قاباق دوباره دوشوبدور خیالینه
اطرافه باخدی گوزیاشی آخدی جمالینه
.
یاده سالیب نه نوعیله جان وئردی قارداشی
آخدی عذاره سیل کیمی قانلی گوزیاشی
.
باخدوقجا نینوا چولونه آرتدی محنتی
سالدی خیاله منظره قتل و غارتی
.
دوشدوقجا یاده حادثه لر آلدی صبرینی
گوزیاشلی آختاریردی او ششگوشه قبرینی
.
هر کس گزیردی یوسیفینی قعر چاهیده
قالمیشدی زینبین اورگی قتلگاهیده
.
یوز قویدولار او مهر هدایت باتان يئره
حجاج گلدي قبله عالم ياتان يئره
.
تا جلوه لندی گوزلره آمال کعبه سی
اوج ائتدی آسمانه طرف وا حسین سسی
.
وصل عالمینده یاری تاپان بیلمدی اوزون
شرح فراقه تاپمادی سوز دولدوورب گوزون
.
زینب مزاری گوردي چاتيب آرزوسينه
اول سلام ائديب حرم مشكبوسينه
.
شوق وصال سلب ائله دی اختیارینی
قارداش مزاری اوسته قویوب گول عذارینی
.
گلدي بيانه بلبل غم شرح حال ائدوب
اوچ شعبه اوخ یاراسینی اول سوال ائدوب
.
ای دین حق یولوندا ذبیحا من القفا
یاتما ایاقه دور منه خوش گلدین ائت اخا
.
هر چند کی چوخ اینجیمیشم ائتمرم گله
سالدی فلک آرامیزا بیر عومر فاصله
.
هيچ بير ديونجا من سنه بير آغليانماديم
عفو ائت يارالي ياره لرين باغليانماديم
.
قرخ گوندی آیریلقدان حسین جانه گلمیشم
سینم دولوبدی دردیله درمانه گلمیشم
.
وئر اذن تا سنه دانیشیم انقلابیدن
هم کوفه دن دئیوم همی شام خرابیدن
.
قران یولوندا بذل ائلدین باش و جانیوی
وئردون رضای حقیده خوش امتحانیوی
.
منده تلاش ائدیب هدفین زنده ائیلدیم
ظلم اهلینی همیشه سرافکنده ائیلدیم
.
آهیمله فتح ائیلمیشم شامی چیخمیشام
کفر و ستم بناسینی گوز یاشلی ییخمیشام
.
تضمین ائدم بو قانلی قیامین بقاسینی
من باشلادیم خرابه ده هیئت اساسینی
.
“درديم چوخ اولدي شاميده درمان تاپولمادي”
همدرد اولا بيزيله بير انسان تاپولمادي
.
اُولدي بالام جنازه سينه اولمادي كفن
اوز کوينگيله دفن ائیله دیم محنتيله من
.
نسگل لرين اورك باشينا يازديم آغلاديم
ويرانسراده قبرين اوزوم قازديم آغلاديم
.
بیلمم نقدری شکر ائیلیم حی داوره
زوار ائدوب بو گون منی بو با صفا یئره
.
قورتارمياندي گرچي منيم درد و محنتيم
ايكاش بو مزارون اولا بيرده قسمتيم
.
قربان اولا باجون بو مزارین صفاسینه
مدهوش اولور اورک بو دیارین صفاسینه
.
#کوچ_شام
#اربعین_محمد_هوشمند #مدهوش_تبریزی
#شام_ایچره_دوزدی_آلعبا_هر_نه_محنته
#ترکی
.
✍️ #زبدةالاشعار ✍️
.
🆔: @nohe_tork
نظر دهید