زبدةالاشعار

قیدندن وطنه حالی پریشانم علی #حضرت_رباب_معزی_اردبیلی

زبانحال حضرت رباب (س)در مدینه
.
.
مرحوم معزی اردبیلی
.
.
قیدندن وطنه حالی پریشانم علی
گون قرالدوب یوزومی صحنیده گریانم علی
خالی گهواریوه قنداقبوه قربانم علی
گوزلری چیخسون اگر غملربوه آغلاماسام
قانلی قونداقبوی من هرگون آچوب باغلاماسام
.
.
فلکه کیم دیدی گیت قلب ربابی یاری یار
رسم عشّاقیدی عالمده چوخ ایستر یاری یار
فکریوی باشدان آتام گور منه آیا یاری یار ؟
دیمیشم چوخدان اوغول عرشه فغانیم چخاجاق
قارون اگنیمده منیم صحنیده جانیم چیخاجاق
.
.
گورمیوب گورمیه جک فجر و فلق لیل دجام
غمیوون دشت و فلاتینده اولوب آلچاق اوجام
جمعه ئولدون اودی هر جمعه ئولونجه اوروجام
قورتارار سانلی گونوم رشتۀ گفتار آچارام
جمعه گر ئولسم حضورونده من افطار آچارام
.
.
گرک اهل کرمون دیگ کراماتی جوشا
چخمیا اللری تا عالم عهدینده ، بوشا
قوزی قربانیمی ویردیم ، آقا قوشلاره قوشا
اوخلانوب قوش کیمی جنّاته قناد چالدون علی
یاریدن باب الحوائج لقبین آلدون علی
.
.
قتلگاهونده گیدوب قانه باتوبسان گوزلیم
سینمون داشینی باشوندن آتوبسان گوزلیم
روز حشره کیمی بیر یرده یاتوبسان گوزلیم
رتبه ده رتبه سی هر عالی بنادن اوجادی
او حسین سینه سیدی بیت خدادن اوجادی
.
.
ای پرستوی وفا ، وی اوره گی حلقی یارا
خوشدی سجّاد منی کرب و بلایه آپارا
کعبة عشقی ئوپندن صورا عمریم ، قوتارا
ایستورم قبریم اوگون صحن حسینده قازیلا
قبریمون اوسته آدیم ، مادر اصغر یازیلا
.
.
یوخودا بیر گیجه گلدون بو پوزولمش اطاقا
قولومی آچدیم آلام سینمه گلدیم ، قاباقا
گوردوم آلمش سنی بیر غصّه لی عورت قوجاقا
دیدیم ای صورتی پژمرده سالان باشه قرا
کیمسن ایتدون بو قدر اصغریمه مهر و وفا
.
.
او بالا اوچ گیجه تشنه قالان اوغلومدی خانم
او بالا صبریمی الدن آلان اوغلومدی خانم
او بالا عرشه شراره سالان اوغلومدی منیم
بوغازین زهرلی پیکان بولن اوغلومدی خانم
آقامون اللری اوسته ئولن اوغلومدی خانم
.
.
دیدیم آدون ندور ای زندگیده غرق بلا
دیدی زهرا دور آدیم مادر شاه شهدا
بالامون اللرینون اوسته بالون اولدی فدا
آغلادان محنتی دنیانی حسینه آنیام
دگلم ئوزگه عروسیم سنه من قینانیام
.
.
اصغرون قانین حسین سپدی گویه روز عزا
دوشسه گوردوم یره یر اولمالیدی فوری فنا
قاباقا معجریمی دوتدوم اولوب رفع بلا
قانی حاشا باتا آند اولسون حسینون جانینا
معجریمده باخوسان باخ علی اصغر ، قانینا
.
.
تانیدیم فاطمه نی آی بالا تز ئوپدیم الین
دیدم الله سنه ویرسون عوضین بو عملین
شاد اولار قیناناسین گورسه کنارینده گلین
آخ نه زیبا یارادوب اهل کسانی یارادان
قلبیمون محنت و آلامین آپاردون آرادان
.
.
بیر تقاضا ایدورم لازم اولوب آختاریشیق
سالدی سو اوسته عدو کرب و بلاده قاریشیق
کوسدی مندن او بالام سال آرامیزدا باریشیق
آند ویر اصغر محزونیمه ختم رسلی
قالماسون دار بقایه کیمی منلن کوسولی
.
.
علی ویردی سنی آغوشیمه علیا ملکه
قالخزوب شأنیمی لطفینده خانم نه فلکه
یورولان جسمووی بوکمیشدی بهشتی بلکه
بارشیق اولدی گیجه عطریوی آلدیم یوخودا
سنی صود اممگه پستانیمه سالدیم یوخودا
.
.
دیدیم ای بحر بلاده چالیشان لایلای علی
کوسن اوّل صورا منلن باریشان لایلای علی
گوز یاشی قانه بوغازدا قاریشان لایلای علی
باباسی قانینی عرشه سپه نیم لایلای علی
فاطمه اوخ یاراسیندان اوپنیم لایلای علی
.
.
یوخودان ئوز سسیمه اصغر اویاندیم او گیجه
اشگ درد و غم اندوهه بویاندیم او گیجه
گینه ده آتش هجرانوه یاندیم ، او گیجه
چشم پُر آبیله باخدیم پوزولان ایو ایشگه
دیدیم ئولدیم ساتاشان وقته گوزوم بوش بشیگه
.
.
مرغ روحیم گینه یثربده سالیندی قفسه
آغلادیم شدّتیلن غملروه بیر نفسه
زینب عمّون اویانوب تیز یوخودان غملی سسه
ندور علت دیدی بو نالیوه آی یورقون هما
گجه گلمیشدی دیدیم صودامر اوغلوم یوخوما
.
.
یا حسین نوکریوم عمر گچوب پیرم آقا
من «معزّی» بیله بیر زندگیدن سیرم آقا
بندیم خالقیمه تابع تقدیرم ، آقا
نه دمشقی نه گیدوب بیت خدا گورمه میشم
قبریوی شوط ایلیم کرب و بلا ، گورمه میشم
.
.
.

متن پیشنهادی:  علی او کسدی اونون قامتی قیامتدور #حیدریه_سیدبشیرحسینی

#حضرت_رباب #معزی_اردبیلی
#ورود_مدینه #ورود_مدینه_معزی_اردبیلی
#اصغریه_معزی_اردبیلی
#قیدندن_وطنه_حالی_پریشانم_علی
#ترکی
#زبدةالاشعار

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی