حالات حضرت علی اصغر (ع)
.
✍️ #زبدةالاشعار ✍️
.
🆔: @nohe_torki
.
هدایتی تبریزی
.
طرح اولوبدور صحنۀ زیبا سودان
زنده دور دنیا و مافیها سودان
.
اولماسا سوخشک اولار دشت ودمن
نه اولاربرگ وگل وباغ و چمن
.
سوآزاولسا خشک اولار بحرو نَهَر
میوه ویرمز بوته و نجم وشجر
.
سوآزاولسا هریری گون یاندیرار
جنگلات عالمه آتش وورار
.
سوآزاولسا ماخلق عطشان قالار
قریه وآباده لر ویران قالار
.
ایچمه سه سوپهلوان دلدن دوشر
پیرواطفال وجوان دلدن دوشر
.
قالسا عطشان کیم سولار رنگ رخی
ایستیر یاتسین گوزه گلمز یوخی
.
قالسا عطشان حدّن آرتیخ کیم اگر
مغزنین سلّوللاری بیر بیر ئولر
.
کلیه سینده نارسالیق ئوز ویرر
مرگ تدریجی ئوزونده گورسنر
.
بواشاراتی نظرده دوتگیلن
کربلا دشتین مجسّم ایتگیلن
.
گور عطشدن نه حالا قالشدیلار
گوزلری سوآختاریردی بیقرار
.
واربویوکلرده تحمّل بیر قدر
ایلمزامّا تحمّل سود امر
.
بولمورم قالمشدی اصغر نه حالا
گل کیمی سولموشدی اول نازلی بالا
.
بیقراریدی چالوردی ال ایاق
تشنه لب لیقدان سارالمشدی دوداق
.
بعضی لرعنوان ایدوبدی بوسوزی
خیمیه گلدی حسین شخصاً ئوزی
.
(آلدی آغوشه آقا دلبندینی
ایله سین بوسه رخ فرزندینی)
.
(شه دوداقیندن قاباق بیرتیرکین
گلدی ئوپدی شیرخوارین حنجرین)
.
گل کیمی گوردی حرارتدن سولوب
چهرۀ شادابی پژمرده اولوب
.
گورمه سین طفلین اوحالدا هئچ آتا
اوستونه چکدی عبا بلکه یاتا
.
ئوز قویوب میدانه شاه تاجدار
گه گلوب گاهی او طفله بیر باخار
.
مسئله انگیزیدی بومرحله
ناگرانیدی عطشدن جان ویره
.
مرکز میدانه گلدی چاتدی تا
حیرته دوشموش گوروب اهل جفا
.
طفلین اوستوندن عبانی قوزادی
اللری اوسته بالانی قوزادی
.
سسلدی ای لشگربی شرم وعار
سیزده آیا رحمدن آثار وار
.
نه گناه ایلوب بو طفل شیر خوار
که سوسوزدان بند بندی اودلانار
.
جان ویرور سوز عطشدن،گورموسوز
بیر ایچیم سو بو اوشاقه ویرموسوز
.
گه یوموب آغزین آچور گه،بیر باخون
ایلورم دردیندن آگه بیر باخون
.
احتضارحالینده دی،جان اوسته دی
جان ویرورلب تشنه ،تقصیری ندی
.
حق رضاسی خیره فتح باب ایدون
بو اوشاقدور سو ویرون سیراب ایدون
.
سوزلری بیرعدّیه ایتدی اثر
آغلادی بیر عدّه اولدی دیده تر
.
گوردی سعد اوغلی قوشوندا انقلاب
قان توکنلردن بیرین ایتدی خطاب
.
سسلدی دورما شتاب ایت حرمله
تئزحسین قلبین کباب ایت حرمله
.
ایت بوغازین اصغرین تیره نشان
گوزده گوزیاشین حسینین ایله قان
.
حرمله قویدی کمانه تیرینی
تیر یوخ، اوچ شعبه لی شمشیرینی
.
اوخ کماندان قورتاروب ویردی صدا
توکماقا قان دوشدی سرعتله یولا
.
دگدی حلق اصغری ایتدی یارا
یاره یوخ حلقومینی ایتدی پارا
.
بولمورم سالدی اونی اوخ نه حالا
دیسکینوب آچدی گوزون دلسیز بالا
.
اصغرین حلقین مجسّم ایله باخ
بو قولاخدان بیچدی اوخ تا بو قولاخ
.
شرح ایدم ویمور اجازه گوزیاشی
تیریله ذبح اولدی او طفلین باشی
.
گورموسوز قوش جان ویرنده پر وورار
ایله چالدی ال ایاق اول شیرخوار
.
شه الی اوستونده چرپندی بالا
اوخلانان دلبندینه باخدی آتا
.
اصغرین تیترور نه گوردی چانه سی
آغلاسون ایستور ولی گلمور سسی
.
اوخ بوغازینده اسورساق وصولا
دؤزمدی دلبندینه زحمت اولا
.
دوشدی بو فکره چکه تیری امام
اوچ پراوخدان دوتدی شاه تشنه کام
.
چکدی تیری،اوخ یئریندن آتدی قان
خوردا حلقین قانی اولدی فوّران
.
اوجونی قانیله دولدوردی آقا
ایستدی گوی سمتینه الده آتا
.
آتدی قانی عرض ایدوب یاذوالکرام
شاهد اول اوخلاندی ال اوسته بالام
.
اللریم اوسته بالام باتدی قانا
قانینی آتدیم گویه یانه یانا
.
حافظ اول بوقانه مظلوم قانیدی
بوحسینون آخرین قربانیدی
.
قان سنین بو سودامر قربان سنین
جان سنین،قربان سنیندی،قان سنین
.
من قاپوندا بیرالی بوش بنده ام
یوخ سنه لایق فدا شرمنده ام
.
گوردی که ایستور بالاسی جان ویره
اگلشوب افسرده حالیله یره
.
تپراق اوسته قویدی بعضی لر یازار
منده امّا بیر خلاف رأی وار
.
شیرخوارین کیم تراب اوسته قویار
اولسا امکان سینه سی اوسته باسار
.
اگلشوب قویدی دیزی اوسته باشینی
توکدی قانلی صورته گوز یاشینی
.
دوندروبدی قبلیه ساری یوزون
ال آپاردی باغلادی اصغر گوزون
.
گیت دیدی اوغلوم ایوین آباد اولا
یوز گوزی قانلی سنی سالدیم یولا
.
گیت سنی جنّتده حورا ساخلاسین
فاطمه ام ابیها ساخلاسین
.
چوخ بویوک اولدی بوغازون یاره سی
اولمادی نه بیر دوا نه چاره سی
.
قانیله رنگین اولوب گل صورتین
قلبیمی درده گتوردی رحلتین
.
دل دوداقون،خطّ وخالون قانلیدی
یوزگوزون،زیبا جمالون قانلیدی
.
سن الیمده مدرک ارزنده سن
زنده سن،تابنده سن،پاینده سن
.
گورمه دی میداندا قالماقین صلاح
آلدی آغوشه بالانی دلده آه
.
گلمه دی یوز خیمیه راهی اولا
گیتدی میداندا بیرآز ساق وصولا
.
گه باخوردی خیمیه گه علقمه
ایلیوردی ئوزئوزیله زمزمه
.
ساغدی نه قارداشلاریم نه اکبریم
درک ایده قالمش الیمده اصغریم
.
یوخدی بیر کیمسه منی یاده سالا
اللریمدن اصغری باری آلا
.
من کیمی محنتده هئچ کیم یانماسین
الده اوغلی هئچ کیمین اوخلانماسین
.
هئچ کیمون من تک چراغی سونمه سین
بخت واقبالی منیم تک دؤنمه سین
.
هئچ کیمی گوزدن زمانه سالماسین
اوغلونون نعشی ال اوسته قالماسین
.
دؤزمزهئچ کیم بوغمه من دؤزموشم
الده اصغر،حقلیم غمدن ئولم
.
دلده واردورچوخ گلایم چوخ سوزوم
خیمه گاهه گیتماقا گلموریوزوم
.
الده اخیامه آپارسام اصغری
گورسه قزلار بوسولان نیلوفری
.
دل لرین سوز یوخ محن تیغی بولر
باغری چاتلار غصّه دن بعضی ئولر
.
اصغرین گورسه آناسی نیلیر
اوخلانوب بولسه بالاسی نیلیر
.
نیلیر گورسه بوغازین اوخ بیچیب
تیریله سیراب اولوب قانین ایچیب
.
ایلیربوسه بوغازین یاره سین
حاضرایلربوش قالان گهواره سین
.
یاغدیراربوسه بوغازدا یاریه
یاره لی اوغلون سالار گهواریه
.
قلبی محزون گوزلری آغلار قالار
یاره لی قربانینه لایلای چالار
.
ورد ایدر لایلای بالام یات خسته سن
اینجیدوب اوخ یات گوزون قربانی من
.
شه گوروب قورتارموری فکروخیال
تنگه سالمش قلبنی درد وملال
.
یوخدی بیرکیمسه ئورک دردین دیه
فکرایدوبدی اصغری دفن ایلیه
.
دوتدی سمت خیمه نی دوشدی یولا
هرقدمده ذکرایدوردی جان بالا
.
ویرمدی فرصت اجل دل آچمادین
نه قاباقیمدا گزوب نه قاچمادین
.
نه بیری درک ایلدی آغریرهاران
نه بیلن اولدی نجه گوینوریاران
.
من ئوزوم دفن ایلورم اغلوم سنی
گورمه بوندان چوخ جفای دشمنی
.
من ئولنده بوقوشون فرصت تاپار
سینم اوسته اهل کینه آت چاپار
.
فرصت اولسا بو گروه کینیه
باشلاری بیربیر ووراللار نیزیه
.
نقش اولارتپراقه جسم بی سری
گون قاباقندا قالار گل پیکری
.
من سنی دفن ایلورم ای گل بالا
بلکه جسم نازون ایمنده قالا
.
تاپمیا ال قوم طاغی جسموه
دگمیه کاش آت ایاقی جسمیوه
.
ظلمیله جسم لطیفون سولمیا
پیکرین خاکیله یکسان اولمیا
.
گئچمیه نوک جدا اوسته باشین
بوندان آرتیخ اولمیا خسته باشین
.
یانمیا جسم لطیفون ایستیدن
ئوز حالیندان چخمیا بو گل بدن
.
یول سالوب آهسته پشت خیمیه
اصغرین جسم لطیفون گیزلیه
.
اصغره بیرقبرقازدی لاجرم
پوزدی احوالین هجوم درد و غم
.
غسلی نیلورقانیله غسل ایلین
قانلی قنداقین اونا ایتدی کفن
.
ویردی شش ماهه بالایه امتیاز
قیلدی نعش اصغره شخصاَ نماز
.
عرض ایدوب درگاه حیّ ذوالمنه
صبرویرالله بومحنتده منه
.
تاپشریم قبره بوطفلین پیکرین
دفن ایدیم جسمین علیّ اصغرین
.
بو عمل اولدی حسینه چوخ چتین
تپراقا قویسون بالانین صورتین
.
قویدی قبره اوستونه توکدی تراب
چکدی آه آتشین اولدی کباب
.
باخدی قبره اولدی دیده اشکبار
اولمادی سو،گوزیاشین ایتدی نثار
.
نظمیله پایانه چاتدی بوخبر
بیر خبرده وار ایدرداشه اثر
.
شه الینده اوندا که قالدی بالا
عرصۀ میداندا گیتدی ساق صولا
.
گوردی زینب، ایلدی تأخیرحسین
چوخ یوباندی رزمگهده شاه دین
.
گیتدی میدانه طرف گورسون نه وار
گلموری اخیامه شاه تاجدار
.
گوردی شاهین اللرینده دسته گل
اصغرین حلقی آچوب گل،گل دگول
.
قلبه تأثیر ایلین بیرصحنه وار
هم حسین قانه باتوب هم شیرخوار
.
اصغرین حلقنده واردوربیریارا
نه یارا باشی اولورتندن جدا
.
عرض ایدوب قارداش دولانیم باشیوه
آغلاماقربان اولوم گوزیاشیوه
.
یارویاوریوخ کمکسیزقالمیسان؟
اللرین اوستن بالانی یوخ آلان
.
خسته سن، من ایلرم درمانیوی
ویرمنه اوخ ذبح ایدن قربانیوی
.
اصغری آلدی گتوردی خیمیه
تا آناسی اوغلونا لایلای دیه
.
خورداقزلار بولدولر اصغر گلیب
دللری فتح ایلین دلبر گلیب
.
گلدی شیرین دللر اطرافین آلا
شیرخواره قارداشا لایلای چالا
.
گوردولر قنداق نازی قانلیدی
یوزگوزی قانلی ، بوغازی قانلیدی
.
قورخوشوب قزلار قارشدی بیربیره
ناله اوج ایتدی سپهر داوره
.
بعضی سی سسلندی وارقارداش یاران
باجی قربان جانیوه آغرور هاران
.
بعضی سویلردی نه ایتدون دشمنه
داش ئورکلرآتدیلارپیکان سنه
.
سس چکوب آغلاشدی عورت،قز،گلین
اولدولار اصغر غمینده دل غمین
.
قانلی قنداقه طرف باخدی رباب
جان بالا یاندیم دیدی اولدی کباب
.
قلبیمه اود دوشدی اودلاندیم بالا
تک دگولسن منده اوخلاندیم بالا
.
دگدی اول پیکان که میداندا سنه
خیمه ده دگدی منیمده سینه مه
.
سن بویاندون قانه پرواز ایلدون
مادربیچاره وه ناز ایلدون
.
هانسی سنگین دل سنی ایتدی شکار
قلبی یانسین آتشه اولسون دچار
.
آغلارام احوالیوه لیل ونهار
آغلارام اوللام غمنده اشکبار
.
لایلای ای دینه سروسامان ویرن
لایلای ای تیریله عطشان جان ویرن
.
لایلای ای دل آچمیان سربازعشق
شه قوجاقندن ایدن پرواز عشق
.
لایلای ای معراجه یوزقانلی گیدن
لایلای ای دشمن لری رسوا ایدن
.
لایلای ای قلب(هدایتده) قونان
لایلای ای مداحه نوحه یازدیران
.
.
#اصغریه_هدایت_تبریزی
#اصغریه_شهادت
#طرح_اولوبدور_صحنه_زیبا_سودان
#ترکی
.
✍️ #زبدةالاشعار ✍️
.
🆔: @nohe_torki
نظر دهید