منظره ی شب عاشورا وموعظه امام
.
.
.
سیفی اردبیلی
.
.
شب عاشور بلا تاپدى صفا خانه ی عشق
بزم أنس اولدی داخى قالمادی بیگانه ی عشق
فوجیلن دوره لدی شمعینی پروانه ی عشق
بیر بیر انصاره حسین درس شهامت وئردی
سوزی بی پرده دئدی رمز شهادت وئردی
.
.
بویوروب گئتدی گئدنلر قالانوز مندندی
آزدی ظلمت گئجه میز صبح ظفر روشندی
خیمه میز گرچه قرانلوقدی ولی ایمندی
دوشمیوب عشق ائوینون زیب و زری الدن اله
قورخشان قیزلارا عبّاس نگهباندی هله
.
.
دلخوشام تنده همای شرفون شهپری وار
باحیا قیزلاریمون باشدا هله معجری وار
لیلینون حالینی تئز تئز سوروشان اکبری وار
سحرون چوخ سؤورم غصّه فزا منظره سین
اصغرون قانلی قماطیله سوسوز حنجره سین
.
.
جاودانیدی بیزیم نهضتمیز دولتمیز
صُلحا قلبینی تسخیر ائلیر همتمیز
ناز دنیایه دگر بیر بو گئجه وحدتمیز
ذات هو عشقینه بذل ائتمگه جان بیزدندی
پای قرآنه آخان قرمزی قان بیزدندی
.
.
بیزی ممتاز ائلیوب دولت شورای الست
عهد ازّلدی بویانسون قانا یتمش ایکی مست
ظاهریم اولسا فنا باطنمه یوخدی شکست
عالم عشقیده وار منزلت ممتازیم
عدنیده رتبه ی شاهانه تاپار سربازیم
.
.
روز پیماندا که یار ایلدی تکلیف وفا
اَصفیا باخدى بلیّاته قدم قویدی دالا
من شهامتله دئدیم محنت عظمایه بلی
امر داداریم ایچون وعده ی اجرا وئردیم
طُرّه ی اکبریلن لوحیده امضاء وئردیم
.
.
امر اولوب عرش مواساته قمر لأزمدی
یار خلوتگهینه خون جگر لازمدی
شهدانون صفینه بیر صودامر لازمدی
قیلمادیم خم بو سؤزه همتیمون ابروسین
قول وئردیم بلشه قانه رباب آهوسین
.
.
وعده ی عشقیمه مهلت قوتاروبدور بو گئجه
دولت عمریعه ذلت قوتاروبدور بو گئجه
فجر خونینمه فرصت قوتاروبدور بو گئجه
وصلته دل تلسور جان به کف میثاقم
خیزران لبلریمی ئوپمگه چوخ مشتاقم
.
.
سفر پرخطره سیزده اولون آماده
فرصت آزدور، ایشیمیز چوخدی بو غم صحراده
صبح آچیلسون یغشون عقد اوخیوم داماده
دل و دلبر صورا دوشسونله غم هجرانه
گوندریم قاسمی اللرده حنا میدانه
.
.
گرک عاشق سوزینون الده اولا اثباتی
عشق بیر عُلقه دى روحیله قاریشمش ذاتی
هدره وئرمیون ایندی بو گوزل ساعاتی
بانوان حرمیم رخت اسارت توخوسون
کیشی لر خیمه ی تاریکده قرآن اوخوسون
.
.
قیدوب امر امامیله هامی خیمه لره
هره ئوز آهوی زیباسین آلوب زیر پره
بیلمورم من نجه گئچدی او گئجه صودامره
بلبلون ناله سی گل قلبنى ائتمشدی کباب
الى دؤشلرده سزیلداردی قرا گونلی رباب
.
.
بخت الیندن یتشوب غم منه پای سؤیلردی
گه جفای فلک پسته هرای سویلردی
چشم اصغر آخیناندا بالاوای سویلردی
هی دیردی گوزلیم دردوه یوخ منده دوا
قوری پستانیمی درناقلاما قربان بویوا
.
.
هره بیر خیمه ده مشغولیدی ناز ایلمگه
شمع پروانه ایلن سوز و گداز ایلمگه
ال دعاده بیری، بیر عدّه نماز ایلمگه
چوخیدی قصّه ی غم قصّه ی هجران بو گئجه
بورومشدی او چولی نغمه ی قرآن بو گئجه
.
.
آغ گون آیریلمشدی جمله سیه مولردن
ال گوتورمزدی بلا شعله سی تیهولردن
نه یازیم من او چادردا ملر آهولردن
بیری سویلردی عجب سولدی امامت چمنی
بیری سویلردی عمو گل عطش ئولدوردی منی
.
.
طى اولاردی فلکون گردشی بی رحمانه
تازه داماد آناسی غرقه ایدی بحرانه
گه اوغول زلفینه حسرتله ووراردی شانه
گه ئوپوب لعل لبیندن اونا سویلردی بالا
شهدادن ئوزوی همّت ائله سالما دالا
.
.
شاهیدن صبح ظفر رخصت پیکاروی آل
اول مهیّا جدله شیر قوی پنجه مثال
کفنون اولماسا طوی خلعتوی بوینوا سال
اولسا مشکل سنه دعوا زره آهنیله
عرصه ی جنگه گئدرسن بالا پیراهنیله
.
.
لب نی دن اوجالا صوت نوا خوشدی أوغول
عاشق سَرمَدیه درد و بلا خوشدی اوغول
او گوزل اللروه قانلی حنا خوشدی اوغول
عاردور مرد تولّا یاشیا رهبرسیز
زندگینون دادی اولماز سنیچون اکبرسیز
.
.
واریدی خیمه لرون منظره ی زیباسی
یوخیسوز گوزلرون اسکلمیشدی رؤیاسی
اکبرونده بؤیون اوخشاردی ملر لیلاسی
هی دیردی ننه قربان بو قدر ایلمه ناز
خیمه خلوتدی گل اگلش دانشاق ایندی بیر از
.
.
اوغول اون سگّز ایلون سود گرانمایه سی سن
منیم اقبال ائویمون زینت و پیرایه سی سن
الیمون محکم عصاسی باشیمون سایه سی سن
ائتمشم من سنی پرورده جگر قانمیله
گل سیلوم طرّه لروندن توزی مژگانمیله
.
.
یاشیل عمّامه وی آچ باغلا بیر آئینیه باخ
فلکه لعنت اوخی کینه ی دیرینیه باخ
درد هجرانوه باخ منده یانان سینیه باخ
صبحه جن گوز قاباقیندان اوزاقا گئتمه گوزوم
دؤزدی هاجر غم اسماعیله گور منده دؤزوم
.
.
ولى هاجر دگلم ضعفیمی بیگانه گوره
دؤزرم محنتوه حرمت جانانه گوره
سنی قربان یولا سالّام بالا قرآنه گوره
قویمارام عجزیله دشمن گؤره بو چولده منی
ئوز الیملن گوزلیم بوینوا سالّام کفنی
.
.
نقل ائدوب پیر خرد ابن مظاهر بو سؤزی
عدل و دادون دیلی لالیدی یومولمشدی گوزی
دولانوب خیمه ی احراری گودردیم گونوزی
دوشدی سیریم آقامون خیمه ی شاهانه سینه
مست اولوب روحیم اونون سؤیملی قرآن سسینه
.
.
جذب ائدوب عقلیمی کلمات خدا لحن حجاز
باب رحمتده دایاندیم الى قوینندا بیر آز
مختصر کئچدی نه گوردوم اوجالور سوزو گداز
یایدی اود پهنه ی دنیایه حسینون نفسی
قوزانوب خیمه سرادن فلکه ناله سسی
.
.
آه مولا دیه سن داغ دل لاله ایدی
یا که اسپهر غمه گورملی بیر هاله ایدی
بیر خانمدا او گوزل سیّده هم ناله ایدی
گوش جان وئردیم او غملی سسه تاب و تبیلن
دئدیم حتماً غم هجران دانشور زینبیلن
.
.
کنجکاو اولدوم او دم تا که بیلم مسئله نی
دل تَلَسدی گوره اوضاع بکانی علنی
اذن دیدار آلوب عرض ایلدیم عفو ایله منی
نیه بو ناله سنون خیمووه حاکمدی آقا
سنه هم ناله اولان غملی خانم کیمدی آقا
.
.
بیلورم غرق بلیات و غم و بلواسن
ناله شایسته دگل شأنوه سن دریاسن
خیمه خلوتدی حبیبیم گورورم تنهاسن
بو قوجا نوکروون روحیده قرباندی سنه
اوره گیم چوخ سیخلوب دردوی فاش ایله منه
.
.
قیلدی فرمایش حسین سید و سالار جنان
ای قوجا همدل و رازیم بئله اولما نگران
واریدی خیمه ی خلوتلده منیم بیر مهمان
غملی ساعتده منه مونس غم گلمیشیدی
اللری بئلده اورک داغلى ننم گلمیشیدی
.
.
درد و غم بلبلی قونمشدی پریشان چمنه
همدم اولدی نچه لحظه بو جلای وطنه
آیریلان وقتیده عبّاسیمی تاپشوردی منه
چوخ دعا ایله دئدی قولّارینا پرچمینه
قویما افسوس ائلیه بیرده ئوگیلیک غمینه
.
.
.
#شب_عاشورا #سیفی_اردبیلی
#شب_عاشور_بلا_تاپدى_صفا_خانه_عشق
#ترکی
#زبدةالاشعار
نظر دهید