تقدیم به ساحت مقدس شاهزادهٔ اعظم حضرت علی اکبر (ع)
(( شجاعت و شهادت ))
..
..
رضا غلامپور (دلپاک)
..
..
عزیز سبط طاها کوی عشقی اختیار ائتدی
تجلّای کلامیله مرامون آشکار ائتدی
..
..
ائدوب محکوم همّت فکرتون قاضی ایمانی
سالوب تشویشه بو حکم وفا فکر پریشانی
قویان دم مجری قانون دل اجرایه فرمانی
وجودون متصل شوق محبت بی قرار ائتدی
..
..
سویدای خیالین محو ائدوبدور نور سرّالله
رموز حقّ وادی حقیقتده اولوب آگاه
ائدوب سیر و سلوکوندا مرامون فعلینه همراه
ضمیرون لیک کوی یاره اول رهسپار ائتدی
..
..
گوروب چون بزم نوشا نوشیده الفت هویدادور
رحیق مصطبه منظور جام حیّ یکتادور
اصول رونق آزادگی ساقی و صهبادور
اوزون بو بادهٔ حقّیله پیوسته خمار ائتدی
..
..
دعای حفظ مذهبده تاپان دم جلوه آیینی
یئتیب درگاهه یزدانه مکرر پیک آمینی
أسنده یئل الینده فصل هجران زلف پرچینی
بو منظردن حرملر خیمه گهده آه زار ائتدی
..
..
فرامین قیامی کسب ائدوبدور فعل محرمدن
تاپیبدور رتبهٔ خاص وفانی عهد محکمدن
خدا عالمدی آیرلدی نجه سلطان عالمدن
اورکده اصل مقصودیله قصد کارزار ائتدی
..
..
یئتیب تا مرکز میدان جنگ عابد معبود
گوروب عدوانی یکسر آزمون دهریده مردود
شبیه شاهد روح الامین قصدین ائدیب مشهود
دلون الفاظ پنده نکته نکته سازگار ائتدی
..
..
آچان دم گنج اندرزی دلوندن حق معیاری
دوتوبدور لولو رحمت سراسر سطح بازاری
ولی سودا زمانی اولمادی کیمسه خریداری
نقدری دقتیله لوح پندی زرنگار ائتدی
..
..
حریم امن رحمتده مداوم جان بکف محروس
گوروبدور رشحهٔ غیظه جبینون بی امان مأنوس
امورات نصایحدن بیانی تا اولوب مأیوس
کمیت پنجیه تیغ شرربارون سوار ائتدی
..
..
ائدوبدور حمله شبه مصطفا اهل جفا اوسته
سحاب تیغیدن قان یاغدیریب دشت بلا اوسته
توکوبدور باشلاری بیر بیر تراب کربلا اوسته
مسیر جنگی خون دشمنیله جویبار ائتدی
..
..
سالاندا لرزیه سمّ سمندی سطح صحرانی
ائدوبدور پرده چشم اشقیایه خاک غبرانی
ائدنده قلب لشکرده هویدا سر هیجانی
نظام لشکر کفری سراسر تارمار ائتدی
..
..
طنین انداز اولوب تکبیر یزدان صوت اکبرده
الینده سیف رخشانی دوتوب قان رنگی مصدرده
باتیب هور رجا ناگه سپهر قلب لشکرده
قلنجین سیرینه حول نبردی تا مدار ائتدی
..
..
نمود هیبت شیر خدایه تا اولوب مجری
دوشوبدور انعکاس غرشوندن لرزیه صحرا
بسان ضیغم چالاک بیربیر یکه و تنها
قاچان روبه لری چنگال جهدیله شکار ائتدی
..
..
تجلّی ائیلیب طرح ظفر قاب مرادوندا
خراج قان اولوب رایج فقط حکم ستادوندا
قلنج جانستانی الده هنگام جهادوندا
مکرر نقشینی اجرا بسان ذوالفقار ائتدی
..
..
وئرنده مرکب اوسته عرصه گاهه رزمیده جولان
اولوبدور ضربه سیندن هر مبارز قانینه غلطان
ایچیردن دم دم شمشیریدن هر بیر حریف قان
فنون جنگینه فخر خلایق افتخار ائتدی
..
..
تاپوبدور قوّهٔ مطلق وجودی بس که سطوتدن
حکایت ائیلییب صمصام برانی شهامتدن
گورن بو قدرت بی حدی ناگه خوف و وحشتدن
گوتوردی جانینی میدان هیجادن کنار ائتدی
..
..
بو سودادن دوشوب دشمن آرا اندیشه چاره
تأملدن بو دستور جفا نشر اولدی کفاره
آلون اطرافینی یکسر خدنگیله وورون یاره
که تک بو نقشه امر نصرتی امیدوار ائتدی
..
..
قویوب هر بیر کماندار اوخ کمانه اضطرابیله
چکوبدور چلهٔ پیکانی فکر کامیابیله
کمانه دست ذلتدن چیخیب هر اوخ شتابیله
علی اکبرون خسته وجودون زخمدار ائتدی
..
..
قاچانلار تاپدی چون جرأت قیتدی بیرده دعوایه
وورون تئز ئولدورون بانگی اوجالدی طاق خضرایه
دگوبدور بیر بیره اوخلار یئتنده شبه طاهایه
هر اوخ اوز سهمجه پور حسینی دلفگار ائتدی
..
..
وجوده اطهروندن کثرت یاره توان آلدی
نه نوعی پیکری زین اوسته آخر شرح إئدوم قالدی
بو قدری واردی قولارین سمندین بوینونا سالدی
اوزون هنگام مسقط مرکب اوسته استوار ائتدی
..
..
هیاهوی محیط جنگیدن مرکب ائدوب چون بیم
تاپوبدور لشکر ایچره موسم پروا اوزون تسلیم
گوروب فرصت غنیمتدور عدو فورا اولوب تقسیم
هره اوز ظلمونی دشت بلاده آشکار ائتدی
..
..
مقام کینه ده شمشیر الینده اشقیا دوردی
اورک ملکونده هر ظالم عداوت خیمه سین قوردی
آت اوسته اکبری بیر بیر گلن ووردی گئدن ووردی
وجودن تیغیلر بیر آیری آلامه دچار ائتدی
..
..
هوایه قالخزیب شمشیرینی بیر خصم دیوانه
که یاخسین قان حناسین تئل به تئل زلف پریشانه
سالیب شهزاده نی القصه آتدان قانلی میدانه
جفاسی شاه مظلومی دوباره داغدار ائتدی
..
..
یئتیشدی اوغلونون بالینینه تا سرور عالم
بیوردی آچ گوزون ای گوزلریم نوری منه همدم
نه دن زلفون کیمی سویله بئله جسمون اولوب برهم
گوزومده وضع بو جسمون نهاری لیل تار ائتدی
..
..
آخور قان چشمه تک هر یاردن تپراقه پیوسته
بسان گل سپولموش زلف شبرنگون تراب اوسته
بئله معلوم اولان دشمن سنی چوخ ائیلییب خسته
زبس که هر بیری حقونده ظلم بیشمار ائتدی
..
..
گرک عالم بوغمده لاله تک ائتسون گریبان چاک
سس آچسون صاعقه مثلی بولود تک آغلاسون (دلپاک)
نَدَندی اولمادی حیرتدیم بس سرنگون افلاک
بوغمده نالهٔ جانسوز اودمکی شهریار ائتدی
..
..
#اکبریه #دلپاک #اکبریه_شجاعت #اکبریه_شهادت #ترکی #زبدةالاشعار
نظر دهید