بقیع
.
.
مرحوم نجمی تبریزی
.
فخر ائت #بقیع سنده نچه پیشوا یاتوب
هر تک تکی اولوب غمیله آشنا یاتوب
.
امید ماسوادی او نچّه عزیز جان
اسلامه سنده نچّه امید و رجا یاتوب
.
زهرانی سنده دفن ایلیوب نصف شب علی
پهلو شکسته حضرت خیرالنّسا یاتوب
.
ضعف ایلینده فاطمه محسن که سقط اولوب
سنده بیله گمان ایدورم اُول بالا یاتوب
.
بیر خردا نازلی قارداشی خاتون محشرین
سنده اولوبدی محسنیله هم صدا یاتوب
.
جُعده ایدن جفائیله اکبادی دوغرانان
گونلر ایوینده قبری قالان مجتبا یاتوب
.
بوینوندا سلسله دولانان شام و کوفه نی
قان آغلیان آتاسینا زین العبا یاتوب
.
سنده قویوبدی حضرت باقر ترابه یوز
دلبند بوتراب ، او نور خدا یاتوب
.
مسموم زهر ، صادق آل محمّدی
مین حسرتیله سنده او میر هدا یاتوب
.
بیر قبر واردی سنده دل و جانه اود سالار
غملی همان او قبریده بیر بینوا یاتوب
.
دورت اوغلی تشنه قانه باتان قلبی اودلانان
بیر داغدار یالقوز اوغولسوز آنا یاتوب
.
ام البنین دور آدی عبّاس آناسیدور
قربان اولوم او قبره که اول باحیا یاتوب
.
بیر نچّه شهر واردی ائدر شیعه آرزو
اول شهرلرده نور حق کبریا یاتوب
.
اَوّل #مدینه دور که بقیع ، سن او یرده سن
دورت اوغلی اوردا بیر ده اوزی مصطفی یاتوب
.
بیر وادی #نجف دی که اوردا فسرده حال
باشدا قلج یاراسی شه لافتی یاتوب
.
جنّتده یوخدی خاک نجفده اولان شرف
اُول خاک پاکده یارالی مرتضی یاتوب
.
قربان اولوم او شهره آدی #کاظمین دور
کاظم لقب او شهرده بیر مقتدا یاتوب
.
آختارما آیری یرده جواد الائمه نی
اُول شهرده همان شه ملک سخا یاتوب
.
گلزار #سامراده گوگُل عندلیب دور
بیر جفت او شهرده گُل باغ وفا یاتوب
.
لیل و نهار کعبه ی آمال شیعه دور
#طوس آدلی شهر، اوردا امام رضا یاتوب
.
شمس شموس مدفیندور نور پخش اولور
مسموم اولوب او شهرده شمس الضحی یاتوب
.
بیر شهر #شامدی که اولا شام گوندوزی
اُول شهرده ایکی گونی بختی قرا یاتوب
.
ویرانه ده یاتوب بیری آدی رقیه دور
ایلوب او شهری منبع حزن و بکا یاتوب
.
زینبدی بیرده یثربی ترک ایلیوب گلوب
چوخ حسرتیله اوردا او زهرا نما یاتوب
..
بیر شهر واردی کعبیه وار افضلیتی
یتمیش نفر او شهرده گلگون قبا یاتوب
.
بیر آدی غاضریّه دی بیر آدی نینوا
بیر آدی #کربلا دی، شه کربلا یاتوب
.
صدر شریف شمسده مدفون اولوب سهیل
شه سینه سینده اصغر آدی دلربا یاتوب
.
پائین پای شاهیده شهزاده دفن اولوب
ایلوب ادب ملاحظه اول مه لقا یاتوب
.
اکبردی آدی ، جدّی پیمبر شبهیدور
قانه باتوب عقیق تک اُول باوفا یاتوب
.
اصحاب باوفائیله بیر یرده چاک چاک
قاسم حسن نشانه سی نو کدخدا یاتوب
.
طوی حجله گاهی طوی گونی بزم عزا اولوب
کام آلمیوب یاخوب اله قاندان حنا یاتوب
.
سیر ائت خدا حبیبی حبیبون جلالینه
شه آستانه سینده او رخشان سُها یاتوب
.
نهر علقم اوسته قولّاری پیکردن آیریلان
شهپر خدنگلردن آچان بیر هُما یاتوب
.
عبّاسدور گوزل آدی باب المراد دور
تشنه لبِ فراتیده صاحب لوا یاتوب
.
بیر خردا قبری واردی او شمشاد قامتین
بُلمم نجه او قبریده قدّ رسا یاتوب
.
#نجمی فدا اولا او مزاره آتام آنام
کیم اوردا پاره پاره او عطشان فدا یاتوب
.
#بقیع
#فخر_ائت_بقیع_سنده_نچه_پیشوا_یاتوب
#نجمی_تبریزی
#ترکی
#زبدةالاشعار
نظر دهید