علی نقدر بو شام اهلینون شقاوتی وار #اکبریه_تائب_تبریزی

زبانحال امام (ع) بر بالین فرزندش حضرت علی اکبر(ع)
.
#زبدةالاشعار
.
: @nohe_torki
.
مرحوم تائب تبریزی
.
علی نقدر بو شام اهلینون شقاوتی وار
گلن وروب یارا سانموبلا چوخ جراحتی وار
.
بو سرو قدّی ایاقدان سالان خیال ایتموب
غریب آتاسینا بو قامتین قیامتی وار
.
بهار عمر گُلوم پرپر اولموسان بیله
نشان ویرور سنه خار جفا جسارتی وار
.
دیوم بو پیکره گل ، بیله پرپر اولماز گل
ولی گلیله دولان گلشنه شباهتی وار
.
بو گلشنین گُلی دور یاره سنبلی اوخلار
گُل اوسته شبنمی قاندور عجب طراوتی وار
.
کتاب عشقدی جسمون ورق ورق داغلوب
که هر ورقده صفا و وفا کتابتی وار
.
گولن همیشه گُلوم ، بیرده گول منیم یوزومه
سنق بو قلبه صفا ویر صفایه حاجتی وار
.
سزیلدوری یارالار تک به تک بو پیکرده
بیان حالیله بیر بیرله یار صحبتی وار
.
سزیلدوسان بو سزیلتون قراریمی آلوری
سبزیلدادور منی ده قلبیمه سرایتی وار
.
بوسرو قدون اولوب نقش یرده صد پاره
دوروب آتان باشون أوسته خمیده قامتی وار
.
بلین بوکر آتانین رسمدور جوان ئولومی
خصوص سن تک ادبلی بالا که شهرتی وار
.
بیر آچ او نرگس مخموری باخ غریب آتاوا
باخور یانا یانا گوزده سرشگ حسرتی وار
.
علی او بیر باخیشون عمریله برابر دور
فدا او گوزلره که مصطفا نظارتی وار
.
گوزون یوماندا گوزومدن بو عالمی سالوسان
بو عالمین داخی سنسیز نه قدر و قیمتی وار
.
گوزوم ایشیقی دیزیم قوتی صفای دلیم
گیدر سنیله گوزوم نوری دل کدورتی وار
.
سن ال ایاق چالوسان داغلانور منیم اورگیم
همین او داغیله بو قلبیمون جراحتی وار
.
بو داغ قلبده جان یولداشیمدی حشره کیمی
بیر ایله یاره دی نه مرهم و طبابتی وار
.
من ایمدی بولدوم اوغولسوز قالان آتانه چکر
یانار ئولر دیریلر دردینون صعوبتی وار
.
سرور و عشق و علاقم بو جسمده روحیم
سنه نقدر بولورسن آتان محبّتی وار
.
گورنده روحیمی جان اوسته روحیم آیریلوری
باخان بو حالیمه سویلر که مرگ حالتی وار
.
نقدر اوخ وورولوبدور بو جسم شانشانه
علی تمامی سینین قلبیمه اصابتی وار
.
منیم بو عالمیمی درک ایدر جوانی ئولن
بولر غریب آتاوین نه ملال و محنتی وار
.
ایاقه دور آپاروم باغلاسون بی بون یاراوی
که یاره باغلاماقا چوخ اونون مهارتی وار
.
یقین گلوبدی باشون اوسته أحمد محمود
که مَصرَعونده رسول گرام نکهتی وار
.
پیمبر عطرینی آلّام یخلدوقون یردن
مشام جانین او خوش نكهتیله الفتی وار
.
گوروب سوسوز ویروسن جان الینده کاسۀ سو
گلوب سنه گتوروب فکرت سقایتی وار
.
جوان اوغول گزه نازیله گوز قباقینده
آتانی محو تماشا ایدر صراحتی وار
.
ایدردی محو تماشا منی گوزل یریشون
باخوب دیردیم الهی نه ناز قامتی وار
.
هزار حیف خطاکارلر یخوبلا سنی
دوشوبسن ایمدی ایاقدان كمال حسرتی وار
.
بو سرو قدّون ایاقدان سالوبلا قان ایچره
اگر دوشم من ایاقدان دیمه ملامتی وار
.
سنی بو حاله سالان ظالم ایتمیوب انصاف
نه رحمدَن خبری واردی نه مروّتی وار
.
وروبدی قلبوه خنجر دگوب منیم دلیمه
قیام حشره کیمی قلبیمون جراحتی وار
.
گلردی جوشه محبت ئوپم دیردیم ئوزون
اوغول یوزیندن آتا اؤپسه آیرى لذّتی وار
.
حیا ایدوب اوتاناردیم دیردیم ئوز ئوزومه
بو امرین اوزگه مناسب زمان و فرصتی وار
.
مدام ایله مناسب زمانی گوزلردیم
اؤپم او لعل لبوندن که چوخ حلاوتی وار
.
او حالی سالدیم اله حیف احتضاروندا
یوزون گوزون اؤپرم کامیمون مرارتی وار
.
سوزه گلنده اولاردون دلیمده سرسخنیم
سوزوم اولاردی بُنَیَّ مدام شهرتی وار
.
سکوت ایدنده قالاردون سوزوم کیمی دلده
دیله گلنده گورردیم دلیمده کَرَّتی وار
.
دوشردی یادیمه جدّیم باخاندا گل یوزیوه
بو اکبریم دی دیردیم رسول رُؤیتی وار
.
آتام علی کیمی باشدان قلجلیوبله سنی
آتام یاراسینا بو باره نین شباهتی وار
.
اوغول ئولنده آتا حال احتضاره دوشر
همین بو مسئله نین یوخ سوزی حقیقتی وار
.
اوغول ئولنده ویرللر آتاسینا تسکین
او امرین ایمدی ولی بوردا عکس صورتی وار
.
اورک یانور آخوری باشون اوسته گوز یاشیم
من آغلیاندا گولر دشمنیم شماتتی وار
.
نشان ویرور منه اوغلان لارینی سعد اوغلی
او ظالمین نقدر قلبینون قساوتی وار
.
دیمور که بال مگس دگسه گر سنار قلبیم
او داش اورک وروری داش نه پست فطرتی وار
.
ایاقه دور دوت الیمدن الیم عصاسی گیداخ
نه دیزده قوّه نه قلبیم توان و طاقتی وار
.
بی بون گوره آتائیله بالا گلور باهم
او گورماقین نگران قلبینه سکینتی وار
.
خلاص اولدون أؤزون همّ وغمّ دنیادن
آتان وحید قالور بیر جهان مصیبتی وار
.
بیر آز زمان صورا سنسیز دایانمارام گلّم
منه شهادتوین مژدۀ شهادتی وار
.
بو صون نفسده دانش بیرده بیر سسون ایشیدیم
شیرین دلیم سوزیوین آیری بیر حلاوتی وار
.
دگوبدی بیربیره مخیمده عمّه لر آنالار
خصوص اؤز آناوین خیمه ده قیامتی وار
.
گراندی تائب آتایه جوان اوغول ئولومی
سنون جوانون ئولوب صبر قیلسان اجرتی وار
.
على اكبره آغلا دوشنده یاده بالان
حسین عزیزیدی هر دلده ذکر و صحبتی وار
.
.
#اکبریه_تائب_تبریزی
#اکبریه_شهادت
#علی_نقدر_بو_شام_اهلینون_شقاوتی_وار
#ترکی
.
#زبدةالاشعار
.
: @nohe_torki