مدح حضرت علی علیه السلام
#گریز به #تنور_خولی
..
..
..
حاج اسماعیل زرین
..
..
..
على محبتی قلبیمده آرتوروبدور نور
او نوریله اورگیم دائما اولور مسرور
على آدی دلیمه طاقت و توانادور
گلنده آدی وجودیمده قدرتیم آرتور
على محبتی هر حبّدن گلور فائق
لیاقت آرتورار هر دلده گر اولا مذخور
علی محبتینی فرض ائدوب بیزه خالق
بو خلقتینده علی حبّون ایلیوب منظور
سوور علینی نبی و رسول هم خالق
ملائكین سما جن و انس خلدیده حور
علی محبتی میزان نار و جنّتدور
یتر ثبوته بو مطلب اولان زمان دم صور
علی مقامینی عاجزدی دل ایده تقریر
علی مقامینی درک ایتمین گوز اولسون کور
علیدی منبع علم و علیدی معدن حلم
علی دی اشجع ناس و رضای حقده صبور
علیدی هیکل توحید علیدی رهبر دین
علیدی مظهر ذات خدا و مطلع نور
علی مجسمۀ عدل و داد مطلقدور
علیدی قائد عادل علی مبارز روز
علیدی گوندوزی صائم گیجه لری قائم
فقیر و بیكسه اطعام ائدن اولونجه سحور
یتیم اوشاقلارا بیر مهربان آتیدی علی
هامی ارامل و مسکینه بیرکفیل غیور
ایله شیرین دلیله دیندیردی ایتامی
آلاردی دللرینی یوز ورودی حال سرور
آدی خلیفه هامی فرده مهربان بیر آتا
امیدگاه بولردی اونی اناث و ذکور
کنار شهریده اصحابیله او شاه رئوف
تصادف ایلدی بیر کوچه دن ائدنده عبور
گوروب بیر عورتی چگننده سودی بیر کوزه
گیدور ولیک آپارماخلیقا دگل مقدور
یتوب بویوردی سوئی ویر منه آپارام من
یوروب سنی گورورم خاطرون اولوب رنجور
آلوب سوئی دیدی یوخدی سنون مگر کومكون
ندور سبب بو ایشه اولموسان اوزون مامور
دیدی منیله على باره سینده حکم ائتسون
عدالتیله گوروم کردگار یوم نشور
جهادلرده منیم صاحبیم اولوب مقتول
یتیم لر منی بو امره ائیلیوب مجبور
منه یتیشموری حالیمدن اولموری حالی
منی زمانه فشاراتی ائیلیوب محصور
سوئی آپاردی یتوردی امام منزلنه
دعا ائدوبدی أمامی یتوبدی حال سرور
قیتدی شاه ولا فورا آردیله خرما
آلوبدی دوشینه گتدی فسرده حال و فکور
یتوردی عورته وئردی بویوردی حاضر اول
تنوری روشن ائیله تا چورک اولا فی الفور
گلوبدی عورته بیر روح تازه شاد اولدی
گوروب بو لطف خدا ائیلمزدی فکره خطور
دیدی آقا سن اوزون قیل اوشاقلاری مشغول
اگر چه زحمت اولار دوت گلن اوزون معذور
خمیری حاضر ایدوم اود سالوم تنوره اوزوم
سنه کمک ائیله سون هر زماندا حیّ شکور
اوشاقلاری آتالار تک امام ایدوب مشغول
اولاری دیندیروب هم گولدوروب قیلوب مسرور
ویرردی خرما اوشاقلار ییوب دیردی امام
گذشت ائدون منی سیز منده گر اولوبدی قصور
خمیر ائیلدی عورت تنوره اود سالدى
اوجالدی تا که او مطبخ سراده دور تنور
نه مدتیدی که اود یانمامیشدی مطبخده
نه چونکه فقر اودی دائم یاناردی شام وسحور
گورنده دود تنوری او دمده همسایه
ظنین اولوب بو نه اوددور و یا نه حادثه دور
گلوب دوگوب قاپونی ائیلدی تفحّص حال
دئدی که خیر اولا بو اود ندور تنور یانور
جواب وئردی منه لطف حق اولوب شامل
بو منزله بیر عربدور بو گون ائدوبدی عبور
بیزه تدارک ایدوبدور او آردیله خرما
اوشاقلاری ایلیوب شاد حق ائده ماجور
گلوبدی منزله تا که او دمده همسایه
گوروب عرب نه عرب میراهل تقوا دور
زمامدار امم دور خلیفة الله دور
او منزلی ایلیوب گون جمالی وادی طور
اوزی او عورته تنوریده چورک پیشرور
تنور اودون گوروب اللهینه پناه آپارور
دیور الهی اوزون رحم قیل جهنم اودون
خموش ائیله على اودّا اولماسین مقهور
دیدی اوعورته آیا ندن تانومورسان
بونی بو کیمدی مگر سنده یوخدی عقل وشعور
بومرتضادی ابوطالب اوغلی شیر خدا
علی خلیفۀ مسلم امام وحش و طیور
امام مفترض الطّاعه دور ابواایتام
ائدن ارامیله شام و سحر ده حمل فطور
امامی تا تانیدی عورت اولدی ناراحت
دل آچدی معذرته عارض اولدی شرم حضور
گذشت قیل آقا شرمندیم حضوروندن
بیر عمر گوگلوم ائوین لطفون ائیلدی معمور
سوور رسالتنى حق کیمه عطا ایلر
دوغا نظیریوی مشکلدی بیرده مام دهور
بو یرده خاطریمه دوشدی اوزگه بیر قصه
دوشنده یادیمه دلدن آپاردی صبر وقور
همان بوکوفۀ ویرانه ایچره یا مولا
عوض بو لطفیوه بیر اوزگه مطبخ اوزگه تنور
یتیمه قیزلارا سن ائیلدون تدارک نان
ولی حسینه نه ظلم ائتدی کوفیان شرور
باشین کسوب گتوروب قویدولار کول اوستونده
او باش که باشینه بالش اولاردی سینۀ حور
سویوب بالالارینی ائتدیلر پریشان حال
سالوبلا گوشۀ زندانه فرقۀ مغرور
بیر عورت اوندادا مطبخ سرایه گلدی گوروب
امام عصر همان یرده ایلیوبدی ظهور
او تیره شبده دل شبده کنج مطبخده
تنوریدن اوجالور لمعه لمعه گویلره نور
تعجبیله دیدی بو گیجه نه عالمدور
مگر کلیمیدی ائیلوب تنوری وادی طور
کلیم ظاهر ایدوبدور مگر ید بیضا
که خجلتیندن اوزون گیزلدوبدی چهرۀ خور
باخاندا گوردی تنور ایچره نازنین بیر باش
او یرده خولی بیدین ایدوب اونی مستور
علاوه بیر یارالی سس گلور آناسیدور
ائیله جگر یارالور هی اوغول دیور آغلور
حسین حسین دیوری متصل توکور قانیاش
ایشیتدی بو سوزی اولدی قضیه دن مشعور
ایکی اللّی باشینه ویردی دیدی آقام ایوای
سنی شهید ائیلدی هانسی بی حیا و جسور
آتا بالا آدی «زرین» سوز اوستونه گلدی
چوخ ایسته حق سنی بونلاریلن ایده محشور
.
#حیدریه #اسماعیل_زرین #حیدریه_مدح #تنور_خولی #ترکی #زبدةالاشعار
نظر دهید