نامه حضرت صغری (س) به حضرت علی اکبر(ع)
.
✍️ زبدة الاشعار ✍️
.
🆔: @nohe_torki
.
رجبعلی محمدی (زاهد زنجانی)
.
علی فراقون اودی هر دقیقه شدّت ائدر
مریض عشق اولانا کیم گلر طبابت ائدر
.
مریضه باجوا چوخدور محبّتون بیلورم
ولی دچار غم و ابتلا بو فرقت ائدر
.
علیل ائدوب آتاسیزلوق غمی ائل آیریلوقی
مریض بستری بو درد بی نهایت ائدر
.
آیوردی جور و جفای عدو سنی مندن
ندندی دشمنیمیز بیر بئله عداوت ائدر
.
گوروم قالا گوزی یولدا،دوشه ائلیندن اوزاق
او کس که باجینی قارداش یوزینه حسرت ائدر
.
(غذا اورک قانیدی شربتیم گوزوم یاشی)
غم ال گوتورموری مندن عجب سماجت ائدر
.
توکنده گوزیاشی جدّه م منه نوازش ائدر
او مونسیمدی منیم حالیمی رعایت ائدر
.
دُوزرم هر غمه اما یانیمدا سن اولاسان
محبّتیله فقط باخماقون کفایت ائدر
.
(خدا نکرده اگر سن گلینجه من ئولسم)
کیمیم گلوب علی قرآن منه تلاوت ائدر
.
کیمیم مزار قازار؟ کیم منی قویار قبره
کیمیم عزا دوتار آغلار غمیمده شرکت ائدر
.
ئولوم چتیندی ولی آیریلیق چتین راقدور
کیم آیریلوق غمینه بو جهاندا طاقت ائدر
.
علی الخصوص سنون تک وفالی قارداش که
چکر همیشه باجی نازینی محبّت ائدر
.
غروب اولاندا اوتورّام قاپی قباقینده
گوروم نه وقت گئدن ائل قبیلم عودت ائدر
.
یوخومدا گوردوم علی اصغریم علی دل آچوب
دیور گولور دانشور خلقیله ظرافت ائدر
.
لباسی قرمزیدی گُل جمالی نورانی
دئسم بجادی،گونی، گل جمالی خجلت ائدر
.
علاوه قرمزی بیر گل واریدی گُل بوغازیندا
نه گل، تمام گلستانی باطراوت ائدر
.
دئدیم قوجاقیمه گَل ای گُل اوزلی شهزاده
اماندی آیریلقون قلبیمی جراحت ائدر
.
تَلَسورم دئدی محسن عَموم منی گوزلور
کوسر یوباتسام اگر قهر ائلر شکایت ائدر
.
آناما سویله که همبازی دور منه محسن
یغوبدی باشیمه یولداشلارین ضیافت ائدر
.
علی بو نه یوخودی اولموشام پریشانحال
بو خواب فکریمی مغشوش بی نهایت ائدر
.
آتاما عرض ائله تعبیرینی بیان ائلسون
دئسون، فلک نیه منلن بئله عداوت ائدر
.
خلوص نیّتون اولسا یقین ائله «زاهد»
جزاده حضرت زهرا سنه شفاعت ائدر
.
#حضرت_صغری
#علی_فراقون_اودی_هر_دقیقه_شدت_ائدر
#زاهد_زنجانی
#ترکی
.
✍️ #زبدةالاشعار ✍️
.
🆔: @nohe_torki
نظر دهید