در جلالت حضرت زهرا و علی علیهما السّلام
#گریز به شهادت حضرت زهرا (س)
..
..
مرحوم تائب تبریزی
..
..
قالی پنهان ده بعضی گهر افشا اولماز
بعضی آدلار تاپولار اوندا مسمّا اولماز
..
اولی گنجینه ده چوخ درّ گرانمایه ولی
ارزش اَرزده دردانۀ بطحا اولماز
..
ماه و خورشید جهانتاب سالار عالمه نور
لیک تابشده اولار زهرۀ زهرا اولماز
..
بدو خلقتده اولوب خلق بتولین نوری
یعنی بو نورسیز عالمده تجلّا اولماز
..
چوخلی ایولرده خانم لار آدی زهرادیولر
آدی زهرا اولی اما اوزی زهرا اولماز
..
چوخ پیمبر گلوب آفاقه اؤزی با عظمت
هیچ بیری لیک شئوناتده طاها اولماز
..
بیله بیر شأنیله زهرایه فداها بویوروب
امر اللهدی کتمان او فداها اولماز
..
چوخلی قزلار اولى اونلان آتاسی فخرایلر
لیک زهرا تک اولان ام ابیها اولماز
..
اون بیر عیسی آناسی مریم کبری لقبی
ویرمَسَه دم حسنینی دم عیسی اولماز
..
ماه گردون حیا گوهر عفّت صدفی
عصمت و عفّته بیله دولی دریا اولماز
..
ایتمین شوهرینه ذرّه جه تکلیف گران
بیله بیر همسر دلدار و دل آرا اولماز
..
مرتضا بیر گون ایدوب جمع فدک محصولین
ابتدی قسمت فقرایه بیله مولا اولماز
..
هاموسین ایلدى تقسیم الی بوش قالدی اوزی
الى بوش سویلوب ایوه گتماقیم اولا اولماز
..
شرم، ایوه گتماقا مولانی سالوب تأخیره
نیلسون گلمور اوزیندن گیده پویا اولماز
..
فاطمه واقفیدی کیم نیه مولا یوبانوب
روحی مولائیله باهمدی مجزّا اولماز
..
هامودان چوخ تانیوردی خانمیم مولانی
هم یقینیدی یوبانماقلیقی بیجا اولماز
..
الى بوش گلدی علی لیک دولی قلبیله
گوردی مولا اورگین آلماسا زهرا اولماز
..
پیشواز ایلدی لبخندیله مولانی خانم
اورگین آلدی بیله شیوۀ شیوا اولماز
..
مرتضا فاطمیه باخدی خانم مولایه
اولدولار محو تماشا بیله سودا اولماز
..
منتها شرمیله مولا بویوروب یا زهرا
وار غذا ایوده و یا اینکه مهیّا اولماز
..
دیدی زهرا سنیله ایلموشوخ صرف غذا
او زماندان دی غذامیز بیزیم اصلا اولماز
..
منده آج سنده عم اوغلی ایکیمیز هم رنگوخ
یاردن یار بهر حال مجزّا اولماز
..
دیدی مولا دیمیوبسن نیه بو سرّی منه
درده گلدیم نیه دردون منه افشا اولماز
..
دیدی مرضیه، پیمبر بویوروب یا زهرا
که اوتاندیرماق عموم اوغلونی باجا اولماز
..
فاطمه گوزله اوتاندیرما ولىّ اللهی
او خجل اولسا رضا خالق یکتا اولماز
..
اودی کیم منده سنون تک سوزومی گیزلتدیم
الى بوش مرددن اغراق تمنّا اولماز
..
قیمادیم بیردم اوتاندیرماقا بو ایوده سنی
سنسا قلبون منه بو حال گوارا اولماز
..
دیدی زهرا سنی چوخ گورمه سین الله منه
سندن اوزگه بو على حالینی جویا اولماز
..
داد او دمدن که دیدی فاطمه من گیتملیم
دیدی مولا بو غمه سینه ده یارا اولماز
..
آیریلقدان دیمه یا فاطمه هجران دردی
چوخ یامان درد اولی بو درده مداوا اولماز
..
تائبا سال در مولایه اؤزون سائل تک
الى بوش چون که گدای در مولا اولماز
..
..
#فاطمیه #تائب_تبریزی #فاطمیه_شهادت #ترکی #زبدةالاشعار
نظر دهید