در مدح و شهادت حضرت ابوالفضل (ع)
.
✍️ زبدة الاشعار ✍️
.
🆔: @nohe_torki
.
#شفق_اردبیلی
.
آدیوی دردیمه عبّاس آقا درمان بیلورم
آدون هر یئرده اولا روضه ی رضوان بیلورم
.
.
سن وفا گلشنینون مرغ خوش آوازه سی سن
محک عشقین آقا غایت اندازه سی سن
غیرتین دفترینین دهریده شیرازه سی سن
اودی غیرت وطنینده سنی سلطان بیلورم
.
.
گُل یوزونده گورونور شرح معمّای دعا
گوزلرون مست ائیلیوب گُل لری گُلشنده آقا
کیم سنی گورسه چتین بیرده باخار گویده، آیا
یعنی اولماز سنه تای ماه درخشان بیلورم
.
.
سرو قدّونده سنون سرو سعی خیره قالیب
گولوشون یوسف کنعانی چتین درده سالیب
نفسوندن آقا جان عیسی مریم دم آلیب
دم جان پروریوی جلوه ی جانان بیلورم
.
.
گورمیوب چشم فلک سن کیمین ارزنده جوان
گُل یوزی ماه شب و صورتی رخشنده جوان
رزمیده واردی مگر سن کیمی رزمنده جوان؟
گلمئیوب رزمه سنون تک یل دستان، بیلورم
.
.
عبد صالح لقبون عابد شب خیز جهان
عشق پر شورون اولوب گوردوگون ایشلرده عیان
گورمیوب گورمیه جک بیرده سنی چشم زمان
فلکین گوزلری قالدی سنه حیران بیلورم
.
.
قسمت ائیله آقاجان درگهیوه بیرده گلیم
دوزدی لایق دگولم من سنه، ای نفس سلیم
قورخورام قورتارا عمروم ئوزله الدن الیم
ئوپمه سم درگهیوی عمرومه نیسان بیلورم
.
.
اصغرین ناله سینه یاندی سنون قلبون آقا
خجلتوندن باخا بیلموردون او عطشان اوشاقا
سو یوخیدی باشیوی سالدون او حالدا آشاقا
اصغرین حالی سنی ائیله دی گریان بیلورم
.
.
گوردون اصغردن ائدور سوز عطش رفع دوام
خیمه ی شاهه گلیب ائیله دون عشقیله سلام
وئر اجازه دئدون اول شاهه بیر آز، من سو آلام
عطش اصغردن آلار ایندی آقا، جان بیلورم
.
.
رخصت آلدون گوتوروب مشکی دوزلدون یولووا
شوقیدن باخمادون اصلا او زمان صاق صولووا
گوزلرون نهریده بوش مشکون حمایل قولووا
چیرپینوردی ئورگون سوز نهاندان بیلورم
.
.
آیه ی عشقیوی تکبیر ائله میشدون دیلیوه
کمر همّتی، حیدر مینی چکدون بئلیوه
لشکر روسیهین، آلدون عنانین الیوه
کیم دایانمیشدی یولوندا اولوب، القان بیلورم
.
.
پرچم سبزیوی نهر اوسته یئره وئردون آقا
نقشه ی دشمن خونخواریوی سن جیردون آقا
کعبه ده لات و مناتی ائله بیل قیردون آقا
سنه احسن بویوروب قادر سبحان، بیلورم
.
.
مشکی دولدوردون عطش لبلری حسرتده قویوب
لبی حسرتده، فراتی ولی خجلتده قویوب
منطق و فلسفه نی دهریده، حیرتده قویوب
منطقون اولدی سنون مکتبه برهان بیلورم
.
.
مشکون اوخلاندی کانّه ئوره گون یاره لنوب
قوللارون دوشدی، گوزون، پرده لری پاره لنوب
قان سو مثلی، او زمان دشتیده فوّاره لنوب
اول قانین قطره لرین، آیه ی قرآن بیلورم
.
.
کاش سینیدی او شریحین الی، همده قلمی
هامی واقفدی ندور ائتدیگینین کیف وکمی
اونون حکمیله یاتوب دشتیده غیرت علمی
اونا لعنت یازاجاق کاتب دوران بیلورم
.
.
دوغرانوب لاله سیاقی او مبارک بدنون
پوزولوب باد مخالفه سولوبدور چمنون
کمرین اگدی حسینین، سنون آخر محنون
اولار عالم دئدی، سننن صورا زندان بیلورم
.
.
آی منیم آرخام ائلیم، دور ایاقا یاتما بئله
ای منیم ماه شبیم، ابر غمه باتما بئله
قویما آواره قالام، قارداشیوی آتما بئله
اسه جک گلشنیمه سهمیلی طوفان بیلورم
.
.
اصغرین ناله لری فکریوه سالمیشدی دوگون
سو، دئدون قویمادی دشمن، اولا حاصل دئدیگون
بالالاریم گزه جک چوللری آواره بو گون
دورماسون، جان وئره جک اصغریم الان بیلورم
.
.
.
#عباسیه_مدح
#عباسیه_شهادت
#آدیوی_دردیمه_عباس_آقا_درمان_بیلورم
#ترکی
.
✍️ #زبدةالاشعار ✍️
.
🆔: @nohe_torki
نظر دهید