اربعین
.
✍️ #زبدةالاشعار ✍️
.
🆔: @nohe_torki
.
#سبک_ای_شاه_مظلومان_حسین … 5 سبک
مشابه
.
مرحوم ذهنی زاده
.
قارداش اسارت رشته سین الده بهانه ایلدیم
مین رشته تبلیغات دین اهل جهانه ایلدیم
.
.
اما اسارت رشته سی بیر رشتۀ بالا بلند
ظاهرده هشتاده یاخین عورت اوشاق بوینوندا بند
باطنده دنیاده هامی اهل کمالاته کمند
هر عقده سین پابند بیر مرغ روانه ایلدیم
.
.
بو رشته نین هر تارده ، تاری حیاته بند اولوب
هر ذی حیاتی جلب ایدوب اوز سمتینه شوره سالوب
تا حشر هر گوز اولسا گوز بو رشته آردینجا قالوب
هولیله پرشور اشکیمی ممزوج قانه ایلدیم
.
.
اما سر و کاریم دوشن گونلرده تبلیغاتیله
دنیائیله اولدوم طرف ، نه ملّت شاماتیله
هر یرده معلوم ایلدیم شایسته معلوماتیله
هر بیر مکاندا اتّکا ، من لامکانه ایلدیم
.
.
وردیم اسارت نامینه دامانه همتله کمر
یغدیم باشا هشتاده دین عورت اوشاق قیز دیده تر
دشت بلادن باغلادیم شامات ایچون بار سفر
بیر کاروان غم همسفر بو کاروانه ایلدیم
.
.
ناچار اولان گوندن حسین بو عمده مجبوریته
بولدوم دچارم روز و شب مین گونه محدودیته
هر ابتلا ناچاریم انجام ماموریته
زلف بلانی شانه صبریله شانه ایلدیم
.
.
اولدوم صمیم قلبیله رنج و بلایا خوشدلی
منیدیم شرافت هودجی ، آدی شکسته محملی
با پرده گزدیم کوفه و شام ایچره سوق و محفلی
بی پرده اسراری بیان ، پیر و جوانه ایلدیم
.
.
هر لحظه که من ایستدیم اتمام حجت ایلیم
اهل مجازه شمه ای کشف حقیقت ایلیم
اسلامه گبری ، مسلمی ایمانه دعوت ایلیم
بیر آز تمسک معجز سحر بیانه ایلدیم
.
.
اول بیانه کوفه ده ناچار اولاندا من حسین
ایستوردی قیل و قالیله ، مانع اولا دشمن حسین
بیر صیحه ویردیم دشمنه ، دوشدی هامی سسدن حسین
بیهوده قیل و قالدن نهی آمرانه ایلدیم
.
.
باتدی نفس لر سینه ده ، قالدی صداسیندن جرس
بیر ذی نفسده اولمادی تجدید یارای نفس
نطق گهرباریم در و دیوار شهره سالدی سس
محتاج هر هوش اهلینی ، من گوش جانه ایلدیم
.
.
دوتموشدی کوی و برزنی ، بام و دری هر مرد و زن
بیر خطبه ایراد ایلدیم ، حیدر آتام تک اوندا من
خلقه یتوردوم هر سوزی ، گویا که تبلیغ سخن
کوچه به کوچه ، در به در ، خانه به خانه ایلدیم
.
.
جلب ایلمشدیم نطقیله مرد و زنی ، کس ناکسی
چوخ آز قالوردی حق سوزوم اولسون او ناحقلر بسی
بیردن اوجاتدی نیزه دن قانلی باشون قرآن سسی
کسدیم سوزی دوندوم نظر نوک سنانه ایلدیم
.
.
گوردوم او قان پیرایه لی مرآت وجه لایزال
بیر پرده خاکستری سالموش او بدر اولموش هلال
بولدوم کول اوسته یاتمیسان ، ای وجهی وجه ذوالجلال
نفرین سنی مهمان ایدن بیر میزبانه ایلدیم
.
.
نور جمالون جلوه دن سالمیشدی آثار تنور
بیر منخسف آی تک یوزون کونه ویرردی فیض نور
از بسکه شور انگیزدی حسنون ، اودور من باشدا شور
بیر یا هلالا نغمه سین دلده ترانه ایلدیم
.
.
بو نغمه شیریندن گوزلردن آخدی اشگ شور
سنده جداده آیه کهفیله سالدون شهره شور
کهف آیه سی لحن حجاز ، الحق نه داوود و زبور
داوودی اوردا آرزو من یانه یانه ایلدیم
.
.
قارداش باجی سرگمیدوخ هر ایکیمیز درد دله
بو درد دللردن اثر دوشموشدی چوخ دلدن دله
بیر داش گلوب بیر غرفه دن ، آفاقه سالدی غلغله
سن یاره لندون من یوزه قانیاش روانه ایلدیم
.
.
باخدیم باشوندان تازه قان آخدی دوباره یاره دن
بولدوم تلاوت اجریوی آلدون او سنگ خاره دن
ناچار گیتدی اختیار اوندا من بیچاره دن
بیر نطح او ساعت گوشه تخت روانه ایلدیم
.
.
چوخ اینجدیم سندن صورا آگاهسن هر دردیمه
دوشدوم شرار محنته ، یاندیقجا آه سردیمه
باخ بیر بوکولموش قامته ، آغ زلفه رنگ زردیمه
بیر من بیر ایله درد و غم بولدی خدا نه ایلدیم
.
.
بیر قیز باشندان قویمادیم بیر تل دوشه سنبل کیمی
سولدی سارالدی صرصر جوریله یوزلر گل کیمی
شوره گلنده هر بالا ، بیر گوشه ده بلبل کیمی
آغوشیمی اول بلبله من آشیانه ایلدیم
.
.
بیر نسگلیم وار قان ایدر غمدن دل اهل دلی
ایوای اگر یاد ایلسه بیر اهل دل بو نسگلی
زهرا قیزی ناله کنان دیر نصارا منزلی
سرمایه غم بو غمی اسلامیانه ایلدیم
.
.
ایکاش اولیدی یکسره ویرانه شاماتی خراب
بزم یزید بی حیا ، شطرنج و می ، چنگ و رباب
بیر قانلی باش بیر خیزران ، بیر طشت زر ، نرد و شراب
نفرین می و ساقی و هر باده ستانه ایلدیم
.
.
#قارداش_اسارت_رشته_سین_الده_بهانه_ایلدیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید