شهادت حضرت علی (ع)
#گریز به #کوچ_از_کربلا
..
..
فیروز حسنی (ناجی اردبیلی)
..
..
علی ئولنده آلوب دوره سین بالالاری
حسین ئولنده فغان ایلیوردی قزلاری
..
علی ئولنده واریدی یانینده آغلیانی
حسین ئولنده یوخیدی گوزونی باغلیانی
..
علی ئولنده گوزین باغلادی امام حسن
حسین ئولنده ولی شادلیق ایلدی دشمن
..
علی ئولنده سارالدى جمال زیباسی
حسین ئولنده یارالیدی یکسر اعضاسی
..
علی ئولنده سمایه اوجالدی صوت نوا
حسین ئولنده سما اهلی قوردی بزم عزا
..
علی ئولنده پریشان اولوبدور انصاری
حسین ئولنده یوخیدی وفالی سرداری
..
علی ئولنده هامی عشقینی نشان وئردی
حسین ئولنده قوری تپراق اوسته جان وئردی
..
على ئولنده بالالارین ووران یوخیدی
حسین ئولنده ولی زینبی دوگن چوخیدی
..
علی جنازه سی حمل اولدی قبره اللرده
حسین جنازه سی باشسیز قالوبدی چوللرده
..
على جنازه سینه آری ال تاپان یوخیدی
حسین جنازه سی اوستونده آت چاپان چوخیدی
..
بلالی چولده حسین عالی امتحان وئردی
سو ایچمدی ره جاناندا تشنه جان وئردی
..
اون ایکی ضربتیلن باشی ذبح اولوب دالدان
او قدری یاره دگوب پیکری اولوب شانشان
..
ائدوبدی نیزه نون اوسته یارالی باش معراج
توكولدی وحشی عرب خیمه سین ائدوب تاراج
..
گئدوبدی غارته حتى او کهنه پیرهنی
قالوبدی گون قباقیندا یارالی گل بدنی
..
دوشوبدی مقتله بی سر امام تشنه لبان
اولوبدی داشلارین آلتیندا گل بدن پنهان
..
گلنده مقتله زینب توکوبدی گوز یاشینی
تاپوبدی داشلارین آلتدان وفالی قارداشینی
..
سرشک غمله أول دولدوروب ایکی گوزینی
یارالی سینه نون اوسته صورا قویوب یوزینی
..
دئدی حسین یارالی جانووه باجون قربان
اوخون یریندن آخان قانووه باجون قربان
..
اورکده اوخ یاروا خون جگر باجون قربان
تفاقی برهم اولان دربدر باجون قربان
..
بدنده یوخدی باشون من ئوپم دوداقوندان
اجازه وئر منه قارداش ئوپوم ایاقوندن
..
سنی قسم وئرورم قامتی کمان ننه مه
گونوز ئولوب گئجه قبره گئدن جوان ننه مه
..
شرار محنته آز قلبیمی آلیشدیر حسین
بو بختی قاره باجون زینبی دانیشدیر حسین
..
قانیلا سو یرینه دستماز آلان قارداش
کسیلن اللریلن جانماز سالان قارداش
..
سه شعبه تیرله قارداش اورک باشی سوکولوب
اوخی چکنده یره خون اطهرون توكولوب
..
شماره یاره لرون گلمیور بدنده حسین
قویام مزاره سنی چوخدی بیر کفنده حسین
..
من آغلورام سنه هم عون و جعفر و فضله
یتیشمیور آتام اوغلى الیم اباالفضله
..
بلالی زینبی عباس ائله گوزوندن آتوب
کنار نهریده قدّ بلندی قانه باتوب
..
پیمبر عترتینی سویدی لشکر خنّاس
نقدری سسلدیم امداده گلمدی عبّاس
..
رقیّه نون یوزینه زجر دون ویروب سیلی
آنام بتول کیمی گل یوزی اولوب نیلی
..
علیّ اکبر آلان گوشواره غارت اولوب
بالاجا قلبی حسین قورخودان جراحت اولوب
..
دوتوبدی دامنی اود نازدانه دختروون
بهار و گلشنی دوندی خزانه دختروون
..
حسین گوزوندن ایراق باغلانوبدی قوللاریم
یارالی نعشووی گوردیم پوزولدی افکاریم
..
بو پاره پاره بدن الدن آلدى طاقتیمی
چوخالتدی غملی اورکده غم مصیبتیمی
..
نقدری ساغدی جانیم آغلارام فراقونده
بو غصّه لی اورگی داغلارام فراقونده
..
دیار شامه گئدور یاحسین بلالی باجون
عزا لباسی گیوب آغلیور عزالی باجون
..
اجازه وئرمیور اعدا یاسیوی ساخلاماقا
که قویمیولّا منی بیر دویونجا آغلاماقا
..
قزل قانونلا بو آغ ساچلاری خضاب ائلرم
یارالاروندان ئوپوب عالمی کباب ائلرم
..
دوشوبله بحر غمه «ناصحیله» «ناجی» آقا
دوتوبلا دامنوی درد و غمدن ایله رها
..
..
..
#حیدریه #ناجی_اردبیلی #حیدریه_شهادت #ترکی #زبدةالاشعار
نظر دهید