زبانحال حضرت زهرا (س) به حضرت علی (ع)
..
..
مرحوم کریمی مراغه ای
..
..
گل سینمی مسمار ایلدی یاره عم اوغلی
یول تاپدی عدو مخزن اسراره عم اوغلی
..
..
یانمش اوره گیم تیر بلایه هدف اولدی
اود ویردیلا یاندی قاپی جای اسف اولدی
دیواریله در سیخدی جنینیم تلف اولدی
گل ایله بو درده سن اوزون چاره عم اوغلی
..
..
نامحرمه گوسترمه میشم من بو جمالی
مستور ایلمشدیم هامی گوزدن بو جمالی
قویما اوز ایویمده گوره دشمن بو جمالی
باشیم آچیلوب قالمشام آواره عم اوغلی
..
..
..
من فاطمه یم پردۀ عفتدی نقابیم
طاها قزی یام عیبدی کشف اولسا حجابیم
سقط اولدى بالام صبر ایدرم وار بونا تابیم
ئوللم بیری گر باخسا بو رخساره عم اوغلی
..
..
عورتده حجاب اولماسا عفتدن اوزاقدى
چون کشف حجاب امر شریعتدن اوزاقدی
قالسون باش آچوخ فاطمه غیرتدن اوزاقدی
سرّ ازلی کشف اولور اغیاره عم اوغلی
..
..
دشمن نظرینده دوتوب اندیشۀ ظلمی
عدلیۀ اسلامه ورور تیشۀ ظلمی
بیر آهله بیلمور کسرم ریشۀ ظلمی
عبرت اولا هر حاکم جبّاره عم اوغلی
..
..
ای منشی عدلیۀ دیوان الهى
وی حامی دین ناطق قرآن الهی
ای تیغی اولان مجری فرمان الهی
گل قویما اجانب گله درباره عم اوغلی
..
..
تیز گل اوره گیم یاندی شرار غم ایچینده
باتدیم گنه بیر ماتمه بو ماتم ایچینده
قویما قالا ناموسیوی نامحرم ایچینده
بیردم ال آپار تیغ شررباره عم اوغلی
..
..
بیلمم بو قدر ظلمله زهرا ندن ئولمور
آخر حسنیم هاردادی احوالیمی بیلمور
ئولدوردیله زهرانی حسینیم نیه گلمور
بس هاردا قالوب زینب مهپاره عم اوغلی
..
..
اون سگّیز ایل عمر ایتدیم عم اوغلى من نالان
بو مدّت عمریمده یوزوم گولمدی بیر آن
همدم منه گوز یاشی اولوب مونسیم افغان
تیر غم ایدوب گوگلمی صد پاره عم اوغلی
..
..
گلمزدی منیم فکریمه اصلاً بو جسارت
سن اگلشه سن ایوده فراغتله سلامت
زهرانی حضورونده دوگه اهل شقاوت
گل قویما دچار اولدی گلون خاره عم اوغلی
..
..
مندن صورا زینبدی منه نایبۀ غم
اسلامه طرفداریدی قویماز یاتا پرچم
زینبدی ایدن ناقه ده قرآنی مترجم
اتمام ایلین حجّتی کفّاره عم اوغلی
..
..
بیر گون آچاجاق عشق دبستاننی زینب
تعقیب ایده جاق جدّینون عنواننی زینب
دشمندن آلار محسنمون قاننی زینب
مکتوبۀ ظلمی ایده جاق پاره عم اوغلی
..
..
بیرگون گله جاقدور دله بازار آراسندا
اثبات ایده جاق حقّینی کفّار آراسندا
دیلّندیره جاق یارینی اغیار آراسندا
آتش ووراجاق خرمن اشراره عم اوغلی
..
..
بیر گون گیده جاق باشی آچوخ بزم شرابه
بیر شرح مفصّل ویره جاق متن حجابه
اعلان ایده جاق کفر یزیدی او خطابه
دین فخر ایده جاق بیله فداکاره عم اوغلی
..
..
ال وورما «کریمی» داخی کیفیت شامه
آهون شرریندن دوتار اود دفتر و خامه
زینب نجه گیتدی باش آچوخ مجلس عامه
بذل ایت صله بو یازدیقی اشعاره عم اوغلی
..
..
#فاطمیه #کریمی_مراغه_ای #فاطمیه_شهادت #ترکی #زبدةالاشعار
نظر دهید