زبانحال حضرت علی اکبر خطاب به عقاب
.
.
.
مرحوم غلامعلی باقری الهام (هوشی تبریزی)
.
سالما ای عقاب رزمگاهه
رحم ائت بولوسن بلالیَم من
سعی ایله منی یتور خیامه
آخر بولوسن یارالیَم من
.
.
باشیم یاریلوبدی مرتضی تک
شهلا گوزومه دولوبدی قانیم
جسمیمدن آخوبدی قانیم از بس
دلده داخی قالمیوب توانیم
تعجیلیله تیز یتور آناما
بو چولده باری چخنجا جانیم
بیکس آنامین بو گون بو چولده
سرمایۀ ایده آلیَم من
.
.
گل جسمیمه بس یتوب جراحت
دلدن سالوب ایلیوبدی خسته
هر بیر یتیشن ایدوب جسارت
اوخ نیزه وروبدی دسته دسته
خنجر یرینه دگوبدی خنجر
سانسیز ورولوبدی اوخ اوخ اوسته
آخر نفسیمدی زخم ظلمون
بو دشتیده خسته حالیَم من
.
.
آخر بولوسن که یوخدی صاف یر
گل گل آچولوب بدنده یاره
هر بیر یتیشن وروبدی یاره
گل جسمیم اولوبدی پاره پاره
صیّاد ستم شعار الیندن
باری منی چک اوزون کناره
باخمور که حریم چین عشقین
بیر قانه باتان غزالیَم من
.
.
بیر نجم سپهرعزّتم من
رخساریمه قان اولوبدی حایل
بونلا بیله نور و نیّر و مه
حاشا اولا نوریمه مقابل
جدّیم بابامون جمالی اولسا
گرعرش وفاده بدر کامل
اول عرش وفانین آشکارا
عالم بولوری هلالیَم من
.
.
هجریم بولورم غریب آنامون
الدن داخی اختیارین آلموش
فریاد و فغانی خیمه گهده
ایمدی فلکه اونون اوجالموش
قوینوندا الی اورکده دردی
حسرتله گوزی یولومدا قالموش
سویلور یتور اکبریمی یارب
پابست غم وملالیَم من
.
.
عالمده عقاب فی الحقیقت
چوخ زحمتیمی چکوبدی لیلا
ممکن دگی هر آنایه آخر
بیر بیله جوان ماه سیما
زلفی شب تار و صورتی ماه
شهلا گوزی قدّی نخل طوبا
گردین اولا فرض باغ جنّت
البتّه اونون نهالیَم من
.
.
گرچه ویروب اوخ قلج یاراسی
گل پیکریمه بو اهل کینه
مرجان محبّتیله امّا
دل گنجی دولوبدی چون خزینه
هر قطره یره دوشنده قانیم
بیر لفظ وفا یازار زمینه
سانما منی سن وفاسیزعاشق
معشوقیمه چوخ وفالیَم من
.
.
خلقتده ایدوبدی حیّ داور
آفاقیده منله کشف قدرت
خلق ایلیوب حُسن و صورتیمی
اوز جدّیمه یکسر عکس صورت
علت اودی پرتو جمالیم
خورشید و مهی ایدرخجالت
نوریمله جهاندا مهر و ماهین
سرمایۀ انفعالیَم من
.
.
یوخ باکیم اگر چه اهل کینه
گل جسمیمی چاک چاک ایلر
اول کیمسه دگل حقیقی عاشق
گر درد و بلاده باک ایلر
امّا گوره هر آنا جوانین
بو نوع اوزون هلاک ایلر
اولدورسه اوزون آنام سزادی
گر گورسه بیله یارالیَم من
.
.
آفاقیده «هوشی» سعی ایله
صرف ایلمه عمریوی فنایه
توک اشکوی گوزدن ایت ذخیره
مین شوریله عالم بقایه
یاز نوحه قیل اکبره توسّل
عرض ایتگله شاه کربلایه
مشتاقی او آلتی گوشه قبرین
هر روز و مَهیله سالیَم من
.
.
.
#اکبریه_هوشی_تبریزی
#اکبریه_شهادت
#سالما_ای_عقاب_رزمگاهه_رحم_ایت_بولوسن_بلالیم_من
#ترکی
.
.
نظر دهید