علی شیعه سی ام
..
..
..
سید بشیر حسینی میانجی
..
..
..
شاکرم خالق سبحانه علی شیعه سی ام
عاشقم عترت و قرآنه علی شیعه سی ام
..
..
..
تانیورلار منی عالَمده هامی اهل ولا
اهل دین، اهل ادب، اهل دل و اهل دعا
قوی دیوم من کیمم ای شیفته ی شیرخدا!
من ولایت باغینون بلبلی ام صبح و مساء
گئتمرم اؤزگه گولوستانه علی شیعه سی ام
..
..
..
مؤمن اُول کسدی کی چوخ ایستیه جان تک وطنی
قویمییا دور و بره فتنه سالان اهرمنی
دییه حق سؤزلرینی بزم ولاده علنی
آناما قوربان اولوم شیعه بئجردوبدی منی
چاتارام قلّه ی ایمانه علی شیعه سی ام
..
..
..
سالینوب فرشیدن عرشه گؤرورم جاده ی عشق
باشی عرشه دایانار کیم اولا افتاده ی عشق
سالموشام معنوی میخانه ده سجاده ی عشق
ساقی کوثر الیندن ایچرم باده ی عشق
دییرم سرخوش و مستانه علی شیعه سی ام
..
..
..
من گرَک دلبریمین گؤرمگینه شائق اولام
شرطی وار آینه تک صاف اولالی صادق اولام
ال ایاقیندن اونون ئوپمک ایچون لایق اولام
عالم ذرّیده عهد ایلموشم عاشق اولام
باغلیام دیلدن او پیمانه علی شیعه سی ام
..
..
..
من محبّت یولونون عرضیله طولین بیلورم
ائتدیقیم هر عمَلین ردّ و قبولین بیلورم
کرَمی واردی منه آل رسولین بیلورم
هل أتی سوره سینون شأن نزولین بیلورم
آند اولا سوره ی رحمانه علی شیعه سی ام
..
..
..
بلبل عاشقدی گؤره باغیده گول یارپاقینی
عاشقم منده گؤرم سئوگیلیمن گولماقینی
یاشیل عمّامه سینی، بئلده یاشیل قورشاقینی
نجفُ الاشرفین ای دل! بیر اووج توپراقنی
وئرمرم ملک سلیمانه علی شیعه سی ام
..
..
..
دوشرم چؤل لره یار عشقینه دیوانه کیمی
چکرم تئل لرینه ال لریمی شانه کیمی
ذرّه تک اوج ائدرم مهر درخشانه کیمی
یانارام شعله ی شمع حقه پروانه کیمی
یانمارام آتش نیرانه علی شیعه سی ام
..
..
..
یوخ سؤزوم مسجده کیم،کیمسه کنشته گئده-جاق
هامی نین آخیری اوّل کی سرشته گئده جاق
وار حدیث نبَوی: شیعه بهشته گئده جاق
علی عشّاقی اورا مثل فرشته گئدجاق
گئدرم روضه ی رضوانه علی شیعه سی ام
..
..
..
بلبل عشقم و عشقین باغی اولموش چمنیم
آنا یوردوم طُوادیر، ملک نجفدیر وطنیم
بونی بیلسین هامی بدخواه اولانیم، اهرمنیم
کشتی امن ولایتده یئریم واردی منیم
دوشمرم بحریده طوفانه علی شیعه سی ام
..
..
..
نه قدَر جانیم اولا ذکر ائدرم من بو آدی
کلّ خلقتده اولانلاره بو مولا آقادی
علی بیر آدیدی کی بال کیمی چوخ واردی دادی
وار علی عشقی باشیمدا اؤدی باشیم اوجادی
اگمرم باشیمی عدوانه علی شیعه سی ام
..
..
..
ای قلم! ایله رقم معنیِ خیرُالعملی
حُبّ حیدردی یقین خیرُالعمل یوخ بدلی
رجبین اؤن اؤچی چاتدی اوجالوب نور جلی
گؤزلرین آچدی رسول اللّها اوّلجه علی
بو سؤزی نشر ائله هریانه علی شیعه سی ام
..
..
..
حوقله ذکرینی لوحین باشینا حکّ ائلیون
حرمین عکسینی نذرین آشینا حکّ ائلیون
ذوالفقار عکسینی یارین قاشینا حکّ ائلیون
سیز علی آدینی قبریم داشینا حکّ ائلیون
تا که بیلسین هامی بیگانه علی شیعه سی ام
..
..
..
گونه بنزر شه مردانین اؤزی سیزده دیون
علی یه عاشق اولوب خالق اؤزی سیزده دیون
اجنبی نین چیخا ای کاش گؤزی سیزده دیون
ای ولا اهلی منیله بو سؤزی سیزده دیون
سس سالوم عالم امكانه علی شیعه سی ام
..
..
..
موسم حج قوتاریب چاتدی وقاره حاجی لار
تا غدیر خُما یئتدیله دوباره حاجی لار
دؤندروبلر چؤلی شوریله بهاره حاجی لار
گونَشیله آیا ائتدیله نظاره حاجی لار
دئدی کیم باخدی ایکی جانه، علی شیعه ی ام
..
..
..
شیعه اُول کسدی کی جبریل امین تک یکسر
«أشهدُ أنّ علیّاً ولی الله» سؤیلر
باخ غدیر خُما گؤر چاتدی نه شأنه حیدر
الینه آلدی علی نین الینی پیغمبر
تا دییه هامّی مسلمانه، علی شیعه سی ام
..
..
..
لطف حق شامل اولان گوندی، بو گون بایرامدی
آیه سی نازل اولان گوندی، بو گون بایرامدی
دیل حقه مایل اولان گوندی، بو گون بایرامدی
دینیمیز کامل اولان گوندی، بو گون بایرامدی
دئ باخاندا گل خندانه: علی شیعه سی ام
..
..
..
احسن اُول شخصه کی ایستر بو شه محترمی
وئریلر حشریده حیدر الینه حمد علَمی
حاجتیم اولسا چاغورّام اونی چوخدور کرمی
دوشدی بیردن یادیما ایندی علی نین حرمی
باخورام اُول قیزیل ایوانه علی شیعه سی ام
..
..
..
گؤزه چکماقلیقا سُرمه کیمی بیر تُربتی وار
نه قدَر کی تانیشی وار او قدَر غربتی وار
هامی زوّاره حرمده نظر رحمتی وار
کربلا و نجفین بیر بیره چوخ نسبتی وار
نوکرم شاه شهیدانه، علی شیعه سی ام
..
..
..
خوش اونون حالینه کی سؤزلرینه گوش ائلیور
اؤزونی یاری اولان یئرده فراموش ائلیور
اونی سالسین یادا هرکیمسه کی سو نوش ائلیور
گلوری عطرِ محرّم منی مدهوش ائلیور
آغلارام سرورِ عطشانه علی شیعه سی ام
..
..
..
بودی سعی ییم کی منیم حشریده آغ اولسون اؤزوم
شرطی وار درد و غم و غصّه ی هجرانه دوؤزوم
حضرت یار گلینجه باخا یولاّره گؤزوم
چون «بشیر»م، اؤزومه گؤنده بشارتدی سؤزوم
یازیرام دفتر و دیوانه علی شیعه سی ام
..
..
..
#حیدریه_مدح #غدیریه
#شاکرم_خالق_سبحانه_علی_شیعه_سی_ام
#سیدبشیرحسینی
#ترکی
نظر دهید