قویمادون اصلا سولاردا آبرو ای نهر علقم #اصغریه_اعظمی_تبریزی

خطاب حضرت رباب (س) به نهر علقم
.
.
مرحوم اعظمی تبریزی
.
.
قویمادون اصلا سولاردا
آبرو ای نهر علقم
جان ویرور اصغر سوسوزدان
سنده سو ای نهر علقم
.
.
فاطمه مهریه سیدون
چوخلار اولدی کامیابون
نه سبب اولدی که سنده
اولماسون حقی ربابون
ایلسه زهرا گلایه
واردی آیا نه جوابون
اللریم اوسته یانور بو
ماهرو ای نهر علقم
.
.
ای گوزومده قان اولان سو
آز ربایی یاندیروب یاخ
من دیمم بو بی نوایه
رحم ایله اللهه بیر باخ
اصغریم یانسون سوسوزدان
سن چوله اشگیم کیمی آخ
من ئولوم ایلوم بو چولده
آرزو ای نهر علقم
.
.
بیز سنه بش گون قوناقوق
قان اولیدون سن بولاقدان
گلمدون بیر خیمه گاهه
هی سسون گلدی اوزاقدان
سر فکنده قالدی آدون
یوز چووردون سن قوناقدان
تهمت ایلر آلسا سندن
کیم وضو ای نهر علقم
.
.
ایتماقا حرمت قوناقه
اولدی بیر اوزگه سیاقون
ای یوزی قاره گوروم من
قانیله دولسون بولاقون
سن چوله آخ تشنه قالسون
شیر خواره بو قوناقون
سود امر دیل سیز بالایه
آزدی بو ای نهر علقم
.
.
من دیمم حرمت ایدیدون
اصغره زهرایه خاطر
ازّلین دن اولمییدون
کاش سن بو چولده ظاهر
سن منی دل سیز بالامدان
ایلدون شرمنده آخر
سنده قالدی ذرّه جه گور
آبرو ای نهر علقم
.
.
چوخ اورک لر قان ایدوبسن
خشک اولیدون لبلریم تک
تا باخوب حسرت ایدیدون
شیر خواره اصغریم تک
دردیوه حیران قالیدون
تیتریدون اللریم تلک
دمبدم چاره ایدیدون
جستجو ای نهر علقم
.
.
بو یره زوار گلسه
گورسه نهرون تهمت ایلر
تا سویا باخدوقجا آغلار
غم اوزیله حسرت ایلر
کیم کنارون دا اوتورسا
اصغریم دن صحبت ایلر
غملنر نهروندن هر کیم
ایچسه سو ای نهر علقم
.
.
شرمسار اولدون جهاندا
سانما امنه چاتموسان سن
خوارسان هر آن نظرده
رسمی گوزدن آتموسان سن
ای یوزی قاره بو چولده
چوخلاری آغلاتموسان سن
دانلار هر کیم اولسا سنله
روبرو ای نهر علقم
.
.
اعظمی ایسته خدادن
ال آچاندا سن دعایه
تا سنه لطف ایتسون الله
زایر اول کرب و بلایه
بو سوزی گوز یاشلی اوردا
سویله گل نی تک نوایه
قویمادون اصلا سولاردا
آبرو ای نهر علقم
.
.
#اصغریه #اعظمی_تبریزی #فرات_اعظمی_تبریزی #فرات_اصغریه_شهادت #ترکی #زبدةالاشعار