استعانت از امام زمان ( عج )
.
.
مرحوم تائب تبریزی
.
.
طلوع ائت مشرق اسلامدن ای نیّر اعظم
وور انوار جلالیله بسیط عالمه پرچم
.
ئوزون گل نوروویله ظلمت کفری ائله زایل
آلا تا برق ایماندان دل وجان بنی آدم
.
اولان ای گل وجودی غیبة العلم خداوندی
ظهور علموویله دهره سال بانک اَنَاالاَعلم
.
اولان ای گل یوزی آئینۀ آئین پیغمبر
گل اولسون منکسر آئین زردشتی و جام جم
.
مسخّرقیل جهانی نامیوه وور سکّۀ دولت
وجودی ای وصیّ خاتم پیغمبر خاتم
.
جهاندور ریزه خوارون سفرۀ احسانی فرش ایله
گوروب احسانوی حسرتله حسرت ایلسون حاتم
.
جمالون نوری نورچشم دور هر محرم عشقه
وورار بیرمهرکوری چشمینه هرکور نا محرم
.
گل ای روشنگرعالم جهالت دوتدی دنیانی
ئوزون گل مشت دانش وور سر نابخرده محکم
.
اولوب بدعتگذاران قدرتیله نظم دین برهم
گل ای دین ناظمی بدعتگذاران نظمین ائت درهم
.
ساتوپ دنیایه بو دل مرده لر قرآن و اسلامی
بو ئولموش ملّته وور بانگ قوموا ای مسیحا دم
.
دوتوبدور ظلم دنیانی عدالتدن خبر یوخدور
عدالت پرچمین گل آچ ئوزون ای سیّد عالم
.
رژیم چارپایان حکمفرمادور مجامع ده
ئوزون گل ایله بو وحشیگری تشکیلینی برهم
.
ترقّی خواه اولانلار بیخبردور عار و غیرتدن
بهائم تک یاشار امّا ترقّیدن وورار چوخ دم
.
ائدربعضی ترقّی جو غزال عصمتین آزاد
غزاله هر خطر یوز وئرسه ابرویه یئتیرمز خم
.
ائله تعلیم ائدبدور ئوز غزال عصمتین بدبخت
که مین صیّاد اونی صید ائتماقا قصد ائتسه ائتمز رم
.
ترقّی بیله اولسا بو ترقّی واژگون اولسون
مگراهل ترقّی غیرت دینین دوتار مبهم
.
ترقّی یعنی انسانی ترقّی ضدّ حیوانی
گوزل راق دور ترقّی گر تدیّونله اولا توأم
.
یاشار بیدین ترقّی ایلینلر اشتباه اوسته
اولار بیدین ترقّی گرده وحشت وحشته مُدغَم
.
ترقّی یعنی مخلوقه شریک درد و غم اولماق
نه چون اعضاء همدیگردیلر نوع بنی آدم
.
دگل انسان دگل آدم او که سیر حیاتینده
گورر هم نوعینی غمگین ئوزی شادان یاشار بی غم
.
ئوزون گل ملّت اسلام و قرآنه ترقّی وئر
بو اهل دینه وئر شخصیّت ای شخصیّت عالم
.
ئوزون گل بوترقّی جو لره درس ترقّی وئر
امام مهدی غایب ترقّی جولره اقدم
.
ئوزون گل بو جهانه نشر قیل معنای قرآنی
علم ئوز قامتین قویما ائده هر فرد لا یعلم
.
اوکس که رأییجه تفسیر ائدر قرآنی عالمده
اونون اطرافیانی بوینونی وور تیغیله باهم
.
اولار که عترت و قرآنی عالمده دوتار آیری
اولاردی منکر آیات و اخباری دانان از دم
.
ائدوبدور شیعه باغرین تهمت بیگانه لر خونین
بو زخم دللره ای آشنا گل سال ئوزون مرهم
.
صفا وئر ای صفای عالمین هر قان اولان قلبه
جمال شیعیه وئر آبرو ای مفخر زمزم
.
بهاء بی بها اتباعینی نابود و محو ایله
ئوزون گل باغلا بابی بابینی وور قفل مستحکم
.
اورکلر قانه دوندی ای حسین قانین آلان تئز گل
اماندور قویما قالسون یئرده بو قان ای شه افخم
.
گل ای آغلار گوزون قربانی آل اؤز جدّیوین قانین
یاشا بیر گل کیمی گول شاد وخندان چک نفس وور دم
.
عزای شهسوار کربلانی یئریوزوندن ییغ
درِ آل ابوسفیانه ووردور پرچم ماتم
.
.
گنه شوره گلن باشیم هوای وصل یار ایلر
هوای وصل یاریله ئوزین غمدن کنار ایلر
.
سروش وحدتیمدن گوش هوشه بو ندا گَلدی
که یزدان نیمه شعباندا لطفین آشکار ائیلر
.
اولار فجر رجا جیب افقدن برملا ظاهر
هامی نومید دن یأسی آلار امّیدوار ائیلر
.
که یعنی حجّت ابن العسکری صاحب زمان مهدی
بو دنیایه گلن گوندور بو گفتارین کرار ایلر
.
او بیرمولود دور سامّره ده گلدی بو دنیایه
اونون نوریله سامرّا جهانی نوربار ایلر
.
آتاسی بومحمّددور آناسی حضرت نرگس
باباسی احمد مرسَل اوختم هشت و چار ایلر
.
اصولاً شاخه گلدن وئرر باش هرگل نرگس
بو گل دین نرگسیندن ئوز جمالین آشکار ایلر
.
همیشه جانب شهدن مُبَرهَندور گلر عسکر
و لیکن عسکریدن جلوه ، بو شاه کبار ایلر
.
یاشارحاضرده سکّیز ایل آتاییله آناییله
آتاسیدان صورا دنیاده غیبت اختیار ایلر
.
گَزَرمین حسرتیله پرده غیبتده مین لر ایل
باخار هی ذوالفقاره گوزیاشین گوزدن نثارایلر
.
وئرر صیقل مُداوِم ذوالفقارِ تیز و برّانه
باخار آغلار گوزیله کربلایه آه وزار ایلر
.
دییَرقالدی الهی یئرده آخر جدّیمین قانی
منی بو ماجرای غمفزا چوخ بیقرار ایلر
.
توکر گوزیاشینی حقدن ظهورین دمبدم ایستر
او قانی آلماقا چوخ آرزو اول شهریار ایلر
.
.
.
الهی وئر اجازه حضرت صاحب زمان گلسون
جهان ناامن دورجان جهان روح اَمان گلسون
.
.
.
یوزین ای طلعت دین ابر غیبتدن کنار ایله
دوتوب ظلمت جهانی نوریویله نور بار ایله
.
اوقدری قالمری دین باغینه باد خزان اسسین
گل ای دین صاحبی دین گلستانین نو بهار ایله
.
اورکلر قانه دوندی گلدی بدعت بدعت اوستوندن
یئتیش امداده بو بدعتلری گل تار و مار ایله
.
یاتوبدور امّت قرآن قالوبدور خواب غفلتده
بو قرآن اهلینی هوشه گتور بیر هوشیار ایله
.
یولوندا منتظردور شیعه لر چوخ انتظاریله
ئوزون ای مُنتَظرگل اختتام انتظار ایله
.
جهالت قدرتی ائیلر حکومت سطح دنیاده
ئوزون گل یر یوزین ده گوهر دانش نثار ایله
.
اجانب دائماً قرآنیانی خوار و زار ایستر
ئوزون گل مسلمینی خوارائدن اشخاصی خوار ایله
.
تَجَمُّل آرتوب از بس آلدی دللردن تجلاّنی
تجلّی بخش عالم گل تجلّی آشکار ایله
.
هره بیر یول دوتوبدور ظالمانه عدل فرض ائیلر
بیله ظالم لری ئولدور جحیمه رهسپار ایله
.
فسادیله دولوبدور یئریوزی یاغیره الرَّحمن
فسادی یئر یوزوندن یغ صلاحی استوار ایله
.
عدالت یوخدی دولورموش جنایت سطح دنیانی
گل ای شاه عدالت جو عدالت بَرقرار ایله
.
شماتتدن یانوب تاکی اورکلر زخمدار اولسون
ئوزون لطفاً مداوای قلوب زخمدار ایله
.
اولوب دینی مجالس خالی امّا فسق ائوی مَملوّ
جماعت چخدی یولدان یولاری گل راهوار ایله
.
چخوب بیرعدّه تحریف ایلیور احکام قرآنی
او قومی طعمه شمشیر تیز و آبدار ایله
.
گوزی یولدا نقدر آغلار گوزیله شیعه لر یانسون
الونله پاک خونین اشگ چشمِ اشگبار ایله
.
دوزاق تا کی شهیدان وفا قانی قالا یئرده
گل آل بوقانلاری اعدانی تیره روزگار ایله
.
حقیقی مُنْتَقم گل آل ئوزون ئوزجدّیوین قانین
دل مجروح زهرا دن بیر آز کسر شرار ایله
.
ئوزون آماده ایله « تائبا » بیر پاک قلبیله
ولیعصر آدینی اوندان صورا دلده شعار ایله
.
شعار پوچ بی علم وعمل هرگز ثمر وئرمز
معاصیدن اوزاق دوش ئوز ئوزین پرهیز کار ایله
.
گلنده حضرت صاحب زمانون شرمسار اولما
آچیق آنّیله سن درک حضور شهریار ایله
.
.
#مهدیه #تائب_تبریزی #ترکی #زبدةالاشعار
نظر دهید