شام غریبان
..
..
مرحوم شوری تبریزی
..
..
شیعه زینب نجه گور زار و پریشان بو گجه
ساخلیوب قارداشنا شام غریبان بو گجه
..
..
بیر یانان خیمه ده اول مهجۀ زهرای بتول
متفکّر الى قوینوندا قالوب زار و ملول
آلوب اول بیکسون اطرافنی اولاد رسول
بولموری نیلسون اول مضطر نالان بو گجه
..
..
بیری عرض ایلوری عمّه باباموز هاردا قالوب
بابامون فرقتی آراممی بس اَلدن آلوب
بولموری یوخسا بیزیم ناله میز عرشه اوجالوب
یا بیزی گوزدن آتوب اُول شه عطشان بو گجه
..
..
بیری گوز یاشینی جاری ایلیوب گل یوزینه
بیریده باشینی یورقوندی قویوب غم دیزینه
بیری حیران متفکّر دانشور اوز اوزینه
بیری سویلور بابا وای ایلوری افغان بو گجه
..
..
بیری آغلور دیور ای عمّه کول اولسون باشما
من اجازه نجه بس ویرمیوم اوز گوز یاشیما
قالموشام حسرت عموماً آتاما قارداشما
بیز کیمی گور کیم اولوب خانه سی ویران بو گجه
..
..
بیری عرض ایلوری گلمز بولورم عمّه بابام
ولی بو درده نه نوعی ایلیوم صبر و دوام
یاتا بولمم قوری یرده همی عمّه من آجام
منی کیم قویدی بیله چاک گریبان بو گجه
..
..
دیوری عمّه بیری حالیمز آیا نولاجاق
دئ گوروم بیزلری بو شمر لعین بوشلیاجاق
یا بابام تک بیزیده آج به سوسوز ئولدوره جاق
منی حالی ایله ای عمّۀ نالان بو گجه
..
..
بیر طرفده ایدوری ناله او بیچاره رباب
دیور ای وای بالا یاندیم جگریم اولدی کباب
گوروم اولسون بالا او حرمله نی خانه خراب
قویدی ظلمیله منیم دیده می گریان بو گجه
..
..
گه خانم زینب اجازه ویروری گوز یاشنا
گاهی اوغلانلارینا آغلوری گه قارداشنا
گه دیور قارداش حسین زینبوون کول باشنا
گه گزر خیمه نون اطرافنی حیران بو گجه
..
..
گه خیال ایلوری زینب او گئچن گونلرینی
گه حسینون سالوری یاده او گل پیکرینی
ساربانی ولی بولموردی کسوب اللرینی
ایلیوب قارداشنی قاننه غلطان بو گجه
..
..
گه ایدر عرض گوزوندن آناجان اولسون ایراق
یاندیروب زینبون اوز شعلۀ آهیله چراغ
آپاروب قارداشیمون باشین آنا خولی قوناق
کوللر اوسته ایلیوب کوفه ده مهمان بو گجه
..
..
بولورم قارداشیما مسکن اولوب کنج تنور
رَبَّه فیهِ تجلّی ایلیوب اوردا ظهور
سالاجاقسان او تنور ایچره اوزون شور و نشور
ایده جاقسان او یری خانۀ احزان بو گجه
..
..
شوریا صدقیلن آغلا دیگلن ایسته خدا
جمعلن قسمت اولا قبر شه کرب و بلا
حرم پاکده برپا ایلیاخ بزم عزا
شاه مظلومه دوتاخ شام غریبان بو گجه
..
..
#شام_غریبان #شوری_تبریزی #ترکی #زبدةالاشعار
نظر دهید