شهادت حضرت امام رضا (ع)
زبانحال حضرت امام رضا (ع)
..
..
مرحوم تائب تبریزی
..
..
گل اوغول دیار طوسه ، ئولورم عیادت ایله
باشیمی بیر آل کناره منه مهر و رأفت ایله
..
..
نه بو قیدیمه قالان وار، نه بو حالیمی بولن وار
گل ئوزون بو صون نفسده، غمیمه شراکت ایله
..
..
ایله زهر کین دشمن ، دلیمه شرر سالوبدی
کسیلوب توان و تابیم ، داخی صبریمی آلوبدی
یانورام اورک باشندا ، ایکی اللریم قالوبدی
باباوین بو حال زارین گل ئوزون رعایت ایله
..
..
گل اوغول دیمه دلیمده ، غم هجریوه دوزوم وار
او گلن یولوندا آخر ، بولوسن ئوزون گوزوم وار
اورگیم دولوب سنه چوخ ، دیمه لی اورک سوزوم وار
بو یانان گویولده رفع غم درد حسرت ایله
..
..
نچه وقتدور که سندن ، بالا دوشموشم اوزاقه
آلیشوب یانوبدی قلبیم ، داخی آتش فراقه
گل آتا بالا قویاق بیر ، ای اوغول دوداق دوداقه
سنه من ایدوم محبّت ، منه سن محبّت ایله
..
..
او بلالی باغبانم ، اوزاق اولموشام گلیمدن
او غریب باغریقانم ، اوزولوب الیم ائلیمدن
باشیم اوسته آغلیان یوخ ، آلا دردیمی دلمیدن
گل ئوزون بو دردیمه یت غمیمه شراکت ایله
..
..
اورگیم بو قدر یانماز ، غمیمه یانانیم اولسا
آزالار غمیم گویولده ، غمیمی آلانیم اولسا
باشیم اوسته یعنی سن تک ، بیر عزیز جانیم اولسا
گل اوغول بوصون نفسده ، آتاویله صحبت ایله
..
..
بولوسن سنقدی گویلوم ، بو شکسته گویلومی آل
داخی قیدیمه قالان یوخ، باری قیدیمه ئوزون قال
همی آل منی کناره ، همی بوینوما قولون سال
ای عزیز مهربانیم ، آتاوا شفقت ایله
..
..
گل اوغول بو قامتیمدن ، بو لباس حسرتی سوی
بو غریبیله بو آخر ، نفسینده یوز یوزه قوی
منی اؤپ دویونجا ایگله ، آتان عطرینی آلوب دوی
داخی یوخ امید دیدون ، بو زمانی فرصت ایله
..
..
گل اوغول بو حسرتیله ، بله قویما چوخ قالوم من
اوز اوزه قویوم سنیله ، قول او بوینوا سالوم من
اؤپوم ایگلیوم دویونجا ، گوزل عطریوی آلوم من
گوزل عطریویله طوسی ، منه رشگ جنت ایله
..
..
او مریض عشقوم وار ، اورگیمده درد هجران
ایلیوبدی داغ هجرون ، اورگیمی لاله تک قان
تاپار ایله درد هجران ، دم وصلویله درمان
منه ای طبیب حاذق ، گل اوزون طبابت ایله
..
..
گل گلستان عمروم ، بو بلالی جانه جانان
یتیشوب اجل یاخوندور ، من غم زده وئرم جان
بو غریب دلفگاری ، بله قویما دل پریشان
بو شکسته دلده کسرِ ، غم و درد محنت ایله
..
..
بولورم من ای جوانیم ، که سنون بلاغتون وار
نجه بیر لسان شیرین ، نه گوزل فصاحتون وار
نه گوزل بیان قرآن ، نه گوزل قرائتون وار
او قرائتیله قرآن ، منه گل تلاوت ایله
..
..
ازل انتظاریدیم من ، که منیم باجیم گلیدی
سوروشیدی غربتیمدن، هامی دردیمی بولیدی
بو گویولدہ کی غبار ، غم حسرتی سیلیدی
او گلنمه دی ئوزون گل ، بیبوه نیابت ایله
..
..
بولورم اونون علاقه م، هامی اختیارین آلدی
آیروب اونی وطندن، چوله اول علاقه سالدی
یولی گلدی مندن اُؤتری ، ولی شهر قمدا قالدى
او اولوبدی اوردا مدفون ، گیت اونی زیارت ایله
..
..
ئولوم اولماسیدی حایل ، او مگر دوزه بولردی
دوزه بولمزیدی عشقیم ، اوخی سینه سین دلردی
بو دیار غربت ایچره ، منی گورماقا گلردی
باجی قارداشوخ دیردی ، باجوا عنایت ایله
..
..
بولورم که شهر قمدا ، دیریلیق بهاری سولدی
بولورم آدیم دیلینده، گوزی مثل ابر دولدی
سینه سینده نامه م ئولدی، او اسیر توپراق اولدی
بی بی وین بله وفاسین ، هامویه دئ صحبت ایله
..
..
فلک وفا مَهیدی ، او وفا یولوندا باتدى
بی بیمیز وفالی زینب ، کیمی بیر علم اوجاتدی
منی انتظار قویدی ئوزی شهر قمدا یاتدى
دیدی انتظاره قارداش ، سن ئولونجه عادت ایله
..
..
باجیم ئولدی ئوز ببیم تک ، بالا ، تار عشقه بسته
او قالوبدی قانلی کوینک، اورک اوسته دلشکسته
بودا جان وئروبدی نامه م ، یانان اودلی سینه اوسته
باخ ایکی بی بونده سیر مَثَل و شباهت ایله
..
..
باجیم ئولدی اولدی مدفون ، او جلال و عزّتیله
ولی عمری وئردی زینب ، باشا درد غربتیله
ائل اوزاق سپرده اولدی ، دل قبره حسرتیله
سن او حسرتی خیال ائت ، یان اوزونده حسرت ایله
..
..
گل لاله دَر بو یردن ، بو دیاری ترک ایدنده
آپار ارمغان الینده ، بالا یثربه گیدنده
بیری حالیمی سوروشسا، آلا گر خبر وطنده
وئر اونی نشان بو حالی ، هامویه حکایت ایله
..
..
«مارالانی اکبر» اولدی ، بو زبان حاله بانی
بله چکدی نظمه «تائب» ، بو کلام غمفزانی
ای امام مهر پیشه ، یازانیله نوحه خوانی
گلوب ائتماقا زیارت ، او مزاره دعوت ایله
..
..
#رضویه #تائب_تبریزی #رضویه_شهادت #ترکی #زبدةالاشعار
نظر دهید