حالات حضرت زهرا (س)
..
..
بلال فصیحی زاد
تضمین از مرحوم حسینی سعدی زمان
..
..
آز عمریده چوخ اولوبدی بلاسی زهرانون
ساغالمیاندی اؤرکده یاراسی زهرانون
تاپولمیاندی جهاندا دواسی زهرانون
((او گون که گئتدی الیندن آتاسی زهرانون
اوجالدی گوگلره آه و نواسی زهرانون ))
..
..
جهاندا گورمدی هیچ بیر صفا او کنز وفا
اولوب زمانه ده چوخ بینوا او کنز وفا
گیوبدی اگنینه رخت عزا او کنز وفا
((بلالی باشینه سالدی قرا او کنز وفا
بلایه سالدی جهانی بلاسی زهرانون))
..
..
فدا اولوم من اونون دلده کی مصیبتینه
نثار جان ائلیوب قلبینون جراحتینه
ئولونجه وار یری قان آغلاسام بو محنتینه
((یازوب قضا قلمی بیر خبر شهادتینه
اولوب آتا ئولومی مبتداسی زهرانون))
..
..
آتا غمینده او گون که اوجالدی افغانی
گل عارضینه آخوب اشگ چشم گریانی
معذّب ایلدیلر گور ننوعی زهرانی
((الینده بیعتی عنوان ائدوب گلوب ثانی
دندی گرک گنده الدن اساسی زهرانون ))
..
..
چکوبدی نقشه نی ثانی اعانته گلسون
امامتون قاپوسوندا جسارته گلسون
او ظالمی ایکی دنیاده لعنته گلسون
((دئدی بتوله عم اوغلون دی بیعته گلسون
حزین سسیله اوجالدی صداسی زهرانون ))
..
..
جواب وئردی خانیم حقه بیز طرفداروک
منافقینون الیندن همیشه بیزاروک
ائدوبدی رحلت آتام بی معین و بی یاروک
((بویوردی ال گوتور اینجیتمه بیز عزاداروک
هنوز تازه ئولوب مقتداسی زهرانون ))
..
..
او خصم دین دئدی که من عنادیده دورّام
حقیقتی آتارام باب حقّه اود ویرّام
على عداوتینه قانیوه بویاندیرّام
((عناده دوشدی دئدی آچماسون من اود ویرّام
بو سوزده آرتدی فغان بکاسی زهرانون ))
..
..
خانم بویوردی گل ائتمه دگرگون احوالیم
عداوت ایلمز عالمده عقلیدن سالیم
آتام گئدوبدور الیمدن سینوب پر و بالیم
((سنه من امر ائدورم بیل بو مطلبی ظالیم
رضای حقّدی مطلق رضاسی زهرانون ))
..
..
دئدی جماعته ثانی مرامیمه یتورون
شرار محنتی سیز اودلی قلبیدن گوتورون
اؤرک یارامی کومک ایلیون بو گون بیتورون
((اوتانمادی او دنی سسلدی اودون گتورون
گرک بو گون یانا دولتسراسی زهرانون ))
..
..
تعجبم بو مسلمان نجه مسلماندی
چکوبدی حقدن الین دینی، قرآنی داندی
بیلوردی حضرت زهرانی نور یزداندی
((ویروبدی اود ملک اذن ایستین قاپی یاندی
ائشیتدی فضه گلور بو صداسی زهرانون((
..
..
نه وار باجیم نه آنا قارداش حالیمی بیلسون
نه وار آتام گوزومون یاشینی گلوب سیلسون
نه چاره ایلیوم الله بو قلب دینجلسون
((دایانما فضّه خبر وئر عم اوغلوما گلسون
شهید اولوب ستمیله بالاسی زهرانون ))
..
..
بلالی فاطمه نون محنتینده دل کدرم
غم و ملالینه دائم گوزوم یاشین الرم
آدی دلیمده دی دردی اؤرکده دربدرم
((نه ظلم اولوب دئمرم بو قدر که عرض ائدرم
ئولونجه سینه ده قالدی یاراسی زهرانون((
..
..
خلاصه عرض ائدورم تا کلامیم اولمیا طول
جهاندا خوش گونه حسرت قالوبدی آل رسول
زمانه قدریلرین ایلیوبدی چوخ مجهول
((همین او صدمه اولوب علت وفات بتول
دگول بیانه گلن ماجراسی زهرانون))
..
..
بو ثانی اوّلِ ظلمون که تخمینی اکدی
شرار محنتی زهرانون اوستونه توکدی
باتوبدی قلبینه مسمار قلبینی سوکدی
((جوانلقیندا قدین بار درد و غم بوکدی
آغاردی باشداکی زلفی قراسی زهرانون))
..
..
دل مبارکینه بسکه دولدی درد و الم
گئجه گونوز غمی ایلردی حالینی برهم
گل عارضینه آخاردی سرشگی چون شبنم
((اریتدی جسمینی تشریح محض ایلدی غم
پوزولدی نقشه سی قالدی نماسی زهرانون ))
..
..
اولجه بو خانیمون چون آناسی ئولمیشدی
آنا فراقی دلین اوخ مثالی بؤلمیشدی
مصیبتون اثریندن خانیم کیچیلمیشدی
((حیات عاریه دن ایله تنگه گلمیشدی
فقط بیر ئولمگیدی مدعاسی زهرانون))
..
موحّدیدی ائدردی همیشه حمد و ثنا
بیر آز نمازه قالاندا خانیم اوخوردی دعا
سرشگ ترله قیلاردی نمازینی زهرا
((دیردی سجده ده ریحانۀ رسول خدا
وفاتینی یاخون ائت ای خداسی زهرانون))
..
..
دیوب دعاسینه سکّان نه فلک آمین
نمازیدن صورا دلدن خانیم اولوردی غمین
دیردی قاره گون ائتدی منی بو فرقۀ کین
((الهی قابض الارواحی یولّا تئز گلسین
که استجابته یتدى دعاسی زهرانون))
..
..
اورگی ضعف ائلدی غفلتاً اولوب بیهوش
چراغ عمری اودم آز قالوب اولا خاموش
دوباره حاله گلوب خون دل ائدو بدور جوش
((یاخونلاشوب اجلی اولدی بستری ناخوش
گلوبدی بیر گون ائوه دلرباسی زهرانون ))
..
..
مشاهده ائلدی فاطمه دوشوب درده
سولوبدی گل کیمی رنگی اولوبدی پژمرده
وئروبدی طاقتین الدن یاتوبدی بسترده
((گوروب بتول یاتوب رو به قبله افسرده
کسوب علاقه بدندن قواسی زهرانون ))
..
..
باخوبدی همسرینون حالینه ائدوب افغان
اورگی شانه کیمی اولدی غصه دن شانشان
اوتوردی فاطمه نون باشی اوسته شاه جهان
((دئدی گوز آچ اولوم آغلار گوزوه من قربان
گوروب که گلمدی اصلا نداسی زهرانون ))
..
..
اگر سو ایچمه سه گلشن سولار آچان گللر
گله باخاندا گلور آه و زاره بلبل لر
سولان گلونی اودم سسلدی شه محشر
((دئدی دوباره دور ای یادگار پیغمبر
گوروب که دینمگینه وار بناسی زهرانون ))
..
..
باخوبدی فاطمه نون حالینه شه دو سرا
گوروب که وار نفسی طاقتی گئدوب امّا
چاغوردی آچ گوزووی رحم ائله بالالاروا
((اؤرکلنوب دئدی آخر عم اوغلووام زهرا
بو سوزده جوشه گلوبدور وفاسی زهرانون((
..
..
جواب وئردی خانیم روحی خسته بیر اگلش
فلک ائدوبدی منی دل شکسته بیر اگلش
هجوم ائدور منه غم دسته دسته بیر اگلش
((آچوب گوزون دئدی گل باشیم اوسته بیر اگلش
عم اوغلى یاعلی وار التجاسی زهرانون))
..
..
اگرچه چوخدی غمون غملرون اوزوم بیلورم
جان اوسته تیر غمونله اورگیمی دلورم
داخی بلالر الیندن عم اوغلی دینجلورم
((یاخونلاشوب حسنینیم یتیم اولا ئولورم
واریمدی نچّه سوز ای مه لقاسی زهرانون ))
..
..
وصیّتیمه عمل ای شهنشه زمن ائت
قبول عرض ائله جان اوسته راحت هر ندن ائت
خصوص وئر ایشه انجام مرامیمی علن ائت
((ازل بو دور گئجه وئر غسلومی گئجه کفن ائت
بودور اؤرکده کی درده دواسی زهرانون ))
..
..
اول منی ویران اشخاصی قویما گلسونلر
سنی اوتاندیران اشخاصی قویما گلسونلر
بو قلبی سیندیران اشخاصی قویما گلسونلر
((قاپومی یاندیران اشخاصی قویما گلسونلر
اولاردی علت رنج و عناسی زهرانون ))
..
..
بیزیله ائتمدی سازش اگرچه چرخ کهن
آیردی دشمن الیله منی بو گون سندن
ئولورم ایله حلال اولسا هر قصور مندن
((ایکیمجی عورت اگر آلسون آل امامه نی سن
او دور محبی بو غم آشناسی زهرانون((
..
..
امام سن، سن اوزون ایش گلوب قباقه بئله
ائشیت عرایضیمی ایلمه اماندی گله
یتیم اوشاقلاریمون قلبینی گتورسون اله
((سینیقدی زینبیمون قلبی چوخ نوازش ائله
بو سوزده وار سنه چوخ التجاسی زهرانون ))
..
..
آچاندا هر بیری من سیز باشین تسلّا وئر
باجی یانیندا چاغور قارداشین تسلّا وئر
عذاره قویما توکه قانیاشین تسلّا وئر
((حسن گر آغلاسا سیل گوز یاشین تسلّا وئر
ملول قویما اولا مجتباسی زهرانون ))
..
..
کلام ختم رُسُلدی اونون روایتیدور
حسینُ مِنّى و أنا من حسین عبارتیدور
چکیدۀ او کلامون بو سوز اشارتیدور
((خصوص اوغلوم حسین جدّینون امانتیدور
اودور گوزونده عم اوغلی ضیاسی زهرانون((
..
بو لحظه لحظۀ عمریم منه غنیمت اولور
نفس آلوب وئرورم سینه مه مشقت اولور
آنا بالا آراسیندا گوزل محبت اولور
((حسینیم آغلاسا گر روحیمه اذیت اولور
چیخار سپهره فغان و بکاسی زهرانون ))
..
..
عم اوغلی گورمیشوک از بسکه خصم دین …
ویروبدی قلبیمیزه ظلمیله بلالی داشین
توکوبدی چشمۀ چشمیم عذاره قانلی یاشین
((ائشیتمیشم بو حسینون سوسوز کسلّه باشین
فزون اولور غم بی منتهاسی زهرانون ))
..
..
جان اوسته من بالامون غملریله در به درم
بلا چولونده بیلورسن او گون کی گون نئدرم
اوغول اوغول دیرم نعشی اوستونه گئدرم
((حسین قانین آغاران زلفیمه خضاب ائدرم
جهانه شور سالور قان حناسی زهرانون ))
..
..
عُمور کجاوه سی سرعتله گلدی ایل کئچدی
سو اولدی داغداکی قارلار مثالی سئل کئچدی
قرا هوروکلره آغ رشته تل به تل کئچدی
((بتول رحلت ائدوب آی دولاندی ایل کئچدی
حضوره گلدی بو لفظ خفاسی زهرانون))
..
..
اولار که عمریده بیلمز مکان نیک و بدی
محالیدور که آییرسون حریریلن نمدی
شریح او گون که دانوب حىّ قادر و احدى
((کسیلدی باشی حسینون سویولدی گل جسدی
آلوب قرارینی شمرون جفاسی زهرانون))
..
..
گونوز کئچوبدی گئجه گلدی ظلمت اولدی عیان
دوشوبدی یان یانا باشسیز جنازه لر عریان
او چولده قویمادی دشمن جفاده بیر نقصان
((گلوب حسین یانینا ساربان بی ایمان
سولوبدی گوردی گل باصفاسی زهرانون ))
..
..
گلنده گلشنه بلبل بیلورسوز هیچ نیلر
باخار آچان گله خوشحال اولوب اوپر ایگلر
سولان زماندا گلی دلدن آه و زار ایلر
((او ظالم ایلدی بیر ظلم تتردى یرلر
عمامه سین یره ویردی آتاسی زهرانون ))
..
..
یازوب دوبیت «حسینی» ائدوبدی داد و انین
«فصیحی» هر اوخیاندا بو شعری اولدی غمین
آخا آخا گوزونون یاشی ایلدی تضمین
ائدوب «حسینیه» چوخ جور و ظلم بیر بی دین
آل انتقامین اوزون ای خداسی زهرانون
..
..
..
#فاطمیه #فصیحی #فاطمیه_شهادت #ترکی #سعدی_زمان #زبدةالاشعار
نظر دهید