حالات شهادت پسران حضرت مسلم (ع)
.
✍️ #زبدةالاشعار ✍️
.
🆔: @nohe_torki
.
علومی تبریزی
.
شورش سالار عالملره غوغاسی یتیمون
پایانه یتیشمز غم عظماسی یتیمون
.
سیلمز گوزونون یاشینی بیر کیمسه یوزوندن
آغلار گوزی تاریک اولی دنیاسی یتیمون
.
دوشسه یولی بیر گلشنه گلمز یوزی هرگز
اولماز چمن عیشه تماشاسی یتیمون
.
اوخشار او قانادسیز قوشا بیر گوشه ده تنها
قان آغلادار انسانلاری سیماسی یتیمون
.
گلزار حیاتنده سولار نخل امیدی
درد و غم اولار مونس و همتاسی یتیمون
.
نسگللری ظاهر اولی مد نظرونده
قلبنده قالار میل و تمناسی یتیمون
.
دریای غمه غوطه ویرار هر سحر آخشام
درهم اولی آرایش اعضاسی یتیمون
.
خلوتده دیر درد و دلین آهیله دائم
شوریله دولار منزل و مأواسی یتیمون
.
چوخلاری یتیم اولدی بو دنیای فناده
چوخ یرده اوجالدی گویه غوغاسی یتیمون
.
اما بیریسی مسلمون اولادینه یتمز
شاهددی بونا خالق یکتاسی یتیمون
.
.
مسلم یتشوب قتله اولار اولدولا مایوس
ظلمیله زیاد اوغلی دوتوب ایلدی محبوس
.
.
ایلردیله زندانیده خلوت گجه گوندوز
باشلاردیلا خلوتده عبادت گجه گوندوز
.
مسلم آدی گه دلده یوزه گوز یاشی جاری
ایلردیله محبسده قیامت گجه گوندوز
.
گاهی آنا آغوشنی گه ملک وطندن
دائم دیوب آغلاردولا مدت گجه گوندوز
.
ایستردیله بیرده یته لر دامن وصله
آغلاردیلا دللرده بو حسرت گجه گوندوز
.
کیمدور ویره سس سسلرینه محبس غمده
کیمدور اولارا بیر ایده خدمت گجه گوندوز
.
محدودی دی چوخ آب و طعام اونلارا دائم
ائتمشدیلر افغانه قناعت گجه گوندوز
.
گه بیر بیره درد دل ایدردی ایکی قارداش
باشلاردیلا گه ذکر مصیبت گجه گوندوز
.
محتاجیدیلر فرشه چراغه او مکاندا
بیر باش قویالار بالشه راحت گجه گوندوز
.
ابراهیمه گاهی باخوب حسرتله محمد
غمدن اونا ایلردی شکایت گجه گوندوز
.
بیر مدت او زندانیده قالدی ایکی قارداشی
وقت اولدی یته باشه او مدّت گجه گوندوز
.
.
زندانه گلن وقتده مأمور ایکی قارداش
بیر گون اتگین دوتدولا چوخ توكدوله قایناش
.
.
فرمایش ایدوبلر شه ابراری تانورسان
پیغمبر حق احمد مختاری تانورسان
.
اسلامیدن اولسان تانوسان صاحب دینی
واضح دی گوراخ عترت اطهاری تانورسان
.
یا شیخ بیان ایتگله داماد رسولی
سلطان نجف حیدر کراری تانورسان
.
محراب عبادتده او شه قانه بویاندی
آخر او ولیّ حق داداری تانورسان
.
یاندی قاپوسی ظلیمله سقط اولدی بالاسی
طاها قزی زهرای دل افکاری تانورسان
.
زهرادی شفاعت ایدجاق روز قیامت
افسرده دل او دیده سی خونباری تانورسان
.
مسموم اولان آخر ستمیله اوز ایونده
یعنی حسن اول میر وفاداری تانورسان
.
آیا تانوسان کرب و بلا شاهی حسینی
یاقارداشی عباس علمداری تانورسان
.
ویرانه قالان کوفه دی ظلمیله کومک سیز
قانه بو یانان مسلم سرداری تانورسان
.
بیز مسلمون اولادیوخ آخر بیزه رحم ایت
گر مسلم بی مونس و بی یاری تانورسان
.
.
تا مطلبی بیلدی باش آچوب ایلدی افغان
عرض ایتدی بو گوز یاشوزا جانم اولا قربان
.
.
ای مسلم آقامون ایکی نورسته بالاسی
بو روسیهی عفو ایلین واردی خطاسی
.
آز آغلیون ایمدی ایدرم من سیزی آزاد
بو مهله کدن جان قوتارون چوخدی خطاسی
.
من مرد مسلمانم اوزوم شیعۀ مولا
شاهددی بونا مسلمون اگنیمده لباسی
.
تا وقت غروبه کیمی مشکور وفادار
صبر ایلدی قلبینده غمی دلده نواسی
.
شام اولدی گلوب ایتدی ایکی بیکسی آزاد
سالدى یولا وار بیلدی گوزی یولدا آناسی
.
گوزیاشلو یولا دوشدوله ویرمیشدی نشانه
دللرده ولی دشمن بیرحم هراسی
.
یول ردّی ایتوب اولدی قرانلوق او بیابان
شهزاده لرین چخدی گویه وا ابتاسی
.
صاقدان صولا صولدان صاقا حیران دولانوبلار
وحشت لی بیابانی دوتوب ناله صداسی
.
تا صبحه کمی گزدیله صبح اولدی گوروبلر
ویرانه قالان کوفه دی وار غملو بناسی
.
بیر نخله ایکی خسته پناهنده اولوبلار
یارب نه ایمش دهرده بو کینه اساسی
.
.
بیر کوزه ایله گلدی کنیزی اورا ناگاه
گوردی ایکی شهزاده سر نخلده چون ماه
.
.
سویلوب او ایکی بیکس و مه طلعته کیمسوز
سالدوز منى بو حالده چوخ حیرته کیمسوز
.
ترک ایله موسوز جنتی دنیایه گلوبسوز
سیز حور و ملک سیز دل آچون صحبته کیمسوز
.
انسانسوز اگر مطلبیزی ایلیون اظهار
آز آهیله دنیانی سالون ظلمته کیمسوز
.
هانسی چمنین سیز گلی سیز من سیزه قربان
کیملر سالوب آخر سیزی بو زحمته کیمسوز
.
چوخ کوفۀ ویرانیه حسرتله باخورسوز
باعث ندی آخر بو قدر وحشته کیمسوز
.
کیم آیری سالوب سیزلری بیله وطنوزدن
یوخ سیزده توان درد و غم و محنته کیمسوز
.
ایکاش آناز ایمدی گلوب بوردا باخیدی
بو زلف پریشانوزا بو صورته کیمسوز
.
وار اهل حجازه گورورم سیزده شباهت
تقدیر قضا ایمدی سالوب غربته کیمسوز
.
مندن سیزه حاشا یته آزار و اذیت
معلومیدی حالوز من بی طاقته کیمسوز
.
حالوزندی ایندی منی بیردم ایدون آگاه
دلدن یانورام سیزده کی بو حالته کیمسوز
.
.
تا گوردوله بو مهر و فانی ایکی قارداش
غربت اثر ایتدی ایکیسی توکدوله قایناش
.
.
فرمایش ایدوبلر بیزی خوار ایتدی زمانه
تیر ستمه سینه میزی قیلدی نشانه
.
پیغمبره وار نسبتیمیز اهل حجازوخ
بوردا دل پیغمبری دوندردیله قانه
.
بیز مسلمون اولادی گل باغ عقیلوخ
دوشدوخ بو ولایتده ولی جور خزانه
.
ئولدی آتامیز اولمادی بیر کیمسه هوادار
گزدیردی اجل پیکی بیزی خانه به خانه
.
آخر یریمز گوشۀ زندانیدی مدت
چخدوخ که گیداخ یثربه گلدوخ بو مکانه
.
صیاد ستمکارین الیندن ولی بیر آن
گوز یاشیمیز اولموش بیله رخساره روانه
.
القصّه اولار کیمدی کنیز اولدی خبر دار
مسلم غمینی یاده سالوب گلدی فغانه
.
عرض ایتدی گلون ای سیزه قربان اولا جانیم
آز دودۀ آهیله چکون پرده جهانه
.
من گرچه کنیزم ولی خاتونمی گورسوز
حرمتله چکر باشوزا ال زلفوزه شانه
.
قاتل ایوینه چکدی ایکی خسته و زاری
معناده بلا خامه سی دوشدی جریانه
.
.
خوشحالیدی دلدن که ایدر مسلمه خدمت
خاتوننه سرعتله گیدوب ویردی بشارت
.
.
تیز گل بودم ایت صورت جانانه تماشا
درگاه خدادن یتن احسانه تماشا
.
مدّتدی دوتوبسان آقامز مسلمه ماتم
چوخ ایله مشم سندہ کی افغانه تماشا
.
گتدیم ایکی اوغلانلارین ایندی سنه مهمان
دور ایت بو ایکی غصّه لی مهمانه تماشا
.
صورتده بیری بنذری مهره بیری ماهه
گل مهریله ایت ماه درخشانه تماشا
.
صحبت لری گل سوزلری گل اوزلری گلدی
بیر گلشنه باخ ایله گلستانه تماشا
.
اما بو گلستانیده آثار خزان وار
ایلولّه فقط آفت دورانه تماشا
.
سرعتله چخوب صحنه باخوب بیلمدی ایلور
شکل ملکه یارخ انسانه تماشا
.
اوّل دولانوب باشلارینا غملرین آلدى
دقتله ایدوب دیدۀ گریانه تماشا
.
گیسولرینه شانه ویروب آغلادی یاندی
ایتدوقجه او گیسوی پریشانه تماشا
.
اطعام ایلدی هر ایکی شهزاده نی ایله
عورتده اولان قوۀ ایمانه تماشا
.
.
شهزاده لر آسوده دولاندی گجه گلدی
حارث او ایوین صاحبی گلدی نجه گلدی
.
.
یارب او گجه حارث ائوینده نلر اولدی
مشغول عزا بو غمه خیرالبشر اولدی
.
ارواح رُسُل شوره گلوب جور و جفادن
یانمش شرر محنته هر خشک و تر اولدی
.
گئتدی یوخیه غفلتیله حارث بیدین
فکر ایتدی گونوز چکدوقی زحمت هدر اولدی
.
یاتدی ایکی قارداش دیمه راحت او مکاندا
راحتلوخ او بیکسلره چوخ مختصر اولدی
.
بیردن اویانوب هر ایکیسی شوره گلوبلر
سویلردی او دم بیر بیره وقت سفر اولدی
.
قاتل ایوینی تا بابا وای ناله سی دوتدی
حارث اویانوب مسئله دن باخبر اولدی
.
دوردی ایاقا دوتدی ایکی غنچه نازی
نام آهوی حرم توش قضا و قدر اولدی
.
شهزاده لره جرعتیله ظلم الین آچدی
معناده خانم فاطمه خونین جگر اولدی
.
اوز قدرتینی ویردی نشان عاجز اوشاقه
گلزار شرف خار جفایه سپر اولدی
.
بیر بندیله هر ایکی گلی باغلادی حارث
غم چولقادی دنیا یوزینی تا سحر اولدی
.
.
دوردی او زنازاده سالوب کونه شراره
چکدی اوز ایویندن ایکسی خونباری کناره
.
.
بیر قافله دوشدی یولا گوز یاشلی تمامی
نه رهبر و ترتیبی نه وار نظم و نظامی
.
باشدا ایکی شهزاده گیدور قول قولا باغلى
قاتل اولارین آردیجه وار الده حسامی
.
صاقدا توکوری اشگ بصر حارثین اوغلی
صولدا الوری گوز یاشی رخساره غلامی
.
آردنجا او جمعین سورونور بیر خانم عورت
توپراق سؤورور باشنه یوخ ظلمه دوامی
.
یپراق کیمی تیترردی ایکی طایر بسته
معلومیدی چون قاتلین البته مرامی
.
سویلردیله ئولدورمه بیزی ظلمیله حارث
سال یادیوه بیر محکمۀ روز قیامی
.
دنیا مالیدی قصدین اگر ائتمه جنایت
سات قول آدینا پوزما بو ترتیب و نظامی
.
سویلردیله گه زنده آپار ابن زیاده
آل جایزه آغلاتما داخی خیر الانامی
.
یوخ گوردوله قلبنده اونون رحم و مروت
یاد ایتدیله آخر گنه خلّاق کرامی
.
اذن آلدولا مشغول نماز اولدولا باهم
یوز سجده ده حقه بو اولوب عرض و سلامی
.
.
یارب گوروسن بو ایکی بی یار و پناهی
بو باره ده ایندی اوزین حکم ایله الهی
.
.
نفرین آدین حارث ایشیدوب تاپدی جسارت
اتمام نمازه او دنی ویرمدی فرصت
.
شهزاده لرین باشلارینی کسدی غضبناک
افلاکی سالوب لرزیه ناگه او جنایت
.
آتدی سویا گل جسملرین حارث بیدین
بو نکته نی #هندی ایلیوب یاخشی کتابت
.
(گلدی سو یوزونده ایکیسی قول بویون اولدی) (1)
یاندردی دل عالمی بو غملو عبارت
.
سرعتله ایکی قانلو باشی ابن زیاده
حارث آپاروب تا آلا انعامیله خلعت
.
تا مجلسه یتدی او کسیک باشلار الینده
اول منظره دن منقلب اولدی او جماعت
.
مجلسده زیاد اوغلودا اولدى متوحّش
یوز حارثه دوتدی دیدی ای کان قساوت
.
ظالم بولاری هاردا دوتوب قتله یتوردون
بیر بیر منه بو واقعه نی ایله حکایت
.
تاپدیم دیدی من بو ایکی طفلی اوز ایومدن
چکدیم سو کنارنده ایدم امره اطاعت
.
قتله یتورنده منه چوخ ایتدوله الحاح
ویردیم ولی آخرده نماز ائتماقا مهلت
.
گوردوم که منی سجده ده نفرین ایلیولر
ئولدوردوم او دور هر ایکیسین منده او ساعت
.
.
بو سوزده زیاده اوغلى دوروب اولدی پریشان
ویردی او شقینون او زمان قتلنه فرمان
.
.
حضّاریدن اولدم بیری تیز دوردی ایاقه
سرعتله دو توب حارثی باخدی صول و صاقه
.
مجلسدن ایدوب خارج او بی رحم و شقینی
منظورینی اعلان ایلدی اهل عراقه
.
سسلردی گلون ایلیون ای قوم تماشا
ظلم و ستمه کینه بو جور و بونفاقه
.
قتله یتوروب بو ایکی شهزاده نی حارث
رحم ایلمیوب بیردم ایکی خرده اوشاقه
.
کیم ئولدورر عالمده قوناقین اؤز ایونده
بیر بیله ستم کیم ایدر عالمده قوناقه
.
تف آتدیلا لعنت دیدیله حارثه مردم
تا گوردوله سالمش ایکی مه رونی محاقه
.
قتله یتوروب حارثی جسمون اودا چکدی
هر چند که مشگل اولا بیر چاره فراقه
.
گل جسملرین دوتدی سودان قبره قویولدى
زوار گورر قبری لرین گتسه عراقه
.
یارب او گوزل قبرلری ایلرم حسرت
وار قلب علومیده همیشه بوعلاقه
.
(1) متن کامل شعر مرحوم #هندی_تبریزی در هشتک زیر
#پیغمبره_حارث_بلوسن_نسبتیمیز_وار
.
#طفلان_مسلم #علومی_تبریزی
#شورش_سالار_عالملره_غوغاسی_یتیمون
#ترکی
.
✍️ #زبدةالاشعار ✍️
.
🆔: @nohe_torki
نظر دهید