کوچ از قتلگاه
.
✍️ #زبدةالاشعار ✍️
.
🆔: @nohe_torki
.
مرحوم حسینی سعدی زمان
.
بو چولده گیچدون آنام اوغلی فرّ و جاهوندن
مقامِ سلطنت و لشگر و سپاهوندن
.
جلال و شوکتون عالملری دوتار بیر گون
دوشر تحیّره دنیا جلال و جاهوندن
.
اسه سمومِ ستم قویمادون گُلِ دینه
علاقه کسدون اوز ایستکلی گُل گیاهوندن
.
گون اوزلی اکبرون ایتدون فدای دینِ مبین
گوتوردون ال فلک هاشیمیده ماهوندن
.
نه آی نه گون هامی اولدوزلاروندان ال چکدون
بو یولدا گیچدون اوز اصغر کیمی ستاهوندن
.
یاخوندی غرق اولا گوردون سفینهء اسلام
نجات ویردون اونا قان آرا شِناهوندن
.
دئدون که فاسقه باش اگمرم کسیلسه باشیم
کناره چیخمادون اوز راست شاهراهوندن
.
شهامتیله سوسوز سو یانیندا جان ویردون
شراره عالمه سالدون شرارِ آهوندن
.
یارالی قانلی قوم اوسته بی کفن یاتدون
جهانیانی اویاتدون بو انتباهوندن
.
یزیده بیعت الی ویرمدون کسیلدی الون
فغان جسارتِ جَمّالِ روسیاهوندن
.
بویون بلاسین آلوم دور اوزون حمایت ایله
پناه سیز قالان اطفالِ بی گناهوندن
.
وطندن آیری دوشن جانوه باجون قربان
آیردیلار سنی آلِ امیّه ماهوندن
.
عبادتین یولون عالملره نشان ویردون
ئولونجه ذکرِ حق آیریلمادی شِفاهوندن
.
بو طولِ سجده نی یوخدور نشان ویرن تا حال
نه جدّ اَمجَد و نه بابِ دادخواهوندن
.
دونن گون آرتا چاقی دوشموسن یوزون اوسته
هله دوزَلمَه میسن خاکِ سجده گاهوندن
.
جفا الی گوتوروب سجده دن باشون گویا
عیاندی مسئله دل یاندیران گواهوندن
.
یقین گچن گجه گلمیشدی یانوه زهرا
آنامین عطری گلور قانلی قتلگاهوندن
.
سنون گچن گجه وون ماجراسی روشندور
کسیلمیش اللریله پیکرونده لاهوندن
.
ولی گچن گیجه باشسیز حرملرون نه چکوب
سوروش بو خواهرِ رنجور و بی پناهوندن
.
اسیره باجووا سس ویرمیسن ندور علّت؟
سو سپ یانان دلینه جانفزا میاهوندن
.
سنه حیات و مماتین تفاوتی یوخدور
شکسته گوگلومی آل مرحمتِ نگاهوندن
.
بلالی باشیمه قوی لطفیله حمایت الون
ثباتِ قلب ویر الطافِ گاه گاهوندن
.
فدا اولوم سنه ای کهربای جوهرِ جان
گوتورمه جذبهء لطفون بو پرّ کاهوندن
.
سنه «حسینی» بو شاهلاردان التفات اولماز
مرامون ایسته اوز عالی مرام شاهوندن
.
حسین آقا سنه قربان اولوم توجّه ایله
غلامِ روسیهم قووما بارگاهوندن
.
مریدِ عشقوام ای شاه ، مرشدیم سنسن
اماندی طرد منی قیلما خانقاهوندن
.
#کوچ_کربلا #قتلگاه
#آثارالحسینی1 ص 251
#بو_چولده_گیچدون_آنام_اوغلی_فر_و_جاهوندن
#ترکی
.
✍️ #زبدةالاشعار ✍️
.
🆔: @nohe_torki
نظر دهید