طلوع ائتدی افقدن هلال ماه عزا #ورود_محرم_حقیر_خویی

ورود محرم و اشاره به شهادت امام حسین(ع)
.
زبدة الاشعار

?: @nohe_torki
.
مرحوم میرزا عبدالوهاب حقیرخوئی
.
طلوع ائتدی افقدن هلال ماه عزا
ولی نه حالتیله حالتی ملال افزا
.
ضعیف اولوب اریوب غصه دن یوزی سارالوب
هلال هاله ده محض ملالیدور پیدا
.
باشی اشاقه دی شرمنده دی طلوعیندن
دوتوب اودور یوزونه ابردن نقاب حیا
.
باخان هلاله قالور اوزگه حاله سینه سینی
خراش ناخن حسرت قیلار هلال آسا
.
هلالی خنجر خونینه ایلیوب تشبیه
سپهر قامتی شکل هلال اولوبدی دوتا
.
شهور دیگره یوخ نسبتی محرم آیی
اولوب محرّمه مخصوص یوم عاشورا
.
ز بس محرّم آیی محترم دی حرمتدن
حرام اولوب بو مه محترمده سفکِ دما ٕ
.
گوتوردی حرمتین اما حرامزاده یزید
حلال بولدی حرامی خلاف حکم خدا
.
حسین قانینی بولدی مباح وئردی او شوم
او خون ناحقه ناحق خلافیله فتوا
.
ویریلدی صورت حکم خدایه چون تغییر
تاپوب او صورته تغییر صورت اجزا
.
هامی عوالم امکانه ایلدی تأثیر
وقوع واقعه ی قتل سیدالشهدا
.
یخلدی چون یره آتدان شهنشه کونین
گلوب تزلزله ارکان عالم بالا
.
تراب اوسته یخیلدی ابوتراب اوغلی
خروش و نالیه گلدی تراب کرببلا
.
تزلزل ایلدی اعماق فرش تیتره دی عرش
او دم که دوشدی یره لنگر زمین و سما
.
احاطه ایلدی ظلمت گونون یوزی دوتولوب
چو آفتاب امامت زواله قویدی بنا
.
گوتوردی تاجینی باشدان جناب روح الامین
وروب تمامی ذرّات کایناته صلا
.
اَلا لَقدِ قُتِلَ ابنُ الاَمام سِبطُ رسول
دوشوب صوامع افلاکه شیون و غوغا
.
یتیشدی ناگه او سس زینبین قولاقینه
خیام طاهره دن چیخدی عترت طاها
.
چوله داغیلدی غزالان چین و ملک حجاز
اوجالدی عرش برینه خروش و واویلا
.
قاچاردی هربیری بیر سمته خوف لشگردن
کیمی دیردی اوغول وای کیمی سی وا ابتا
.
دوتوب سکینه الین الده قتلگاهه طرف
توجه ائتدی سراسیمه زینب کبریٰ
.
باخوب گچوب دولانوب آختاروردی محبوبین
نه گوردی قان یغیلوب بیر یره اولوب دریا
.
باخاندا دقتیله گوردی بیر یارالی بدن
دوشوب یوز اوسته او قان ایچره چاک چاک اعضا
.
تعجب ائتدی الهی دیوم حسینیدی بو
نه تئز سویوبلا بدندن لباسینی آیا
.
بیر اوزگه حاله دوشوب اختیاریدن گئتدی
فقالَت اَنتَ اَخی یابن اُمّی الزّهرا
.
باجون ئولیدی بو حالیله گورمییدی سنی
هانی او حالت اوّل گتور بیانه اخا
.
گونون حرارتی نازک بدن هوا ایستی
یارالی جسمیله ایسّی قوم اوسته چوخ یاتما
.
کنار حضرت زهراده بسلَنَن بدنون
نجه گوروم کی ائدوب خاک و خون آرا مأوا
.
نه جامه وار بدنونده اولا گونه حایل
نه سایبان یارالی جسمون اوسته سایه سالا
.
دوتوب سکینه نی وحشت زبس ایتوردی اوزین
گلوب نوائیله شور اوسته قیلدی شدّ نوا
.
پناهیم عمه مگر بو غریب آتامدی منیم
فلک ائدوبدی بو طفل صغیری بختی قرا
.
یتیمه لوق غمی عمه منی ائدر دلگیر
یقینیم اولدی کی اولدوم اسیر شمر دغا
.
کسیک بوغازینه قویدی یانان دوداقلارینی
زبان حالی بو مضمونیله اولوب گویا
.
کیمون امیدینه قویدون منِ فلک زده نی
سکینه نی کیمه تاپشوردون ای پناهیم آتا
.
سبب ندور منی بالمرّه سالموسان گوزدن
یوزیمه باخموسان اولدوم یتیم یا ابتا
.
بلی یتیمه لرین چون یوزینه باخمازلار
سبب بودور منی دیندیرموسن قبول اما
.
قبول عرضیمی قیلسان یانوندا ساخلا منی
که قبرون اوسته مجاور اولوم ، صبح و مسا
.
مگر رضا اولوسان قوللاریمی باغلیا شمر
عناد و قهریله هر دم یوزیمه سیلی ورا
.
«حقیر»ناله ی زینب سکینه افغانی
او چولده ایله دی برپا قیامت کبریٰ
.

#ورود_محرم
#حسینیه_شهادت
#قتلگاه
#طلوع_ائتدی_افقدن_هلال_ماه_عزا
#حقیر_خویی
#ترکی
.
#زبدةالاشعار

?: @nohe_torki