قاسمیم، زلف خمین اوزده هویدا گؤرونور #قاسمیه_سیدعظیم_شیروانی

وداع حضرت قاسم (ع)
.
#زبدةالاشعار
.
: @nohe_torki
.
سید عظیم شیروانی
.
قاسمیم، زلف خمین اوزده هویدا گؤرونور
بو عجب دیر کی، گون اوزره شب یلدا گؤرونور
.
.
ای سپهر شرف اوزره مه تابانیم اوغول
ظلمت هجریوه قویدون منی جانانیم اوغول
ای خطی خضر، لبی چشمۀ حیوانیم اوغول
لب لعلینده سنین نطق مسیحا گؤرونور
.
.
ای اوغول، قالدی قارا گونلره بیچاره عروس
گولو الدن گئدیبن، یالواراجاق خاره عروس
آل دواغین گؤتوروب، باشه سالیب قاره عروس
بولبولون سولسا گولو، باشینا سئودا گؤرونور
.
.
کاکلین حبل متینیمدی، اوزون آیۀ نور
قاف مسطور جبینیمدی، کتابی مسطور
شعشعات رخ پاکین ائلییب دهره ظهور
کربلا طورا دؤنوب، نور تجلّی گؤرونور
.
.
اوخشاییرسان، ای اوغول، گرچه مه انوره سن
آل اله تیغ هلالین، وور اؤزون لشکره سن
چون گرک جانینی قربان وئره سن اکبره سن
اکبرین قتلینه بو قوم مهیا گؤرونور
.
.
سنه قربان اولوم، ای نوگول گلزار حسن
سنی قربان وئریرم شوقله اول سروره من
لیلی اؤز اکبری نین گردنینه سالدی کفن
چشمینه ایندی نه دنیا و نه عقبا گؤرونور
.
.
جدّیمه وئردی خبر حق، زکریا خبرین
تشت ایچینده کسیلن باشی او یحیی خبرین
بیل بو آیاتی، اوغول، رمز ایله ایماء خبرین
ظاهری تشنه حسین، باطنی یحیی گؤرونور
.
.
«کاف ها» دا وار، اوغول، بیر نئچه مخفی معنا
«کافی دیر کربوبلا»، «ها» یی هلاک شهدا
«یا» یقین عشقدی بو تشنه لب کربوبلا
«صات» ی صبر اولماسا، ای تشنه، نه معنا گؤرونور؟
.
.
سیّدا، رشته یه چکدین یئنه یوز دُرّ عدن
سنه محشرده شفاعت ائله سین ابن حسن
مرحبالار سنه، ای شاعر اعجازسخن
سنده فیض نظر حضرت مولا گؤرونور
.
.
#قاسمیه #سیدعظیم_شیروانی
#قاسمیه_شهادت
#قاسمیم_زلف_خمین_اوزده_هویدا_گؤرونور
#ترکی
.
#زبدةالاشعار
.
: @nohe_torki