شهادت امام جواد علیه السلام
.
✍️ #زبدةالاشعار ✍️
.
🆔: @nohe_torki
.
حاج داود بیدق داری
.
شکر اولا قادر اولان اللها واردور نفسیم
عمریمون آخری وار نوحه یه دلده هوسیم
وار یقینیم بوعلاقه اولاجاق دادرسیم
قویارام محشره بو عشق و علاقیله قدم
وار امیدیم باشیما کولگه سالار قاره علم
.
.
دلده کی حبّ علی ذهنه قویوبدور اثرین
ایستورم مدح ائلیم سگیز امامین ثمرین
یعنی افلاک وفاداری وعزت قمرین
اوکه هر یئرده آدی گلسه کرامت یارادار
مدحینی کیم یازا شعرینده حلاوت یارادار
.
.
کیمدی بو رهبر فرزانه عنایت ائلیور؟
عاطفه اوندان ئوزی کسب عطوفت ائلیور
تا جهان واردی اورکلرده حکومت ائلیور
بو جواد ابن رضادور الی اعجاز ائلیور
سائلی یئر یوزونون شاهلارینا ناز ائلیور
.
.
بو حدیثی بویوروب مین یول اوخونسا یری وار
اوچ نیازی بشرین واردی تاپا دلده قرار
بیری توفیقیدی گر لطف ائلسه حضرت یار
بیرده گیزلینده اونی وعظ ائده وجدان بشر
قلب انساندا نصیحت ائلیه یاخشی اثر (1)
.
.
عمری قورتاردی جوانلیقدا امامین بیلوسوز
نه یازوبلار بو شهادتده تمامین بیلوسوز
کرم اهلیدی هاموز یاخشی مرامین بیلوسوز
ولی بیر نکته سی وار درده سالوب جان و تنی
تک قالوب حجره ده جان وئرمگی یاندیردی منی
.
.
نه اونون خاطرینه چرخ فلک دوردی او گون
نه قضا تیرغمین آیری یئره ووردی او گون
حضرته دام بلا دست جفا قوردی او گون
قلب زهرایه سالوب درد و مصیبت شررین
زهریله پارچالادی روح کرامت جگرین
.
.
آغلادی حضرته گوی یئر اونا افعان ائلدی
یوزه گوز یاشی روان شاه خراسان ائلدی
ال ایاق چالماقی زهرانی پریشان ائلدی
آغلادی سویلدی گویا ال ایاق چالدون اوغول
کربلا قتلگهین خاطریمه سالدون اوغول
.
.
سن کیمی جدّیوه ده اولمادی امداده گلن
هم سنه آغلیورام هم یارالی اوغلوما من
سنه غربت اونادا کرب وبلا اولدی وطن
نه روا سنده ئولن وقته قوری کام اولاسان
تشنه سن سسله حسینی بیر آز آرام اولاسان
.
.
او چوخور یئرده حسینیم ال ایاق چالدی اوگون
شرمیدن گون یوزینه پرده ی غم سالدی اوگون
زینبین واریوخونی دست جفا آلدی اوگون
خنجر قاتله بیر نحویله ال آتدی قیزیم
یاحسین سسلدی عالملری آغلاتدی قیزیم
.
.
او هیاهوده وئروب خنجرینه شمرتکان
زینبین اللری دوغراندی ائدیب قان فوران
بهتیله باخدی زمین آغلادی بوحاله زمان
شاه تشنه بویوروب بوردا داخی دورماباجی
تئز قئیت خیمه لره قلبیمی یاندیرما باجی
.
.
(1) #حدیث
امام جواد علیه السلام: اَلمُؤمِنُ یَحتاجُ إلی ثَلاثِ خِصالٍ: تَوفیقٍ مِنَ اللهِ، وَ واعِظٍ مِن نَفسِهِ وَ قَبُولٍ مِمَّن یَنصَحُهُ؛
ترجمه :
مؤمن نیازمند سه خصلت است: توفیق از سوی خداوند، واعظی از درون خود، پذیرش نسبت به کسی که او را پند می دهد.
[ بحار الأنوار؛جلد ۷۵؛صفحه ۳۵۸]
.
.
#جوادیه_شهادت
#شکر_اولا_قادر_اولان_اللها_واردور_نفسیم
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید