قبله اهل یقین ، کعبه عرفان زهرا #فاطمیه_بهزاد_قاسمی

در مدح و شهادت حضرت زهرا (س)
.
#زبدةالاشعار
.
: @nohe_torki
.
#بهزاد_قاسمی اردبیلی
.
قبله اهل یقین ، کعبه عرفان زهرا
زینت دولت با عزت قرآن زهرا
.
.
بی کران همّتینه فخر ایلیر حی غفور
بودور آئینه یزدان ، بودور آئینه نور
زندگینامه جاویدینی کیم ایتسه مرور
گورجک قدرت عشقیله تاپوب جان زهرا
.
.
دوتسا کیم دامنننینی منصب والایه چاتار
سیر ائدر راه کمالاتیده معنایه چاتار
قطره ده اولسا اگر رتبه دریایه چاتار
آری دریا ائلییر قطره نی هر آن زهرا
.
.
مات ایدوب اهل سماواتی منزّه نسبی
دیللرین ازبریدور ام ابیها لقبی
شأنه باخ ، اللرینه بوسه ویران وقته نبی
سسلیردی هامی عالم سنه قربان زهرا
.
.
عرفا حاجت آلار قبله حاجاتیندن
قلم عاجزدی یازا وصف کمالاتیندن
بو سوزوم قطره دی دریای کراماتیندن
طوی لباسین ائله دی سائله احسان زهرا
.
.
ساده بیر عورته اوخشاتما بو مه سیمانی
بو سوزم ثابت ائدر معجزه زهرانی
دامنینده بجروب رهبر عاشورانی
اولدی استاد ره شاه شهیدان زهرا
.
.
ئورگین جامی گرک باده عشقیله دولا
پاک و اطیب آدینا ، کنگره غم قورولا
شان زهرایه بو سوز فکر ائدورم کافی اولا
دوقوز ایل اولدی انیس شه مردان زهرا
.
.
عشقینون مصحفی لازیمدی کی تفسیراولونا
آخدی قرآنه گوره قانی حقیقت یولونا
حق علینندی دئدی ، ویردیلا قمچی قولونا
اولدی بو علته محکومه دوران زهرا
.
.
گرد غم عالمه نه نوعیله دولدی ، دئمرم
صر صر محنتیله گل نجه سولدی ، دئمرم
در و دیوار آراسیندا نه لر اودی ، دئمرم
چون علیدنده اونی ایلدی پنهان زهرا
.
.
فقط عرض ائلیورم بوسوزی من باب نیاز
او قدر ظلم ائله میشدی خانما اهل حجاز
جان وئرینجک قیلا بیلموردی ایاق اوسته نماز
اولدی اوتدوق یری ناچار ، ثنا خوان زهرا
.
.
حقی غصب اولدی ، فدک گئتدی الیندن اما
قویمادی عصرین امامی الی قوینوندا قالا
ئولمیوبدور دئدی زهرا هله ای شاه ولا
غم یئمه ، مشکلوی ائلیر آسان زهرا
.
.
بیر وجودون ایکی دنیاده شرافتدی منه
سنه لبیک دئمک ، عین عبادتدی منه
سنه خاطر اگر ئولسمده سعادتدی منه
جانینی وقف ائلیوب جانوه ، چوخدان زهرا
.
.
یانماسام عشقوه گر ، عشقیده نقصانیم وار
عمرومون لذتی سن سن بونا ایمانیم وار
دلخوشام منده آقا سن کیمی جانانیم وار
نقدر شکر ائلسه آزدی علی جان ، زهرا
.
.
چشم خلقت گوره بیلمز منیم عشقیمده قصور
بعضا اما اولا بیلمم غم ایامه صبور
سن غریبانه باخاندا منه ، قلبیم داریخور
ائلیور سوز و نوا سینه سی سوزان زهرا
.
.
ای خلیلیم نظر ایله یارالی هاجروه
وئر اجازه سیخیلیم قوش کیمی زیر پروه
اگیلوب بوسه ویریم باغلی قالان اللروه
اولا تا خوان کراماتیوه مهمان زهرا
.
.
یورولوب طایر جانیم آچا بیلمور پر و بال
دولموشام ابر بهاران کیمی سن گوگلومی آل
فرض ائله منده یتیمم قولوی بوینوما سال
تاپا ئوز درد فراوانینه درمان زهرا
.
.
ای قلم مطلبی قوی بوردا ، چاتوب وقت گریز
می محنتله اولوب کاسه صبریم لبریز
یاز او گوندن کی علی ، گوردی قالیب فاطمه سیز
یعنی ترک ائله دی دنیانی پریشان زهرا
.
.
باغلادی گوزلرینی صاحب گلزار فدک
ئورک ایستور دئیه بو مطلبی ، مشکلدی دئمک
نگران زینبی الله ، ننه سیز قویدی فلک
وئردی جان ، جان جهان ، پیکر وجدان ، زهرا
.
.
وقت او وقت اولدی علی ، حافظ دین مدنی
مغسلون اوستونه قویدی یارالی فاطمه نی
گجه نون عالمی غسل ائلیه یورقون بدنی
تا کفن پوش اولا آئینه قرآن زهرا
.
.
بوردا بیر نکته باریک وار ای اهل شعور
یازا بیلسم هامی عالم ائلیر شیون و شور
آنانون غسلونا جام الده اوشاقلار سو داشور
ائدوب آهولرینی گور نجه گریان زهرا
.
.
دیل گلر گلمز او دم گلدی دیله شاه حجاز
دئدی مجنونینه دوز دور کی ائدر لیلا ناز
ولی سن ناز ایلمه ، آچ گوزون ای معدن راز
باغریمی قان ائلیور محنت هجران زهرا
.
.
بو گجه کاش منیمده چاتا پیک اجلیم
نجه آیا سنی من غسل ائله ییم آی گوزلیم
آند اولا یاره لی پهلولروه ، تیترور الیم
هر زماندان چتین اولموش منه الان زهرا
.
.
قاف عشق اوسته باتوبسان قانا عنقا مثلی
اوزولوب شاه ولانون بو گجه الدن الی
یاتما آچ گوزلروی گور نه آدامسیزدی علی
آیریلیق دردی ائدوب حیدری نالان زهرا
.
.
دئنن ای ماه ، اولوب یاسمنی هاردا یوزون
کیم ویروبدور سنی آیا بویانوب قانه گوزون
گیزلدیم قوی یوزوی ، زینبیم ئولدوردی اوزون
گورمیه سیلی یرین اول مه تابان ، زهرا
.
.
نجه ساکت اوتوروب یاریمه یاس ساخلامیوم
نجه هجرونده سنون اشکی یوزه باغلامیوم
نجه دل داغلامیوم من ، نجه قان آغلامیوم
بوریوب مغسلی سینوندن آخان قان زهرا
.
.
یری واردور سسیمه سس قوشا اهل ملکوت
بو گجه گیزلین اولان غصه لرون اولدی ثبوت
ایندی بیلدیم کی دوتاردون نیه بیر اللی قنوت
مرتضی قمچی دگن قوللارا قربان زهرا
.
.
دئمورم اگنوه سن رخت حیاتی گئیه سن
یا سولان گلشنیمی بیرده بهار ائلیه سن
گوگلوم ایستور منه بیر یولدا عم اوغلی دئیه سن
وئره جان عاشقه تا نغمه جانان زهرا
.
.
#قاسمی گوهر نفسه بو قدر وئرمه بها
قویسا هر کس آدینی شاعر شاه شهدا
گرک اول ئوزونون روح حسینی سی اولا
ائلیه تا اونا الطافینی ارزان زهرا
.
.
#فاطمیه_مدح
#فاطمیه_شهادت
#قبله_اهل_یقین_کعبه_عرفان_زهرا
#ترکی
.
#زبدةالاشعار
.
: @nohe_torki