قدسیان فاطمه ده ناله و افغانی گوروب #جوان_نصرانی_معزی_اردبیلی

آمدن طبیب نصرانی به قتلگاه کربلا و سؤال و جواب با سیدالشهدا(ع) و شهادت آن مرد باوفا
.
زبدة الاشعار

?: @nohe_torki
.
مرحوم معزی اردبیلی
.
قدسیان فاطمه ده ناله و افغانی گوروب
قانلی صحراده گلوب ورطه ی طوفانی گوروب
.
عاشر ماه عزا یوم بلا عصر چاقی
گزدیروب گوزلرینی نعش شهیدانی گوروب
.
گلدی گوداله طرف جدّه ی سادات جهان
اوغلونون یاره لریندن توکولن قانی گوروب
.
اوره گیندن وریلان تیری کوره کدن چیخادوب
حال اغماده دی میداندا چیخور جانی گوروب
.
پوزدی حورای بهشتی دئدی مظلوم بالاوای
آتوب ال زلفینه گل جسمیده پیکانی گوروب
.
کیم گلوب باشین حسینون بدنیندن آییرا
باشینون اوسته الی زلفیده زهرانی گوروب
.
قییدوب زاده ی سعد اوستونه شمشیر آتوب
دشمن دین خدا ضربه ی خذْلانی گوروب
.
لشکرینده واریدی رومیلی جرّاح و طبیب
سعدون اوغلی چاغیروب خیمه ده ترسانی گوروب
.
دئدی گئت باشین حسینون بدنیندن سن آییر
قتلینون نامه سیده قاضی دن امضانی گوروب
.
من طبیبم دئدی سعد اوغلونا نه باش کسنم
مردم انسانلارا خدمتده اطبّانی گوروب
.
دئدی اجرا ائله دستوری قوتار مهلکه دن
ئوزینی حالت اجباریده نصرانی گوروب
.
لاجرم باغلادی شمشیرینی محکم بئلینه
خیمه دن دوشدی یولا عرصه ی میدانی گوروب
.
لب گودالیده بیر یاره لیه دوشدی گوزی
ذکره مشغول اوخور آیه ی قرآنی گوروب
.
باش قویوب ایستی قومون اوستونه چوخ مست و خمار
عاشق یار ائله بیل جلوه ی جانانی گوروب
.
ولی باش قالخیزوب هردم باخور اخیامه طرف
حرمیندن نگران سید بطحانی گوروب
.
تاپدی آیری حرکت مست ائلدی عطر حسین
برملا موهبت ربّی الاَعلانی گوروب
.
کشتی عمرینی طوفاندا نبیّ اللهین
چنگ اهریمن دوراندا سلیمانی گوروب
.
یونسی کام نهنگ غم و اندوه و بلا
ارّه ی ظلمیده زخم زکریّانی گوروب
.
جان فشان ائتمگه جانانه گوره ابراهیم
داره آماده بیابانیده عیسانی گوروب
.
جان مهیّا ائلیوب یاره گوره اسماعیل
ذبح اولا دست زنازاده ده یحیانی گوروب
.
اوغول هجرینده وجودی اریین یعقوبی
محبس ظلمه دوشن یوسف کنعانی گوروب

دئدی حیرانم آقا عزت و اجلالوندن
من کیمی کیمدی بئله محترم انسانی گوروب
.
گورمیشم دورت گجه عیسانی پریشان یوخودا
گجه پهلوده گوزوم احمد سبحانی گوروب
.
باشوی کسمگه اقدام ائلسم سینسون الیم
دیده ی گیتی هاچان سن کیمی نورانی گوروب
.
گوشه ی چشمیله مصباح هدا سالدی نظر
بُهتیده تابع آئین نصارانی گوروب
.
کیمیا ایلدی نصرانی وجودین نظری
ناگهان دیلده قوی قدرت ایمانی گوروب
.
قاباقا گلدی بیان ایلدی کیمسن یارالی؟
عیسوی سنده بئله صورت روحانی گوروب
.
صبحیدن ناظرم اوضاع اسفناکه ئوزوم
ناروا ایشلری گوردوم سپه جانی گوروب
.
اوجا قامتلی خانم تلّی انوب تلّی چیخوب
پیکرونده یارووی دیده ی گریانی گوروب
.
سسلنوب یاعلی گل کرببلاده کمگه
لشکرین همهمه سین محشر کبرانی گوروب
.
نیه قویمورسان اونی باشوون اوستونده قالا؟
قییدنده اوره گی آتش هجرانی گوروب
.
آند وئرّم سنی من مریم و عیسایه دانیش
گلوب عیساده یقین یاره لی اعضانی گوروب
.
آند وئرّم شهدایه گوزون آچ باخ یوزومه
انبیا ٕ سندن آقا لطف فراوانی گوروب
.
گوردی سس وئرمدی نصرانیه فرزند رسول
حمدیده خالقینه سرور خوبانی گوروب
.
یادینه دوشدی همان عورت مرضیّه مرام
گلوب هردم باشینون اوستونه بحرانی گوروب
.
پا برهنه خانیما آند دئدی وئرّم آقا
صورتیندن بیلینوب محنت عظمانی گوروب
.
منی دیندیر گوزی یاشلی خانمون خاطرینه
دوداقون اوخدان اگر زحمت و ایذانی گوروب
.
زینبه آند وئروب قالمادی حضرتده دوزوم
صحبته مایل اولوبدی لب عطشانی گوروب
.
قالخیزوب باشینی نصرانیه یوز دوتدی حسین
اصفیا ٕ منده دئدی ذرّیده پیمانی گوروب
.
من جگر گوشه ی زهرایم حسین آدیمدور
جدّیم احمددی گئدوب عالم بالانی گوروب
.
منی تاپشوردی سنه حضرت عیسی یوخودا
دئدی بیر ایش گوره سن عالمِ ربّانی گوروب
.
منی شرمنده سحر ختم رسلدن ائلمه
مصطفادن هامی چوخ عزت شایانی گوروب
.
منه مهمانسان عزیزیم باشیمی شمر کسر
ری هواسینده اولوب دشمن طاهانی گوروب
.
اؤ گونی قاره باجیمدی اوجا قامتلی خانم
بوکولر قدّی سؤنن شمع فروزانی گوروب
.
او منیم غملی باجیمدی یتیشر قیزلاریما
قان ایچینده دوتولان ماه درخشانی گوروب
.
آدی زینبدی شریک غم نهضتدی منه
قاباقیندا خدمه مریم و سارانی گوروب
.
فلک اما باجیمی اللری قوینوندا قویوب
منی میداندا خیامیمده ده طفلانی گوروب
.
اودی قالما باشیم اوسته دیورم خیمیه گئت
قیزلاریم ساکت اولوب زینب عُلیانی گوروب
.
هله بارماقلاریدا خنجریلن دوغراناجاق
نوحه ده روز ازل فاطمه ی ثانی گوروب
.
دئدی نصرانی نه اوسته سنه پیکان ورولوب
نیه ظلمیله باشون خنجر برّانی گوروب
.
بویورور علّتینی فوج دغادن خبر آل
خطّ سِیریمده هامی زهدیله تقوانی گوروب
.
دئدی قربانون اولوم جسمیده سایسیز یارا وار
دشمنون تیری گلوب قلب پریشانی گوروب
.
یاروون هانسی آغیر یاره دی فرمایش ائله
باغلیوم توختیا یارون گوره درمانی گوروب
.
دئدی مَرحَمله ساغالماز ابداً یاره لریم
اوره گیم داغِ علی اکبر زیبانی گوروب
.
عیسوی اولدی مسلمان ائلدی کفره هجوم
ابن سعدین اوزی اطرافیده جریانی گوروب
.
وئردی فرمانینی تپراقه یخوبلار بدنین
سینه ده قانلی منا تازه مسلمانی گوروب
.
صبحدن تپراقا گورمیشدی دوشر هانسی شهید
گوز وروم چاقی باشی اوسته اؤ سلطانی گوروب
.
گل منیمده دئدی آل باشیمی دیز اوسته آقا
سنی جان اوسته شهیدان خدا آنی گوروب
.
اولدی نیم خیز حسین ایلدی فرمایش اونا
سنون احوالوویده فاطمه قربانی گوروب
.
نجه قالخوم ایاقا یاره لیم عذریم وار
پیکریم ضربه ی سرنیزه ی اعدانی گوروب
.
من «معزّی» گوزونه گورسن ئولن وقته حسین
دیوم آخرده گوزوم صورت مولانی گوروب

.
#جوان_نصرانی
#اصحاب_الحسین
#قدسیان_فاطمه_ده_ناله_و_افغانی_گوروب
#معزی_اردبیلی
#ترکی
.
#زبدةالاشعار

?: @nohe_torki