فدا اولوم سنه ای وارث بشیر و نذیر #حضرت_رقیه_شعاع_تبریزی

زبانحال حضرت رقیه (س)
..
..
..
..
مرحوم شعاع تبریزی
..
..
..
..
فدا اولوم سنه ای وارث بشیر و نذیر
نه وار سنون کیمی مظلوم ئولن نه من تک اسیر
..
دیردیم اوز اوزیمه باشه چاتدی عمر ولی
گورنمدیم بابامی دردیمی دیم بیربیر
..
خدایه شکر اولا یار اولدی بخت بو دل شب
سنی یتوردی منه خالق علیم و خبیر
..
اگر چه چوخدی غمون دلده ای شه عادل
اجازه ویر ایدیم اوز سرگذشتیمی تقریر
..
رضایم ئولمگیمه دویموشام حیاتیمدن
رقیه قالماقی سنسیز بو دهریده نیلیر
..
جهاندا چوخلار اولوب ظلمیله اسیر اما
منه تاپولماز اسیران عالم ایچره نظیر
..
اوزون قضاوت ایله من هارا دوشاخه هارا
صغیره بیر قیزا جایزدی گور بو ظلم کبیر
..
هاچان که قولّاریما ایسترم ویرم حرکت
سخور دو شاخه سالور زحمته طناب کسیر
..
منیم نه وقتیمیدی بیر بیله بلایه دوشم
نجه بلا که اگر داغلارا توخونسا اریر
..
جلالیمیز داغلاندان اولوم سنه قربان
اولوب انیس منه آه و نالۀ شبگیر
..
نجه گور اولدی بو آهوی وادی ایمن
ستمله سنگدل اوچی کمندینه نخجیر
..
بابا او نازیله سیننده بسلین قیزیوی
نه حاله گور سالوب آخر او شمر شوم و شریر
..
من آغلیاندا سنه ساربان دؤیردی منی
دیمزدی یاسلیدی یوخ بو یتیمه ده تقصیر
..
خدا بلور نجه تیترردی قورخودان بدنیم
گورن دیردی سنان شاخه اوسته برگ اسیر
..
ووراندا شمر منه تازیانه سسلردیم
هرایه گل عمو ای بیشۀ شجاعته شیر
..
گل آل رقیّه نی شمرین الیندن ایله خلاص
و گر نه ئولدورر اولسا بو بارده تأخیر
..
یتیملق اودی یاندردی قلبیمی یاخدی
زمانه نین ستمی ویردی رنگیمه تغییر
..
عجب چتیندی بو عالمده ای اوغولسوز آنا
نجیب زاده اولا نانجیب الینده اسیر
..
اؤزون بابا بلوسن گوردوقون رقیه دگل
قالور او نازلی قیزوندان فقط قوری تصویر
..
ملکلر آغلار اگر آغلاسا یتیم امّا
بو شامون اهلینه هیچ نالم ایتمدی تأثیر
..
ایله سالوبدی ایاقدان منی غم ایّام
دوروب دولانماقا ویرانه نی دیزیم گلمیر
..
بیر اوزگه حاله سالوب داش سنی منی سیلی
آتا بالا یوزوموز منخسف آیا بنزیر
..
سنی جداده منی ناقه اوسته هر یرده
گورن دیردی محاقه دوشوبدی ماه منیر
..
دیار کرب و بلادن بو شامه دین هر آن
دگوب قدم به قدم قلبیمه بلادن تیر
..
چکوبله قلبیمه داغ اوسته داغ اهل عناد
جدا باشندا ایدن وقته آیه سن تفسیر
..
منیم دولوب اورگیم قانه ای شه عطشان
زیادین اوغلی ووراندا بو لبلره شمشیر
..
آپاردیلار بیزی قول باغلى مجلس شربه
اولار کی ایلدیلر حقّى برملا تکفیر
..
دییَن بیر اولمادی شأنینده بواسیرلرین
اهانت ایتمه اولوب نازل آیۀ تطهیر
..
باخوب گهی سنه یاندی گهی منه عمّم
چکیلدی قلبینه بو آز زماندا داغ کثیر
..
آناسی فاطمه تک عمّه مون بئلى بوکولوب
ایدوبدی گور نجه جور زمانه عمّه می پیر
..
دوشوب ایاقدان اولوب گور ایشی هارا منجر
قیلانموری ایاق اوسته نماز او پاک ضمیر
..
«شعاع» قوجالدی بابا گورمدی گوزل قبرون
عنایت ایله گوره قبریوی او نوکر پیر
..
..
..
#حضرت_رقیه #شعاع_تبریزی #حضرت_رقیه_شهادت #ترکی #زبدةالاشعار