کوفه
.
✍️ زبدة الاشعار ✍️
?: @nohe_torki
.
مرحوم حسینی سعدی زمان
.
شمس وحدت بو گئجه قارداش ایدوب هاردا غروب
گورورم نیزه ده گون صورتیوه کول اوتوروب
.
نخلۀ طور ایلیوب نیزه باشین نورون عیان
معنی سرّ اَنَا اللهی ایدور خلقه بیان
هانی موسی اَرِنی لفظینه لَن صوتین آلان
گوره عیسایه ویرن دم سرِ دار اوسته دوروب
.
بلشوبدور کُله باشون، باشیمه کُل اَلَنوب
بو باشوندور باجون اُلسون بیله قانه بَلَنوب
بدر کاملدی سیه ابریله یا پرده لَنوب
گوندی یا نیزه ده بو محشر کبرادی قوروب
.
کوفه نین شهری حسین عرصۀ محشردی مگر
قیزلارون شیون ایدر نالۀ واغَوث چکر
هامی محشر کیمی اوز حالینه گوز یاشی توکر
محشر اولموب نیه بس، باشینه گون کُل سوووروب
.
بیر به بیر برج بلانی دولانوب ماه وفا
اوز خسوفین یتوروب باشه، تاپوب یاخشی صفا
باشون اون دورت گئجه لیق آیدی، ایدوب کُلده خفا
شهدا باشلاری آی دوره سینه هاله ووروب
.
کیمی حیران دولانور ایلوری بو وضعه نظر
کیمی باخدوقجا گُلر زینبه هم طعنه ایدر
ظلم سازنده و بازنده سالوب قلبه شرر
بو مُغنّی لر آلوب اللرده اسباب طروب
.
قان دولان گوزلرون آچ زینبه بیر ایله نگاه
گورنه عشقونده اسیرم سوزیمه دلده گواه
گوزده کی قانلی گوزوم یاشیدی، قلبیمده کی آه
دولودور ناله ایله نی کیمی بو عرق و اُروب
.
باش آچوخ عترتیوه گرچه باخور قوم شرور
اهل ظلماته محال امریدی مکشوف اولا نور
باخماسونلار بیزه باشون اودی کیم مصحف اوخور
گوره بیلمزله بیزی باشون ایدوب جذبِ قلوب
.
گیچون اوز ماملکوندن ره جاناندا تمام
سنیله تاپدی شرف مذهب مذهب پاک اسلام
ویردون اوز قانیویله شمس حقه جلوۀ تامّ
حشره تک ایتمز همین جلوه ده گون بیرده غروب
.
سر عیسایه سالوبدور بو گئجه سایه باشون
بازدید ایتماقا قصد ایلیوب عیسایه باشون
کعبه دن عازم اولوب سمت کلیسایه باشون
راهب ارشادینه عیسی سنی مهمان چاقوروب
.
ای «حسینی» بو کلامی سن ایدن وقته رقم
سانما اوز باشینه یازدی بو متین شعری قلم
باطناً روح قُدُس ویردی سنه مطلق دم
ظاهراً طبعیوی بو قافیۀ تنگ یوروب
.
#سبک_یارالی_جان_یارالی … بیش از 4 سبک
.
#کوفه
#شمس_وحدت_بو_گیجه_قارداش_ایدوب_هاردا_غروب
#سعدی_زمان
#لمعات_حسینی ص 317
#ترکی
.
✍️ #زبدةالاشعار ✍️
?: @nohe_torki
نظر دهید