قویوب زینبی قارداش حیران باشون #کوفه_عاصی_تبریزی

زبانحال علیا مکرمه خطاب بسر امام درکوفه
.
#زبدةالاشعار
.
: @nohe_torki
.
مرحوم عاصی تبریزی
.
قویوب زینبی قارداش حیران باشون
اوخور نیزه باشندا قرآن باشون
تجلا ائدر مهر رخشان باشون
.
.
باتوبدور کوله گرچه مرآت حق
گنه گوسترور خلقه آیات حق
بو ناحقلره ایلر اثبات حق
ورا باطله خط بطلان باشون
.
.
بودور راه و رسم دنی روزگار
کوله بیر گون آیینه محتاج اولار
نه مرآت وجه خداوندگار
نه آئینۀ وجه رحمان باشون
.
.
برادر دونن بسکه رنجوریدون
گئجه عترتوندنده مهجوریدون
کول اوستونده یاتماقا مجبوریدون
که خستیدی بی حد و پایان باشون
.
.
رذیل اولساهرقدر بیر میزبان
قوناقه کول اوستونده وئرمز مکان
امان خولیِ میزباندان آمان
که ائتمیش کول اوستونده مهمان باشون
.
.
واریمدور جِدا قدریجه فاصله
یتیشمور الیم اولما تنگ حوصله
کولی توپراقی گُل یوزوندن سیله
گورنمم بئله قانه غلطان باشون
.
.
سسون آرترور قوّت دل منه
وئرور نخل امیدیم حاصل منه
دوروب نیزه اوسته مقابل منه
ائدوب آیۀ کهفی عنوان باشون
.
.
ائدوب نیزه باشین باشون نخل طور
سالور لمعه لمعه بیابانه نور
او نور آرترور دلده شور اوسته شور
قویوب موسی عشقی حیران باشون
.
.
گوزوندن عذاره که قانیاش آخور
منی یاندورور شعلۀ غم یاخور
گوزون حسرتیله منه چوخ باخور
آلور مندن اطفالینی سان باشون
.
.
حسین آز قالور بحر دردیم داشا
هدف شیشۀ روحیم اولموش داشا
بو قدری جفا بس دگول بیر باشا
گورور جور و ظلم فراوان باشون
.
.
سنه ای هلال سپهر وفا
که دنیاجه وار سنده صلح و صفا
ندن ائیلور اشرار کوفه جفا
خسوفه دوشوب ماه تابان باشون
.
.
بولوردوم ازل ای شقیق فؤاد
سنی ئولدورر بیر گون اهل عناد
ولی بولمدیم خارجیدن مراد
اولار مظهر دین و ایمان باشون
.
.
دیمم زینب احوالینی بیر سوروش
و یا دلده آمالینی بیر سوروش
قیزون فاطمه حالینی بیر سوروش
او طفلین ائدوب باغرینی قان باشون
.
.
باخار نیزه ده باشوه دیده تر
اولار شور لطفونله شوریده سر
بو امیده ایلر جدایه نظر
اونی دیندیره بلکه بر آن باشون
.
.
جداده آلان صوت قرآنوی
بولر پایۀ قرب رحمانوی
توکنلر سو اوسته سوسوز قانوی
ائدوب رشگ لعل بدخشان باشون
.
.
اله آلماز عاصی جهاندا قلم
اگر ائتمسه غم کتابین رقم
بو امیده ای کان جود و کرم
اولا شافع اهل عصیان باشون
.
.
.
#کوفه_عاصی_تبریزی
#قویوب_زینبی_قارداش_حیران_باشون
#ترکی
.
#زبدةالاشعار
.
: @nohe_torki
.