حالات حضرت رباب (س) در مدینه و وفات ایشان
.
.
مرحوم انور اردبیلی
.
.
یثربده گجم تک گونوزوم قاره دور اصغر
محنت اثریندن اورگیم یاره دوراصغر
.
.
هئچ اوخلانان آهو یاراسندا سنه چاتماز
هیچ اوغلی ئولن بیر آنا اوغلوم سنه چاتماز
.
.
صیادلر آهویه که چوللرده چاتالّار
بو رسمیدی قاچسا اونا فوراً اوخ آتالّار
وورمازلا فرار ایلمسه زنده دوتالّار
هیچ ظلم ایلین حرملیه ظلمده چاتماز
هیچ اوچی اوغول قاچمیان آهویه اوخ آتماز
.
.
هیچ تشنه لبون آهین اوجاتمازلا سو اوسته
سیراب ایلیوب فوری یوباتمازلا سو اوسته
هیچ بیر صود امر طفله اوخ آتمازلا سو اوسته
بیر مرد قوی دیلسیز اوشاقه طرف اولماز
نازک بوغاز اوچ شعبه خدنگه هدف اولماز
.
.
قویموش غم و دردون منی گوز یاشلی وطنده
روحیم یورولوب خسته دی بو خسته بدنده
ایکاش او گون منده ئولیدوم سن ئولنده
روح عالمی روحون منیلن تئز بارشیدی
تپراقیم اوغول خاک شفایه قارشیدی
.
.
عمریم نقدر وار یاشارام صحن سراده
سس سیز یانارام آتش جانسوز جفاده
جسمیم اریور بوطۀ اندوه و بلاده
رغبتله ئولونجه سوآ من باخمارام اوغلوم
زلفیمه وروب شانه حنا یاخمارام اوغلوم
.
.
گرچه منه دیلر بو قدر آغلاماق اولماز
هرگون شرر آهیله دل داغلاماق اولماز
بلموللر آخان گوز یاشنی ساخلاماق اولماز
بلموللر آنون صبح و مسا آغلاسا دویماز
بلمولّه قرا گونلی قرا رختنی سویماز
.
.
گورسم آنالار نازیله اوز اوغلنی ساخلار
زینت ایدوب آغوشنه زلفینی داراخلار
گورسم سو کنارینده دوشوب ماهی چالخلار
روحیم قوشی پروازه گلر غم بوداقندا
گورّم ال ایاق چالماقووی گوز قباقندا
.
.
گورسم صودامر دلسیز اوشاقی صود امنده
تیترر اورگیم یادیمه سالّام سنی منده
صودسیز یولا سالدوم سنی میدانه گیدنده
اولسیدی سودیم آغلاماقون فکرین آتاردون
گهواره ده لایلای دیجگین فوری یاتاردون
.
.
خوش گون منه سندن صورا بیر امردی دشوار
هر ثانیه فکرونده وارام تا نفسیم وار
هر لحظه ده دلدن چکورم آه شرر بار
یاسدان چخام اولماز منی مظلومیه ممکن
محنتلی گونیم قورتارار عمریم قوتاران گون
.
.
گوندوزلری عمر ایلیورم گون قباقندا
اما گجه خاموشم حیاطین بوجاقندا
رنگیم قارالیب قاره کنیزلر سیاقندا
غم غصه انیسیمدی اؤزوم دیده پر آبم
دیداره گلنلر منی بلمولّه ربانم
.
.
ذلّتلی گونی من کیمی گورمز هیچ عزیزه
بختیمله فلک گور نقدر ائتدی ستیزه
گوردی منی قارداشلاریم اوخشاتدی کنیزه
چوخ خواهش اولار ایتدی قبول ایتمدوم اوغلوم
یالواردیلار هر قدری گیدک گئتمدوم اوغلوم
.
.
شاهددى مقاتلده اولان عمده خبرلر
اثبات وفا ائتدى او بانوی مطهّر
روحی بدنیندن چخانیجان دیدی اصغر
نه سدّ غمی سیل سرشکی یخا بلدی
نه کولگه یره کچدی نه یاسدان چخا بلدی
.
.
تائید ائلیور زینب أوزی بو جریانی
چخدوم که وضو ایلمگه صبح زمانی
بو منظره دن قلبمون آرتدی هیجانی
گوردوم علی اصغر آناسی زار و شکسته
اللر اورگی اوسته دوشوب تپراقون اوسته
.
.
پوزدی منیم احوالیمی گوردوم پوزولوبدی
یاتمازدی دیدوم یاتماقنا علّت اولوبدی
چوخ آغلیوب حتماً بو گجه چوخ یورولوبدی
گلدوم باشی اوسته چاغورام راز و نیازه
مشغول اولا محراب عبادتده نمازه
.
.
سسلندوم اویان ای هدف محنت عظما
بو وقت نمازوندی دگل موسم رؤیا
هی منتظر اولدوم گوز آچا آچمادی اما
بلدوم گل عمرین اجلون خاری بلوبدی
یاتمش ابدی یوخ نفسی چوخدان ئولوبدی
.
.
«انور» گزوسن دائمی پیک اجلیله
مغرور ابداً أولماگلان عمر قلیله
روشن اولاجاق قبر ائوی یاخشی عملیله
ظلمت ائوه هر کیمسه چراغ یولّاسا خوشدور
وای اول کسه یوخ خیر عملی اللری بوشدور
.
.
#حضرت_رباب #انور_اردبیلی
#انقلاب_کربلا #اصغریه_انور_اردبیلی
#یثربده_گجم_تک_گونوزوم_قاره_دور_اصغر
#ترکی
#زبدةالاشعار
نظر دهید