مرتبۀ عشق و شهادت علی اکبر(ع)
.
.
.
سیفی اردبیلی
.
عشق آدی به به یارادوب جان گنه مستانه لره
اهل ولا نغمه سالوب معنوی میخانه لره
.
هر یره باخسون چکیلوب شاه شهیدان قره سی
پرچم سقّا ورولوب خانه و کاشانه لره
.
عشق حسین باده سینی ساقی غارتگر جان
دولدوروب اللرده اولان ساغر و پیمانه لره
.
عطر محرّم یایلوب گوگلره چون عود جنان
بال ملک فرش اولونوب جمله عزاخانه لره
.
گوز یاشوون قدرینی بیل مشتریسی فاطمه دی
اوخدى سنون ناله سسون سینۀ بیگانه لره
.
ائتمه اِباء آغلاماقا قیلما قناعت سسیوه
نغمۀ عشق عار دگل عاقل و فرزانه لره
.
جنّته سگّیز قاپی وار بیر قاپی مختص آچیلار
بزم حسینده اوتوران عاشق دیوانه لره
.
سن ملکیدون گتوروب آدم ایدوب خاک نشین(1)
دُرّی مشیّت داغیدوب گوشۀ ویرانه لره
.
بیر آقانون نوکریسن روح الامین ئوپدی الین
خط عدم وردی آدی دهریده افسانه لره
.
گوهری صرّاف تانور عنبری عطّار گزر
پیله ساتانلار نه بیلر قیمتی دردانه لره
.
یاریمزون زلفی بیزیم حبل متین آیتیدور
عشق گرک ناب اولا تا زلف اوتورا شانه لره
.
عزّتیم عشقیمدی منیم لعنت او جاهللره که
باطل و بیهوده بیله یانماقی پروانه لره
.
.
.
قلبه جلا عشقیده دور روحه صفا عشقیده دور
مَن عَرَف الّهه باخون نور خدا عشقیده دور
.
گور نچه مین ایلدی گئچوب کرب و بلا واقعه سی
قاره گیوب پیر و جوان نوحه سرا عشقیده دور
.
قاعدۀ جنگ بودور باش کسیلر قان توکولر
زنده دی نام شهدا رمز بقا عشقیده دور
.
کوی حقیقتده بیری پیر اولا گر مثل حبیب
چشم دیانتله گورر یاخشی حنا عشقیده دور
.
قوردی حسین خیمه لرین کرب و بلانون چولینه
سویلدی یار و حرمه جانه صفا عشقیده دور
.
جلوه گه یاردی بو دشت غم انگیز منه
راه ولایت گیدنه وار نه بلا عشقیده دور
.
سوق محبّتده ئوزوم گوهر جان ساتمالیام
حقّه طرفدار اولانا ارج و بها عشقیده دور
.
گیتسه مخیّر دی گیدن رجعته یول باغلی دگل
وصلت یار آختارانا سلم و رضا عشقیده دور
.
عهدیمی من باغلامشام یاریمله روز الست
الده نه سرمایه واریم حُکم فنا عشقیده دور
.
یوخدی سو بلبل لریمه گلشنیمی غم بوریوب
خیمه قرانلوقدی اگر نور و ضیا عشقیده دور
.
جلوۂ یار آختارورام مقتله روحیم تلسور
سوز دیمیشم دلبریمه ایندی وفا عشقیده دور
.
ثروتی سعد اوغلی گزور خنجره من مشتریم
قلبیمی اوخ یارسا گورر هر نه جلا عشقیده دور
.
.
.
کئچدی زمان سرعتیله عشق الی میدان بزه دی
کوللری پروانه لرون صحن شبستان بزه دی
.
یتمیش ایکی عاشق او گون گیدی شهادت کفنین
مرشد میخانۀ حق ابجد یزدان بزه دی
.
غم توزی یوزدن سیلینوب لبلره لبخند گلوب
لشگر حق عشق صفین خرّم خندان بزه دی
.
هر ننه بیر بوقچا آچوب هر باجی بیر تل دارادی
یار ایوینه یوللاماقا دستۀ ریحان بزه دی
.
یارینه لبّیک دیوب عشقینه تبریک دیوب
لیلی جوان اکبرینی دلبره قربان بزه دی
.
هامّی تماشایه دوروب جان حسین دوشدی یولا
صبحیدی خورشید ایله بیل صحن بیابان بزه دی
.
هر قدم آتدیقجا اوغول سسلدی جان جان ننه سی
گوزیاشی آردیجا سپوب یوللاری افغان بزه دی
.
سسلدی اوغلوم گیدوسن تلّه جن آهسته یری
گلشن لیلانی بو گون پنجۀ طوفان بزه دی
.
من دیمورم گئتمه على تزتز اقلاً منه باخ
گور نجه لیلا اوره گین آتش هجران بزه دی
.
زحمت اون سگّیز ایله تلّه چاتان یرده دایان
قدّیوه باخدوقجا دیوم سرو گلستان بزه دی
.
حرمت مولایه گوره ئوپمدیم عطشان لبیوی
قسمتیم اولسا ئوپرم اوندا که القان بزه دی
.
کاش ئوله لیلا گوزلیم خیمه لره سن گلنه
گورمیه طوی کوینگوی قان نجه الوان بزه دی
.
.
.
دست قضا دردی گلی باخمادی گل پرورینه
یاخدی قزل قانی حنا تازه جوان اللرینه
.
جانی چخان لحظه على گلدی دیله زحمتیله
قانلی لبی ویردی سلام عشق ایوینون رهبرینه
.
اکبرینون آلدی سسین خیمه ده مظلوم امام
قوش کیمی گلدی آلا تا لاله نی زیر پرینه
.
یرده گوروب گل ئووقین دوشدی یوزی اوسته یره
یدّی قدمدن سورونوب سمت گُل پرپرینه
.
گوردی که اوخلار سینه سین سیندروب آئینه کیمی
جدّی علی تک باشینون یاره سی دوشمش درینه
.
قدّین اگوب ئوپدی اول باشدا که خنجر یاراسین
مرثیه خوان اولدی ئوزی ماتم نیلوفرینه
.
کول بیله دنیانون على سویلدی سنسیز باشینا
ایلمدی ذرّه وفا فاطمه نون گوهرینه
.
سینه دن اوراق گُلون یاخدی گلابین الینه
عشقینی تبریک دئدی اشبه پیغمبرینه
.
عالم معناده دیدی ای گوزیمون نوری بالا
ایندی یاخوب فاطمه ده قانوی ئوز معجرینه
.
باخدی بیر آز قرمزی قان سرمه چکن قاش گوزینه
هی دیدی یاندیم ولدی چالدی الین دیزلرینه
.
سردی یره کهنه عبا حمل ایده اوراق گلی
طوطی غم تک دوداقین قویدی لب شکّرینه
.
ئوپدی دیدی بو ئوپوشون اجریده لیلانون على
ایندی آپارّام سنی من غرق ایدر اشک ترینه
.
(1)من ملک بودم و فردوس برین جایم بود
آدم آورد در این دیر خراب آبادم (حافظ)
.
.
#اکبریه_سیفی_اردبیلی
#اکبریه_شهادت
#عشق_آدی_به_به_یارادوب_جان_گنه_مستانه_لره
#ترکی
.
.
نظر دهید