طلوع ایتمه بو گون مشرقدن ای گون #عاشورا_کریمی_مراغه_ای

زبانحال حضرت زینب به آفتاب
.
.
مرحوم کریمی مراغه ای
.
.
طلوع ایتمه بوگون مشرقدن ای گون
قیامت باشلانار چخسان سن ای گون
.
.
یاتوب گهواره ده نازیله اصغر
ربابین یوخ صودی اولموش مکدر
دیر لای لای بالاسینه او مضطر
توکر گوز یاشین ایلر شیون ای گون
.
.
طلوع ایتسن دوشر شیون جهانه
سوسوز خنجر اولار تیره نشانه
باتار آغ اونّوگی ظلمیله قانه
بیچر نازک بوغازین آهن ای گون
.
.
صباح سن ایتمه دنیانی منّور
شفق سالسون جدادن حُسن اکبر
چخار گونتک جداده رأس اصغر
گینده قرمزی پیراهن ای گون
.
.
چخوب ایتمه مزّین آسمانی
ایشقلاندیرما بو کون و مکانی
گتورمه نالیه خیرالنسانی
رضا اولما قالوم یالقوز من ای گون
.
.
چخاندا سن باتار شمس امامت
حسینی ئولدورر اهل شقاوت
ایچر قارداشلاریم جام شهادت
آلار معجر باشیمدان دشمن ای گون
.
.
طلوع ایتسن باتار آلقانه اکبر
دوشر میدانه عون و فضل و جعفر
ویرار اود خیمه گاهه قوم کافر
گیدر یکسر جلالیم الدن ای گون
.
.
چخار بیر گون صباح نوک جدادن
اونی گورجک دوشر سن انجلادن
اولارسان ابریده پنهان حیادن
حسین باشی اولار نورافکن ای گون
.
.
طلوع ایتسن یانار بو خیمه گاهیم
سالار اود کایناته سوز آهیم
ئولر شاهیم گیدر الدن سپاهیم
چخوب ایتمه جهانی روشن ای گون
.
.
رضا اولما جلالیم برهم اولسون
عروسین بزم عیشی ماتم اولسون
طلوع ایتمه جهان قوی مظلم اولسون
دگول چخما خلقون مستحسن ای گون
.
.
گلر دائم «کریمی» آه وایه
یازار اشگیله نامه کربلایه
یانار دلدن بو غملی ماجرایه
ایدر دنیانی بیت الاحزن ای گون
.
.
#عاشورا #کریمی_مراغه_ای #حسینیه #حسینیه_شهادت #حسینیه_کریمی_مراغه_ای #ترکی #زبدةالاشعار