مجلس ابن زیاد
.
✍️ زبدة الاشعار ✍️
?: @nohe_torki
.
مرحوم تائب تبریزی
.
جفا پیکانلارین قویما کمانه یابن مرجانه
یارالی دللری ایتمه نشانه یابن مرجانه
.
گتورمه توسن کفرون بیله میدان جولانه
غروریله شماتت ایلمه چوخ اهل ایمانه
بو قدری دل یاراسی وورما قلب آل عمرانه
قان اولموش دللری دوندرمه قانه یابن مرجانه
.
حیا قیل بیر بیله شرم و حیا بنیانینی یخما
فشاره سالما آل بوترابی بیر بیله سخما
سسون کس، آز دانش، گفتاریده اندازه دن چخما
گتورمه چوخ یالان سوزلر بیانه یابن مرجانه
.
اوزون آزما، غروریله دولاندورما گوزون گوزله
هوای نفسیله بیخود دانیشما، اوز سوزون گوزله
بیله چخما اوزوندن، هوشه گل ظالم اوزون گوزله
جهنّم تک بیله چکمه زبانه یابن مرجانه
.
ازل باخ گور طرف کیمدور اولان ای منکر مذهب
صورا طعن و شماتت قیل شروع ایله صورا مطلب
آتامدور نفس پیغمبر، منم زهرا قیزی زینب
منم مرضیّه زهرادن نشانه یابن مرجانه
.
بیزوخ اوّل اولوب آب و گلیمیز نوریله تخمیر
گلوبدور حقّیمیزده سوی حقدن آیۀ تطهیر
بیزوخ بو آیۀ تطهیر اوچون معنا، بیزوخ تفسیر
بیزوخ مشمول هر عالی معانه یابن مرجانه
.
بیزوخ روح ولایت، بیزده انوار ولایت وار
بیزوخ معنای عفّت، بیزده عفّت وار نجابت وار
جنایت اهلی سیزسوز، طینتاً سیزده خباثت وار
سیزی یاخشی تانور اهل زمانه یابن مرجانه
.
بیزوخ که جدّیمیز محبوب ذات حیّ اکرمدور
اونیله فخر قیلّوخ، مفخر اولاد آدمدور
بیزوخ آدم باشیندا سایه میز تاج مکرّمدور
یتر روزی بیزیله انس و جانه یابن مرجانه
.
بیزوخ آزاد ایدن خلقی، ووران بند و رسن سیزسوز
بیزوخ روزی رسان ماسِوا، روزی کسن سیزسوز
بیزوخ عبد خدای ذوالمنن، عبد وَثَن سیزسوز
بیزیله دور ایدر دور زمانه یابن مرجانه
.
حسینیم حقّیدی، حق سوز دیدی، حقّه طرف گیتدی
مجازه اگمدی باش، باحقیقت باهدف گیتدی
قزل قانیله قویدی باشینه تاج شرف گیتدی
ویروب درس شرف اهل جهانه یابن مرجانه
.
ولی سن عنصر ناپاکسن میشوم طینت سن
نهادوندا خباثت واردی، بیر تخم خباثت سن
سراپا شرّسن، روح شقاوتسن جنایتسن
توکوبسن چوخلی قانلار جابرانه یابن مرجانه
.
ایله بی شرم سن فکر ایتموسن کیملر اسیروندور
اسیرون رهروان حقدی، باطل اوز مسیروندور
خبیث و فاسق و فاجر اوزونسن هم امیروندور
اولوبسان منتسب سفیانیانه یابن مرجانه
.
سن ای روبه صفت فکر ایتمه قول باغلی اسیرم من
ائلیم یوخ طایفم یوخ دلشکسته دستگیرم من
آتام شیرخدادور شیرزن بیر ماده شیرم من
اولار شیرین بالاسی شیر یا نه یابن مرجانه
.
بیله سانما اسیرم من، بیله قولدا رسن گلدیم
حسینین عشقینه اولدوم اسیر مُرتَهَن گلدیم
حسینیم باشیله گوردوم گلور بو بزمه من گلدیم
گیدر زینب حسین گیتسه هایانه یابن مرجانه
.
اسیر عشق اولدوم، امتحاندان چخماقا گلدیم
سنون روح کثیفون قدرتیمله سخماقا گلدیم
جنایتخانه وی اوز باشیوه من یخماقا گلدیم
گرک ویران اولا هر ظلمخانه یابن مرجانه
.
سن ئولدوردون حسینی، هندین اوغلی کامگار اولسون
پوزولسون رونق اسلام، اسلام اهلی خوار اولسون
حسینیم گیچدی جاندان دین و قرآن پایدار اولسون
هم استقلال آلا اسلامیانه یابن مرجانه
.
حیا قیل بیحیا تشکیل ظلمی قورما بیر بیله
جفا بسدی، ستمله عالمی دولدورما بیر بیله
فناریله حسینین لبلریندن وورما بیر بیله
دگل ضربت سزا غنچه دهانه یابن مرجانه
.
بابامیز حضرت طاها ئوپوب بو گل دوداقلاردان
آتامیز عالمه مولا ئوپوب بو گل دوداقلاردان
آنامیز حضرت زهرا ئوپوب بو گل دوداقلاردان
اوتانمورسان وورورسان تازیانه یابن مرجانه
.
بولورسن هیچ توکوبسن سن کیمین ای بیحیا قانین
توکوسن سو یانیندا تشنه شاه کربلا قانین
نه شاه کربلا بلکه توکوبسن مصطفی قانین
چتیندور خونبها بیر ایله قانه یابن مرجانه
.
نه اندازه سنی سرمست ایدوبدور بادۀ دنیا
عزای دیندور، جشن عمومی ایتموسن برپا
چالور رجّاله لر اوینور سالوبلار مجلسه غوغا
ندور بانگ نی و چنگ و چغانه یابن مرجانه
.
ایشیتدی بو بیاناتی خانیمدان ابن مرجانه
یریندن دوردی ایتدی حمله دخت شیریزدانه
خانمدا دوردی، حمله ایتدی بی پروا دلیرانه
دیدی ساکت اول ای شوم زمانه یابن مرجانه
.
حسینیمدن صورا مین ایل هر آنِ عمری بولّم من
اودور هر گونده مین یول برملا ئولّم دیریلّم من
آخار گیزلینجه اشکیم، خوردا قیزلار باخسا سیلّم من
مبادا غم ییه بیر نازدانه یابن مرجانه
.
بیله ننگین حیاتی هر بد و نیکی سیچن نیلر
کفن بیر گونده یتدی نازلی قارداشه بیچن نیل
ئولومدن قوخماقی دین اوسته جانیندن گیچن نیلر
جانیمدان گیچموشم منّتدی جانه یابن مرجانه
.
حُرِیث اوغلی دیدی ابن زیاده بو نه عالمدور
گورورسن بیر خانم که دردی وار پیچیدۀ غمدور
گیدوب قارداشلاری الدن غریق اشک ماتمدور
ندور رفتارِ بس نابخردانه یابن مرجانه
.
اونی سن قصد ایدنده بو کسوک باش زینبه باخدی
اریتدی قلبیمی حسرت باخیشدا، یاندیروب باخدی
او زیبا گوزلریندن قانه باتموش گوزیاشی آخدی
دوزوب سیم اوسته گوهر دانه دانه یابن مرجانه
.
او حسرتلی باخیش میزاندور بیر رمز رافتدن
حکایت ایلوری قارداش باجیلیقدا محبّتدن
گوتور ال نچّه قارداشی ئولن بیر یاسلی عورتدن
تغیّر ایتمه قارداشسیز قالانه یابن مرجانه
.
اونی درد آغلادور، دردین اورکده ایلمه تجدید
بو زینبدور، وقار فاطمی وار بوندا بی تردید
ئولومله ایلمزله قارداشی ئولموشلری تهدید
جسارت ایلمه بو باغری قانه یابن مرجانه
.
دوتوب دوتقون آیین اطرافینی گوزیاشیلی اولدوزلار
دگوبدور بیربیره آغلار، گلور داده اوغولسوزلار
دوتوب دامانینی واعمّتا سسلر خانم قیزلار
چخوب ناله صداسی آسمانه یابن مرجانه
.
ندور داغ عزیزان بولمه سن ظالم بولر زینب
او داغ حسرت افزانی نجه دلدن سیلر زینب
نه لازم زینب ئولدورماق، بو دردیله ئولر زینب
حسینسیز ایلمز رغبت جهانه یابن مرجانه
.
حُرِیث اوغلی نصیحت ایلدی گرچه او بی عاره
یوخیدی قابلیّت گوش جان ویرسون او گفتاره
خباثت آرتیروب اوندا ولیکن نفس امّاره
دیدی قان توک بویا دنیانی قانه یابن مرجانه
.
اله فرصت سالوبسان خاصّ و عام ئولدور اوزون ساخلا
اوتانما ذرّه جه پیر و غلام ئولدور اوزون ساخلا
دی ظاهرده مسلمانم امام ئولدور اوزون ساخلا
باشارسان ضربه وور اسلامیانه یابن مرجانه
.
جهانه #تائبا گلمز حسین تک مردِ راد اوغلی
حسیندور روح زهرا، شیر حقّین شیرزاد اوغلی
حسین یوخدور، گر اولسا سسلنر مینلر زیاداوغلی
ولو بیر مرتبه گلسه زبانه یابن مرجانه
.
#مجلس_ابن_زیاد
#جفا_پیکانلارین_قویما_کمانه_یابن_مرجانه
#تائب_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید