دیر راهب
.
✍️ #زبدةالاشعار ✍️
.
🆔: @nohe_torki
.
حاج مجید امینی تبریزی
.
عهدینده حسین ایستدی تا قالمیه نقصان
دیره یارالی باشی گیدوب بیر گجه مهمان
نوری یوزینون ایتدی کلیسانی منوّر
راهب او باشی ایلدی عطریله معطّر
.
.
اوّلده نظاره ایدوب اول پیر نصارا
انوار خدا اوندان ایدور گوردی تجلّی
معناده اولوب صومعه سی وادی سینا
ازبسکه دولوبدور باشینا شور حسینی
موسی کیمی محو ایتدی اونی نور حسینی
.
.
سالمیشدی گجه یر یوزونه پرده ی ظلمت
ناگه او باشی گوردی ایدور شوریله صحبت
دقّتله باخاندا نه گوروب بش نفر عورت
فریاده گلوب آتش حسرتده یانولّار
پروانه کیمی باشینه حیران دولانولّار
.
.
گوردی که قرائیله ملبّسدی تمامی
امّا که دوتولّار بیرینی خیلی گرامی
یوخ دیزلرینون حیف اولا یارای قیامی
غم اوسته اونون باشینه غملر توکولوبدی
قانه بویانوب اللری، قدّی بوکولوبدی
.
.
اشکیله اولوب گوزلرینون جامی لبالب
آغ ساچلارینی قانیله ایلوبدی مخضّب
ایلور یارالی باشی بو طرزیله مخاطب
ای مخزن عمریمده اولان دُرّ یگانه
کیم عمر گلستانیوی دوندردی خزانه
.
.
عشقون هوسی بو یره زهرانی گتوردی
دوردومجی سمادن یره عیسانی گتوردی
فریاده غمون عالم امکانی گتوردی
هجرونده توکر خون جگر دامنه زهرا
ای کاش حسینیم اولا قربان سنه زهرا
.
.
نصرانینی جلب ایتدی بو حال اسف انگیز
پیمانه ی قلبی اولونوب عشقیله لبریز
گوردی او یارالی باشی چون غنچه ی نوخیز
ایگلور اُپور، آغوشه چکور جان کیمی طاها
عیسانی ایدوب شوریله سرگرم تماشا
.
.
مبهوت ایلیوبدور اونی بو قصّه ی جالب
بو فکره دوشوبدور ایده مکشوف مطالب
گل دسته سی تک آلدی او باشی اله راهب
چکدی او یانان دلدن ازل ناله ی جانکاه
عرض ایلدی کیمسن، منی قیل سرّیدن آگاه
.
.
ای چرخ وجاهتده یوزی نیّر اعظم
کیمسن دی گوروم، مطلبی قویما قالا مبهم
گل صورتیوه قانون اولوب قطره ی شبنم
سندن آلوری باغ جنان عطری مشامیم
یغمایه گیدور طاقت و آرام و دوامیم
.
.
معلومیدی باشون که چخوب گون کیمی سیره
تا عشق یولوب گوستره اخیاریله غیره
عشقون گتیروب حضرت عیسانی بو دیره
گورسه سنی عیسی نجه شوریده سر اولماز
مرآت خداسن که سنون تک بشر اولماز
.
.
دیداریوه شوریله گلوب مریم و سارا
سندن آپارولّار یارالی فیض تماشا
بیر قدّی بوکولموش خانم عورت ولی شاها
آغلار سنه چوخ شیونیله، ناله کناندور
حالیندن عیاندور که او بیچاره آناندور
.
.
نصرانی یتوردی سوزونی تا که تمامه
گلدی شه دینون باشی بو طرزی کلامه
سویلوب که یتورّم سنی منظور و مرامه
قدّی بوکولن فاطمیه نور دو عینم
دین اوسته باتان قانینه لب تشنه حسینم
.
.
چکدی سوزینی بو یره تا اول شه اشرف
نصرانیه مکتوم کلام اولدی معرّف
حق دینی دوتوبدور اولوب اسلامه مشرّف
آئینه ی دلدن سیلینوب زنگ جهالت
نادم اولوب اعمالینه، درک ایتدی سعادت
.
.
صبحه کیمی دور ایتدی اونون باشینه حیران
تا صبح آچیلوب آلدی او باشی گینه دونان
نصب ایتدی جدایه آپاروب شامه پریشان
خوش لحنیله کهف آیه سین ایلردی تلاوت
معناده اولوب بزمینه محشردن علامت
.
.
#عهدینده_حسین_ایستدی_تا_قالمیه_نقصان
#ترکی
.
✍️ #زبدةالاشعار ✍️
.
🆔: @nohe_torki
نظر دهید