جریان معجزۀ حضرت امام کاظم علیه السلام
#گریز به #غارت_خیام
..
..
مرحوم انور اردبیلی
..
..
قلم ایدور بو حدیثی که زینت دفتر
دیوبدی شرحینی بیر اهل ذکر و اهل خبر
..
او شخصلر که، امام ایلیوبدی ذات اِلَه
هاموسی پاک و منزّه‌دیلر بدون گناه
..
لباس عصمته قامتلری برازنده
هاموسی مُخبر علم گذشت و آینده
..
مقام معنوی و عزّ و جاهده برتر
بشردی هر بیریسی خلقتنده کَیف بشر
..
صفات ذات خدایه مثال آیینه
ایدوبله فیض اِفاضه جهان دیرینه
..
هاموسی واقف اسرار اعظم و ممتاز
هاموسنا ویروب الله، قدرت اعجاز
..
سند بو عرضیمه وار چوخ کتابده زنده
عجیب معجزه‌لر گورسنوب محلّنده
..
بو گونکه سکۀ بازار عشقه قیمت وار
بنام موسی جعفر بو بزمه زینت وار
..
به عون حضرت معبود جَلّتُ العَظَمَه
او اهل ذکر دیَن مُعجزی چکوم قلمه
..
عقیده آینه‌سی نور کبریا تاپسون
صفالی قلبلروز جلوۀ صفا تاپسون
..
وطندن ائتدیله تبعید سبط طاهانی
ایدوبله بصره‌ده اوّل امامی زندانی
..
حدود دورایل اولوبدور او شهره محبوس
ایدوبله کُنده و زنجیر ظلمیله مأنوس
..
رئیس محبس شهریدی فضل کج رفتار
امامی راکع و ساجد گوروبدی لیل و نهار
..
اورکده حُجّت حقدن خطر ایدوب احساس
یازوب خلیفیه ای مفخر بنی‌عبّاس
..
پوزوبدی موسی جعفر نظام زندانی
بو شهردن آپارون آیری شهره موسانی
..
عریضه‌مه ویرورم خاتمه بو عنواندا
بو ضدّ سلطنتی ساخلا آیری زنداندا
..
یتیشدی نامه‌سی هارون پست و بیداده
یازوب او سیّدی تبعید، ایله بغداده
..
اهانتیله ولی سال یولا او دلگیری
ترحّم ایلمه بوینوندان آچما زنجیری
..
مطیع امر خلیفه امامی خوار ایلدی
نجه دئمیشدی ایله کَشتیه سوار ایلدی
..
مراقب ایتدی نچه جیره‌خوار او رنجوره
فلک اسیر، سلیمانی ایلدی موره
..
واریدی کشتی ایچینده مسافرینِ زیاد
هاموسی چهره‌سی بشّاشیدی اورکلری شاد
..
طوییدی مجلس عیشه قورولموشیدی بساط
اوجالمشیدی سمایه صدای شور و نشاط
..
گتورمشیدی دیله سازینی نوازنده
گیدوردی کشتی اوخوردی ترانه خواننده
..
هاموسی جشن ایلیوب بیربیره چالوردی الین
مسافرین آپاروردی ئوزیله تازه گلین
..
سفینه اوسته قضا جشنی ایلدی معکوس
پوزوبدی مجلسی گلدی نوازه تازه عروس
..
سوروشدیلار ندی دردون ندور بو آه و نوا
بویون باغیم دیدی ناگه آچلدی دوشدی سووا
..
او سلسله منه سرمایةۀ جلالتیدی
بهاسی چوخ چوخیدی گردنیمده زینتیدی
..
تاپولماسا او جواهر منه وار ایرادی
گلین عزیز دوتار یادگار دامادی
..
او غنچیم گُل آچان لحظه‌لرده من سولدوم
آپارمیون منی بغداده قاره بخت اولدوم
..
طوی اهلنی بو قضیّه ایدوبدی سرگردان
دیدیلر آغلاما بو درده یوخدی بیر درمان
..
شناور اولسادا کشتی ایچنده دوشسه سویا
بویون باغون اَله گلسین بو نهردن حاشا
..
واریدی کشتی‌ده بیر سرنشین فرزانه
خطاب ایدوب اولارا چاره وار بو عنوانه
..
دیدیله ساغر مقصود چوخ چتیندی دولا
بو درده چالره تاپولسا گرکدی معجز اولا
..
دیدی گِدانی بَلی اهلِ تاج ایدن واردی
همین بو کشتی‌ده درده علاج ایدن واردی
..
او سیّدی که گورورسوز چکوبله زنجیره
قلمله گلمز اونون وصف حالی تحریره
..
جناب ختم رسولون اودور عزیز اوغلی
بلالی فاطمه‌نون غملی اشک ریز اوغلی
..
قسم بیزی یارادان خالقه سوزوم دوزدور
امامیمزدی سراپا وجودی معجزدور
.
گیدون حضورینه، یا حجّت دلیل دیون
اتگینه اَل آتون دلدن الدّخیل دیون
.
طوی اهلی مُلتجی اولدی حضور والایه
اَلیندن ئوپدیله یالواردیلار او مولایه
.
دیدیلر ای نفَسی اهل حقّه سرمایه
سنی قسم ویروروک احترام زهرایه
.
فدا اولاق او خدا ذکرینی دیَن دوداقا
بیزیم بو تازه عروسه آقالیق ایله آقا
.
گلین ایتورسه اگر طوی گونونده گردن‌بند
نه ئوزی شاد اولی نه ایل قبیله‌سی خرسند
.
بیزیم عقیده‌مزه ای ریاض عزّته گُل
بو ایشین عاقبتی نو عروسه یاخشی دگُل
.
امام ذکر ایدوب اَسمای ذات یکتانی
ستایش ایلدی پروردگار سُبحانی
.
یوزینی شطّه دوتوب صادر ایلدی فرمان
اوزون بو نهرده ای ماهیان سرگردان
.
ئوزوزی سلسله هریرده دور اورا یتورون
بیروز بو تازه عروسین بویون باغین گتورون
.
شناوَران ایشیدوبدور اطاعت ایتدی سوزه
بالیقلارین بیری فوراً سودان چخوبدی اُوزه
.
اوجالدی، آغزین آچوب عِقدی کشیته آتدی
امامه عرض سلام ایلدی سویا باتدی
.
بو اقتداری، تحیّرده کیم گوروب قالدی
گتوردی سلسله‌سین بوینونا گلین سالدی
.
یتشدی سوز بو یره اشکیمی گرک اَلیم
سوزین گریزینه کرب و بلایه گیتملیم
.
اوچولده بیر طوی اولوبدور طویون چراغی سونوب
تزه گلین گینوب قاره، طوی عزایه دونوب
.
باشنا نقل و شباش و نه شاخه گُل سَپلوب
یانوبدی حجله سراسی باشنا کول سَپلوب
.
اولوبدی سُرمه سی دود سیاه مژگاندا
باتوبدی نامزدی قاننه بیاباندا
.
گلینلیگین گینوبدور نه آغ حریر دونون
نه قند اووبدی باشی اوسته اقرباسی اونون
.
اَشدّ محنته طاقت اگرچه یوخ سنده
نچاره دقّت ایله ایندی بو نچه بنده
.
بو غملی طویدا گلون اشک چشمی نقل ایده‌گون
حُسینیله حسنی راضی ایلیوب گیده گون
.
سُرادقاتده شعله طلایی چتر آچدی
الی باشندا چخوب چوللره قاچان قاچدی
.
هراسدن بالالارین اسوردی دیل دوداقی
قووردی اُوچی کیمی هر عرب یتیم اوشاقی
.
اَدبلی قزلار اسیریدی قوم بی ادبه
تزه گلین‌ده دچاریدی وحشی بیر عربه
.
عرب دیمه نه عرب غول پست دشت و دمن
عروسی قودی او چولده دوشوبدی حوصله دن
.
غضبلنوب ایلدی نیزیه شکاری هدف
یارالانوبدی یخلدی نوۀ شاه نجف
.
توانی اولمادی دورسون ایاقه غشّ ایتدی
قولاقلاریندا اولان گوشواره‌سی گیتدی
.
نفس چکوردی او بیچاره قز چوخ آهسته
جناب زینب کبری گلوب باشی اوسته
.
باخوب باخوب دیدی جان جان گلین بالام لای لای
قانیلا تل‌لری اَلوان گلین بالام لای لای
.
اورگی غملی گونی قاره غصّه‌لی بی‌بوین
غریب جانی سنه قربان گلین بالام لای لای
.
یاخار حنا النه طوی گونونده تازه عروس
حنایه اولمادی امکان گلین بالام لای لای
.
الون حنالی دگُل، قاره زلفوی امّا
حنا کیمی بوریوب قان گلین بالام لای لای
.
دیون بو اوخشامانی شأنوه گوزل یاراشور
قولاقی یاره لی جیران گلین بالام لای لای
.
مثال شانه سنون قانلی زلفون دردی
ایدر اورکلری شان شان گلین بالام لای لای
.
گلین قویار باشنا تاج، دوزموسن سنده
تِلوه قرمزی مرجان گلین بالام لای لای
.
گلین فراغتیه تختده گیدر هوشه
گوز اوسته سُرمه‌لی مژگان گلین بالام لای لای
.
گلین قویار باشنی ناز بالشون اوسته
یرون اولوبدی بیابان گلین بالام لای لای
.
سنون کیمی دوگولوب باش آچیق قالار هرگز
آتاسین ایتسلر عریان گلین بالام لای لای
.
ایاقه دور آپاروم یاتسون حجله گاهونده
دِیَرَم اوردادا هر آن گلین بالام لای لای
.
#کاظمیه_مدح
#کاظمیه_شهادت
#قلم_ایدور_بو_حدیثی_که_زینت_دفتر
#انور_اردبیلی
#آخرین_یادگار_انور
#ترکی
.
✍️ #زبدةالاشعار ✍️
?: @nohe_torki
نظر دهید