تنور خولی
..
..
مرحوم نخستین اردبیلی
..
..
آنوون قلبی کیمی قانه باتوبسان یارالی
بونه عالمدى کول أوستونده یاتوبسان یارالی
..
..
قانلی کول پرده چکوب قانه بانان صورتووه
انبیالر قالوب حیرتده سنون نهضتووه
کلمۀ حق یازیلوب پرچم حرّیّتووه
آرزو ایلدیگون عهدووه چاتدون یارالی
پرچم نَصْرُ مِنَ اللهی اوجالتدون یارالى
..
..
قانلو باشون کیمی قلبیم دولوسی قاندی اوغول
سنون احوالووه باخدیم ئوره گیم یاندی اوغول
بو نجه صاحب مهمان نجه مهماندی اوغول
بیری گول جسموی مقتلده سویوبدور یارالی
بیری مهمانی کول اوستونده قویوبدور یارالی
..
..
بوغازون یاره لریندن گورورم قان سوزولور
ائلیور گؤر نجه خاکستری الوان سوزولور
بوقان الله قانیدور یوخ بونا نقصان سوزولور
دیله گل منله دانش قان آلانون وار یارالی
ضبط إئدوب ناله وی عکسون سالانون وار یارالی
..
..
عشق دریاسینه جسموندن آخان قان داغیلوب
بو نه عالمدور حسین پیکرون عریان داغیلوب
ناخُدا قانه باتوب کشتی طوفان داغیلوب
چیخمادی نوح کیمی ساحله نوحیم یارالی
یمه غم ، غم یمه قربان سنه روحیم یارالی
..
..
هر گلن پیکرووه یاره ویراندا واریدیم
باشووی شمر بدندن آیراندا واریدیم
تلّین اوسته سنى زینب چاغیراندا واریدیم
قتلگهده یوزی اوسته سورونوبسن یارالی
کیم سویوب پیرهنون قان بورونوبسن یارالی
..
..
بیر زمان قتلگه عشقه یتوردوم ئوزومی
گلدی بجدل که بارماقووی یومدوم گوزومی
ساربان گلدی فرات اوستونه دوتدوم یوزومی
سسلدیم داده گل ای صاحب منصب یارالی
قارداشون یاره لی من یاره لی زینب یارالى
..
..
باخوب آغلاردیم حسین معجر آچان قیزلارووا
اود دوتوب خیمه یانان وقته قاچان قیزلارووا
دشمنون قمچی ویران وقته هاچان قیزلارووا
قولومی قمچی قباقینه آتاردیم یارالی
قمچی دگدیکجه منه قانه باتاردیم یارالی
..
نیزه باشینده باشون آیۀ قرآن اوخودی
دیمه دیم دردیمی گوردوم بالا دردون چوخودی
کسیلن باشووه قربان دئمه زهرا یوخودی
ماه تک دوریوه اولدوزلاری دوزدون یارالی
دامنی اودلی قاچان قیزلاری دوزدون یارالی
..
..
شَربَتِ شَهدِ شَهادت سنى سرمست ائلیوب
سنیلن فاطمه نی زینبی هم دست ائلیوب
بو همان عِشقیدی پابستووى پابست ائلیوب
دگسون اوخ حلقینه مقصودینه چاتسون یارالی
یاره لی سینه ده بیر یاره لی یاتسون یارالی
..
..
واردی نهر اوسته یانان خیمه گهون منظره سی
خورداجا قیزلارین افلاکه چیخوب ناله سسی
زینب اولمیش آتاسیز قیزلاروون دادرسی
دور گئدک خیمه ده قویما باجووى تک یارالى
بو کسوک باشیله باشسیزلارا باش چک یارالی
..
..
غم یِمَه صُبح آچیلاندا سنه لشگر گله جک
قولقولا باغلى بیر عدّه قره معجر گله جک
آتاسین گورمگه سر نیزه ده اکبر گله جک
گورجگین اکبروون قانلی جمالین یارالی
سوروشارسان آناسی لیلینون حالین یارالی
..
..
مجلس ابن زیاده گئده جکسن ، بیلورم
دولانوب نوک جداده گئده جکسن ، بیلورم
محفل فسق و فساده گئده جکسن ، بیلورم
خیزران دگسه دوداقون ویره جک قان یارالى
او آخان قانه آنون فاطمه قربان یارالی
..
..
بالا گئتسه آنا بو رسمیدی هر یانه گئدر
گه کلیسایه گهی گوشۀ ویرانه گئدر
گه گلر مطبخه گه قانلو بیابانه گئدر
ساربان إئتدى منى سَن تک ئوره کدن یارالی
نصف شب اللرووی کسدی بیلکدن یارالی
..
..
خجلتیندن آچا ممکن دگی سقا گوزونی
گوستره خورداجا قیزلاره جداده ئوزونی
گوره عبّاس سوسوزلار دانیشور سو سوزونی
غیرتیندن آچا بیلمز گؤزون اصلا یارالی
باخا بیلمز باجیسی زینبه سقا یارالی
..
..
گورمه دی شمر باشون اوسته آنون فاطمه نی
آرخاوون اوسته یوزون اوسته دولاندیردی سنی
باشووی کسدی سوسوز دردیوه یاندیردی منی
آنووی دَرد و غم ومحنته یاخدون یارالى
گه منه گاه دونوب قاتله باخدون یارالی
..
..
ای «نخستین» دلِ زهرانی نیه قان ائله دون
خولی ظلم و ستمین شعریده عنوان ائله دون
سنده قان آغلا پریشانی پریشان ائله دون
سؤله ای دَشتِ غم افزاده وئرن جان یارالی
آغلیانلار ، یارالی جانووه قربان یارالی
..
..
#تنور_خولی #نخستین #ترکی #زبدةالاشعار
نظر دهید