قطره قطره لبلرونده بو نه قاندور قارداشیم #حسنیه_حزین_خسروشاهی

شهادت امام حسن (ع)
زبانحال امام حسین (ع) به امام حسن (ع)
..
..
مرحوم حاج حیدر حزین خسروشاهی
..
..
قطره قطره لبلرونده بو نه قاندور قارداشیم
قارداشون حالوندن ائت حالی اماندور قارداشیم
..
..
مرغ دل شوره گلوب دلده فغان آثاری وار
برگ سبز اوسته نه علتدور خزان آثاری وار
شبنمه بنزر گل اوسته قطره قان آثاری وار
باغ عمرونده مگر فصل خزاندور قارداشیم
..
..
هانسی عالم ، عالمِ قارداشلیقا قارداش دَیَر
کیمدی بو عالی متاعه دهرده ویرسون دَیَر
بو سوزی عالم بولور قارداش ئولومی بئل اَیَر
بیله بوللم قامتیم غمدن کماندور قارداشیم
..
..
درد هجرانون منیم آرامیمی الدن آلوب
قیل منی حالی سنی بو حاله قارداش کیم سالوب
اللرون بیله اورک باشیندا حسرتله قالوب
عارضونده جلوه گر سوز نهاندور قارداشیم
..
..
ابر دیدم وار یری قان یاغدیرا رخساریمه
مکر اوزیله تاپدی ال زاغ و زغن گلزاریمه
رنگ سبزوندی سبب بو دیدۀ خونباریمه
بو علامت آفت دِی دَن نشاندور قارداشیم
..
..
بی وفا امّت سنی مظلوم دهر ائتدی حسن
اوز دیاروندا غریب دهر و شهر ائتدی حسن
ظلم الیله عاقبت مسموم زهر ائتدی حسن
ئولماقون مظلوم ، مشهور جهاندور قارداشیم
..
..
پوزقون احوالون گوروب دوتدی شرر جان و دلیم
تئز اوزولدی سن کیمی ایستکلی قارداشدان الیم
اذن ویر قان لخته سین سولموش دوداقوندان سیلیم
آز شرار غمده بو نالانی یاندور قارداشیم
..
..
حقّیوی غفلت یوزیله ائتدی ضایع مسلمین
قلبوی یاندوردی طعن یا مُذلّ المؤمنین
دیل یاراسی بس دگیردی ایچدیروبلر زهر کین
سو کیمی طشته جگر قانون رواندور قارداشیم
..
..
ائتدی فرمایش حسینیم صبر ائله ائتمه فغان
آیریلیق دردی یاماندور یوخ سوزوم اما دایان
قویمیوب قالسون اگر چه زهر کین منده توان
عشق پیمانینده بو بیر امتحاندور قارداشیم
..
..
یثربی زندان غم قوم عدو ائتدى منه
چوخ جسارت امّت بی شرم رو ائتدی منه
هر نه ائتدی ایچدیقیم بیر شربه سو ائتدی منه
ئولماقیم بو گونده بیشک و گماندور قارداشیم
..
..
گرچه چوخ تأثیری وار قارداش پریشان حالیمون
پوزماسون اما سنی پوزقونلوقی احوالیمون
جان سنون جان بوینی چیگنینده قالان اطفالیمون
اونلارین حالی سنه گون تک عیاندور قارداشیم
..
..
من غریب اولدوم وطنده ظلم امّتدن حسین
ظلمدن پوزقون مزاریمده دگول ایمن حسین
قبریمه زوّاریمی قویماز گله دشمن ، حسین
غربتیم احبابه اسباب فغاندور قارداشیم
..
..
سایه بانسیز گون قباقینده منیم قبریم قالار
غربتیم زوّاریمون آرامینی الدن آلار
داغ مظلومیتیم قلب «حزینه» اود سالار
او بیزه بزم عزاده نوحه خواندور قارداشیم
..
..
#حسنیه #حزین_خسروشاهی #حسنیه_شهادت #ترکی #زبدةالاشعار