مدح و منقبت حضرت امیرالمومنین علیه السلام
..
..
مصیبی تبریزی
..
..
شاه شهان ماه مهان دور علی
رونق میقات جنان دور علی
سینه عشاقه نشان دور علی
خانه کفاری ییخان دور علی
سسله آدین مشکل آچان دور علی
..
..
گوزلرینون جلوه سی طوفان سالان
آتش عشقی ئورگه قان سالان
قامتی عالملری حیران سالان
آدی بوتون دردلره درمان سالان
جلوه منهاج زمان دور علی
سسله آدین مشکل آچان دور علی
..
..
قدّینی طوبا یارادوب کردگار
وجهینی باجا یارادوب کردگار
چشمینی شهلا یارادوب کردگار
عشقینه زهرا یارادوب کردگار
عزّت زهرایه نشان دور علی
سسله آدین مشکل آچان دور علی
..
..
قائمۀ عرش خدای جلیل
خلقت آفاق و جهانه دلیل
فرشیده مشتاقی نبیّ نبیل
عرشیده مفتون آدینا جبرئیل
عشقی ئورکلرده قالان دورعلی
سسله آدین مشکل آچان دورعلی
..
..
نیّر تابنده برج شرف
ماه مدینه ، شه ملک نجف
صولتینین جلوه سیدور لاتخف
جمله ملائک دوزولرصف به صف
چون ملکوت اهلینه جان دورعلی
سسله آدین مشکل آچان دور علی
..
..
یوخ سوزوم هرکیمسه نین آقاسی وار
نوح و خلیلیله مسیحا سی وار
باخ سوزیمه گور نه معمّاسی وار
(هانسی گروهین بئله مولاسی وار)
شیعه لره مجدی عیان دورعلی
سسله آدین مشکل آچان دورعلی
..
..
سفره سینه سائل ائدن حاتمی
صولتی حیرتده قویان عالمی
بیشۀ عدل و شرفین ضیغمی
تا بو جهان وار اسه جاق پرچمی
عدل علمین دهره ووران دور علی
سسله آدین مشکل آچان دور علی
..
..
خُلد برینون بودی پیرایه سی
نوح و خلیلین بودی همپایه سی
رزمگه معرفتین آیه سی
رُعب سالار خنجرینین سایه سی
نعره سی غوغا یارادان دور علی
سسله آدین مشکل آچان دور علی
..
..
دست کرم بخشی آچان خلقه،خوان
تیغ خمی قلب عدونی سیخان
منزلتی عرش علایه چیخان
عبدُوَدین اوغلونی آتدان ییخان
رزمگهه شیر ژیان دور علی
سسله آدین مشکل آچان دور علی
..
..
کعبه حقده بودی بت سیندیران
قلب جهانی آدی چرپیندیران
عالمه عشقین علمین ووردیران
رشتۀ کفریله نفاقی قیران
کعبه ده معراجی عیان دور علی
سسله آدین مشکل آچان دورعلی
..
..
کیمدی علی تک اولا صاحب کرم
کیمدی اونون تک وئره جانانه دم
شانینی بیرجمله ده وورام رقم
کتف رسول اللهه قویدی قدم
مجدینه تنها بو نشان دور علی
سسله آدین مشکل آچان دورعلی
..
..
اوندا کی معراجه گئدوب مصطفی
قویدی قدم عرشه حبیب خدا
مقدمینه چیخدی بوتون ماسوا
گوردی کی بیر نور گلور مطلقا
گویده ده انواری عیان دورعلی
سسله آدین مشکل آچان دورعلی
..
..
گلدی ندا خوش گلوب اهل ولا
گوردی بو سس دور اونا چوخ آشنا
محضر حقدن سوروشوب مصطفی
کیمسه سسیلن دانشیرسان خدا
سس دی سنون یا کی نشان دورعلی
سسله آدین مشکل آچان دور علی
..
..
سس گلوب ای عشق و صفا آیه سی
پاک و منزه دی خدا یوخ سسی
حیدره چون واردی علاقه ن بسی
سوزدی منیم سس دی علی نون سسی
نابغه هر دو جهان دور علی
سسله آدین مشکل آچان دور علی
..
..
گوزله « مصیّب » قلمین چرخشین
غفلت ائدوبسن گوره جاق ئوز ایشین
چپ باخا کیم حیدره پوز ارزشین
آغزینا چال شعریله سیندیر دیشین
سویله منیم جسمیمه جان دور علی
سسله آدین مشکل آچان دور علی
..
..
#حیدریه_مدح #حیدریه
#شاه_شهان_ماه_مهان_دور_علی
#هانسی_گروهین_بئله_مولاسی_وار
#مصیبی_تبریزی
#ترکی
#زبدةالاشعار
نظر دهید